مراتي بتوزن بنتنا

ل يوم مراتي كانت بتوزن بنتنا الرضيعة… ولما اكتشفت السر طردتها من البيت!
كل يوم الصبح، مراتي كانت بتوزن بنتنا اللي عندها 11 شهر، وفي الأول افتكرت إنها مجرد أم مهتمة بصحة بنتها وبتتابع نموها، لكن بعد فترة بدأت ألاحظ حاجة مرعبة… كل ما وزن بنتنا يزيد عن رقم معين، مراتي كانت تمنع عنها اللبن العادي، وتقفل عليها في أوضة بالساعات!
وفي يوم، عملت نفسي نازل الشغل، لكن رجعت البيت من وراها من غير ما تعرف… ولما فتحت باب الأوضة اللي كانت قافلة فيها على بنتنا، اتجمدت مكاني من المنظر اللي شوفته، وفقدت أعصابي وطردتها من البيت فورًا… لكن اللي اكتشفته بعدها في المستشفى خلاني أتمنى لو الزمن يرجع بيا ساعة واحدة بس!
اسمي أحمد، عندي 42 سنة، وبشتغل مدير حسابات في شركة كبيرة، ومراتي اسمها منى، عندها 38 سنة.
لحد وقت قريب جدًا، كنت فاكر إني أسعد راجل في الدنيا، وإن ربنا عوضني عن سنين طويلة من التعب والحرمان ببيت هادي، ومرات بتحبني، وبنت صغيرة كانت بالنسبة لينا الدنيا كلها.
أنا ومنى متجوزين من حوالي تسع سنين.
اتجوزنا بعد قصة حب طويلة، وكنا بنحلم من أول يوم إن بيتنا يتملي بأصوات الأطفال وضحكهم.
لكن ربنا ما أرادش إن الحلم ده يتحقق بسرعة.
سبع سنين كاملة وإحنا بنلف على الدكاترة.
تحاليل وأشعات وعلاج، وكل شهر نعيش على أمل جديد، وفي الآخر نرجع لنفس نقطة البداية.
كنت بشوف منى وهي بتحاول تبان قوية قدامي، لكن بالليل، لما تفتكر إني نمت، كنت بسمع صوت عياطها المكتوم.
وفي مرة صحيت لقيتها قاعدة على طرف السرير، ماسكة صورة طفل صغير على موبايلها، وبتعيط.
قربت منها وسألتها
مالك يا حبيبتي؟
مسحت دموعها بسرعة وقالت
مفيش يا أحمد، بس كنت بفكر… هو إحنا عمرنا ما هنسمع كلمة ماما وبابا؟
حضنتها وقولتلها
هنسمعها يا منى، وربنا كريم. وحتى لو ما سمعناهاش، إنتِ عندي بالدنيا كلها.
كانت تبتسم، لكن كنت عارف إن جواها ۏجع كبير.
ومع مرور السنين، الموضوع بدأ يأثر على نفسيتها.
كانت بتتهرب من العزومات اللي فيها أطفال، ومابقتش تحب تروح سبوع أو عيد ميلاد لأي طفل من أطفال قرايبنا.
مش لأنها مش بتحب الأطفال، بالعكس، دي كانت بتعشقهم.
لكن لأنها كانت بترجع البيت بعدها مکسورة.
لحد ما جه اليوم اللي عمرنا ما هنساه.
منى كانت تعبانة شوية، وبتشتكي من دوخة وغثيان، وأنا كنت فاكر إن الموضوع مجرد إرهاق.
لكنها أصرت تعمل اختبار حمل.
وفجأة سمعتها بتصرخ من الحمام
أحمد! أحمد تعالى بسرعة!
جريت عليها وأنا مړعوپ، لقيتها واقفة ماسكة الاختبار، وإيديها بتترعش.
بصتلي ودموعها نازلة وقالت
أنا حامل يا أحمد… أنا حامل!
في اللحظة دي، حسيت إن الدنيا كلها وقفت.
حضنتها وفضلنا نعيط ونضحك في نفس الوقت.
ماكنتش مصدق إن بعد سبع سنين انتظار، ربنا أخيرًا استجاب لدعواتنا.
ومن يومها، منى بقت أهم إنسانة في حياتي، والجنين اللي في بطنها بقى أغلى من روحي.
كنت بروح معاها كل كشف، وأتابع كل تحليل، وأحفظ مواعيد الأدوية أكتر منها.
ولما الدكتور قال لنا إن الجنين بنت، منى بصتلي وقالت
نسميها ليلى؟
ابتسمت وقلت
ليلى اسم جميل… خلاص، اتفقنا.
ومن يومها، بقينا بنتكلم عن ليلى كأنها عايشة معانا بالفعل.
جهزنا أوضتها، واشترينا سريرها، وهدومها الصغيرة، ولعب كتير أوي كانت منى بتشتريها كل ما تنزل.
كنت أضحك وأقولها
يا بنتي استني لما تتولد الأول!
فترد عليا
سيبني أفرح يا أحمد… أنا مستنية اللحظة دي من سبع سنين.
وأخيرًا، جه يوم الولادة.
فاكر إني كنت واقف قدام أوضة العمليات، ومش قادر أقعد من التوتر.
ولما سمعت صوت عياط بنتي لأول مرة، حسيت إن قلبي هيطلع من مكانه.
الدكتور خرج وابتسم وقال
مبروك يا بابا، عندك عروسة زي القمر.
دخلت أشوف منى، لقيتها حاضنة ليلى، وبتبص في وشها كأنها شايفة معجزة.
كانت دموعها نازلة وهي بتهمسلها
أنا استنيتك كتير أوي يا حبيبتي… أوعدك يا ليلى، عمري ما هسمح لأي حاجة وحشة تقرب منك.
وقتها، ماكنتش أعرف إن الجملة دي هتفضل ترن في وداني بعد شهور، لكن بمعنى مختلف تمامًا.
مرت الأيام الأولى بعد الولادة، وبيتنا اتغير.
بقى فيه صوت عياط وضحك وحركة طول الوقت.
منى كانت بتصحى على أقل صوت من ليلى، وتفضل شايلها بالساعات.
وأنا كنت أول ما أرجع من الشغل، أرمي الشنطة وأجري على أوضتها.
كنت أقول لمنى
هاتِ البنت بقى، إنتِ محتكرها طول اليوم!
فتضحك وتقول
دي بنتي أنا!
وأرد عليها
وأنا ماليش فيها نصيب يعني؟
فتديني ليلى وهي بتضحك، وأفضل ألعب معاها لحد ما تنام على صدري.
لكن وسط الفرحة دي، حصلت حاجة كسرتني من جوا.
أخويا الأصغر، محمود، اتوفى فجأة في حاډثة عربية.
كان أقرب إنسان ليا بعد مراتي.
كنا أصحاب قبل ما نكون إخوات، وكان أول واحد وقف جنبي في فترة علاج منى، وأول واحد جري عليا المستشفى يوم ولادة ليلى.
ۏفاته كانت صدمة عمري.
فضلت شهور مش قادر أستوعب إنه مش موجود.
ومن بعدها، بقيت بخاف على كل اللي بحبهم بطريقة مبالغ فيها.
كنت أصحى من النوم أبص على ليلى وأتأكد إنها بتتنفس.
ولو اتأخرت في النوم شوية، أقوم أشوفها.
ولو منى قالتلي إنها سخنة أو مش بتاكل كويس، كنت أتوتر جدًا.
منى كانت تحاول تهديني وتقول
يا أحمد، اهدى شوية… البنت كويسة الحمد لله.
لكن الخۏف كان مسيطر عليا.
كنت حاسس إن المۏت ممكن يخطف مني أي حد في أي لحظة، زي ما خطڤ أخويا.
ومع الوقت، بدأت أرجع لطبيعتي شوية، أو على الأقل كنت فاكر كده.
لحد ما ليلى كملت تسع شهور تقريبًا.
ومن هنا بدأت الحكاية اللي قلبت حياتنا كلها.
في صباح يوم عادي، كنت بجهز نفسي عشان أنزل الشغل.
دخلت أوضة ليلى عشان أبوسها قبل ما أمشي، فلقيت منى حاطاها على ميزان أطفال صغير، وماسكة كشكول أزرق بتكتب فيه أرقام.
استغربت وسألتها
إيه ده يا منى؟ بتعملي إيه؟
ردت من غير ما تبصلي
بوزن ليلى.
ضحكت وقلت
هو إحنا هنفتح عيادة أطفال في البيت ولا إيه؟
ابتسمت ابتسامة خفيفة وقالت
بتابع وزنها يا أحمد، عشان أطمن إنها بتكبر كويس.
قولتلها
طب ما إحنا بنروح للدكتور كل فترة، وهو بيشوف وزنها.
ردت بسرعة
المتابعة اليومية أحسن.
ما اهتمتش بالموضوع.
بالعكس، كنت شايف إنها أم مهتمة، ويمكن زيادة شوية، وده طبيعي بعد السنين اللي استنيناها.
لكن بعد كام يوم، بدأت ألاحظ تصرفات غريبة.
كل يوم الصبح، منى كانت تصحى بدري، وتوزن ليلى قبل أي حاجة.
تكتب الرقم في الكشكول، وبعدين تقعد تبص فيه فترة طويلة.
وفي الأيام اللي الوزن فيها يزيد عن رقم معين، كانت ملامحها تتغير فجأة.
الابتسامة تختفي، ووشها يشحب، وتفضل ساكتة.
وبعدها تدخل المطبخ وتبدأ تعمل حاجات مش مفهومة.
في مرة كنت قاعد بشرب قهوتي، وشوفتها داخلة المطبخ وماسكة ببرونة ليلى.
فتحتها وفضت اللبن كله في الحوض.
استغربت وقلت
إنتِ بترمي اللبن ليه؟
ردت
مش مناسب ليها.
قولتلها
مش مناسب إزاي؟ ده نفس اللبن اللي بتشربه من شهور!
قالت بعصبية
أنا عارفة بعمل إيه يا أحمد.
سكت، لكن الموضوع فضل في دماغي.
وبعد يومين، حصل موقف خلاني أقلق بجد.
كنت راجع من الشغل بدري، ودخلت لقيت ليلى قاعدة في كرسيها الصغير، وبتمد إيديها ناحية الببرونة اللي منى ماسكاها.
كانت بټعيط، وكل ما تقرب من الببرونة، منى تبعدها عنها.
قولتلها
يا منى، البنت جعانة، اديها الرضعة!
ردت وهي متوترة
مش دلوقتي.
قولتلها
يعني إيه مش دلوقتي؟! ما إنتِ شايفاها بټعيط!
بصتلي بنظرة حادة وقالت
أحمد، إنت مش فاهم أي حاجة، سيبني أتصرف.
اتعصبت وقلت
مش فاهم
إيه؟! دي بنتي، ومن حقي أعرف ليه بتمنعي عنها الأكل!
صړخت فيا لأول مرة من يوم ما اتجوزنا
قولتلك ابعد عن الموضوع ده!
وقفت مكاني مصډوم.
منى عمرها ما كلمتني بالطريقة دي.
حتى في أصعب خلافاتنا، كانت دايمًا هادية، وبتعرف تتكلم من غير ما تجرحني.
لكن المرة دي، كان في عينيها خوف غريب، كأنها بتدافع عن سر كبير.
دخلت أوضة النوم وقفلت الباب ورايا، وفضلت أفكر.
هل منى عندها مشكلة نفسية؟
هل الخۏف على ليلى خلاها تتصرف بطريقة مش طبيعية؟
ولا فيه حاجة أنا مش فاهمها؟
حاولت أقنع نفسي إن الموضوع بسيط، وإنها أكيد عندها سبب.
لكن الأيام اللي بعد كده أثبتتلي إن الموضوع أكبر بكتير.
في يوم رجعت من الشغل، ولقيت ورقة كبيرة متلزقة على باب التلاجة.
مكتوب عليها بقلم أحمر عريض
ممنوع إعطاء ليلى اللبن العادي تحت أي ظرف من الظروف.
وقفت أبص على الورقة وأنا مش مصدق.
ناديت على منى
منى! تعالي هنا!
خرجت من الأوضة وسألتني
فيه إيه؟
شورت على الورقة وقلت
إيه الكلام ده؟
ردت بهدوء غريب
تعليمات تخص أكل ليلى.
قولتلها
تعليمات مين؟
سكتت لحظة وبعدين قالت
تعليماتي أنا.
ضحكت ضحكة عصبية وقلت
يعني إنتِ بقيتي دكتورة أطفال فجأة؟
وشها اتغير وقالت
أحمد، أرجوك ماتدخلش في أكل البنت.
قولتلها
إنتِ بتمنعيني أأكل بنتي؟
ردت
أيوه… لحد ما أقولك.
الكلمة نزلت عليا زي القلم.
لحد ما تقوليلي؟! هو أنا غريب في البيت ده؟!
لكنها ما ردتش.
دخلت أوضة ليلى وقفلت الباب.
ومن اليوم ده، بدأت أحس إني بقيت ضيف في حياة بنتي.
كل ما أحاول أعمل لها رضعة، منى تاخد الببرونة من إيدي.
كل ما أقول هأكلها، ترد إنها أكلتها.
وكل ما أسألها عن وزنها، تقوللي إن كل حاجة تمام.
لكن أنا كنت شايف إن كل حاجة مش تمام.
منى نفسها اتغيرت.
وشها بقى مرهق، وتحت عينيها هالات سودا.
بقت تنام ساعات قليلة جدًا.
كانت تصحى بالليل كذا مرة، وتقعد جنب سرير ليلى، وتكتب أرقام في الكشكول الأزرق.
وأحيانًا كنت أصحى ألاقيها بتتكلم في التليفون بصوت واطي.
أول ما تحس إني صحيت، تقفل المكالمة بسرعة.
في مرة سألتها
بتكلمي مين الساعة اتنين بالليل؟
ردت
واحدة صاحبتي.
قولتلها
صاحبتك مين اللي بتكلميها كل يوم في الوقت ده؟
قالت
يا أحمد، أرجوك بلاش أسئلة كتير.
كنت حاسس إن بينا حيط بيتبني كل يوم، وأنا مش عارف أهده.
لكن أكتر حاجة كانت مرعباني، هي الأوضة المقفولة.
منى بقت تاخد ليلى وتدخل بيها أوضة النوم بالساعات.
تقفل الباب، وأحيانًا بالمفتاح.
وكل ما أسألها بتعمل إيه، تقول
بريح البنت شوية.
لكن كنت بسمع صوت ليلى وهي بټعيط.
في مساء يوم، رجعت من الشغل متأخر شوية.
أول ما دخلت البيت، سمعت صوت عياط عالي جاي من فوق.
رميت المفاتيح على الترابيزة، وطلعت أجري على السلم.
وصلت قدام الأوضة، ولقيت الباب مقفول.
خبطت وقلت
منى! افتحي الباب!
ردت من جوه
مش دلوقتي يا أحمد.
قولتلها
إزاي مش دلوقتي؟! البنت بټعيط!
قالت بصوت متوتر
سيبني شوية، هطلع حالًا.
زعقت
منى، افتحي الباب دلوقتي!
وفجأة سمعتها بتقول بصوت واطي، كأنها بتكلم ليلى
استحملي يا حبيبتي… ماما عارفة هي بتعمل إيه.
الجملة دي جمدت الډم في عروقي.
استحملي إيه؟
بنت عندها شهور تستحمل إيه؟
فضلت واقف قدام الباب، وحاسس إن فيه حاجة غلط جدًا بتحصل جوه.
بعد حوالي ربع ساعة، الباب اتفتح.
منى خرجت شايلة ليلى، ووشها مرهق.
أخدت البنت منها وبصيت عليها.
كانت هادية، لكن عينيها حمرا من العياط.
سألت منى
إنتِ كنتِ بتعملي فيها إيه؟
ردت
كنت بطمن عليها.
قولتلها
بطمني عليها إزاي وهي بتصرخ بالشكل ده؟!
قالت
أحمد، أنا تعبانة ومش قادرة أتكلم