أنا كنت فاكرة إن اللي بينا كفاية، وإن العشرة والبيت والولاد هيخلّوه يفكر ألف مرة قبل ما يعمل حاجة زي دي، بس واضح إني كنت فاهمة غلط. حسيت بغصة في حلقي، وكنت هتكلم، لكنها كملت بسرعة وكأنها خايفة لو سابت لنفسها فرصة تسكت، كل اللي جواها هيظهر.
وبعدين أنا عندي ولادي، ومش عايزاهم يشوفوني كل يوم بتخانق مع أبوهم أو بعيط بسببه. أنا هعمل اللي عليا، وهربي ولادي، وربنا هو اللي عالم بكل حاجة. ـ يعني هتفضلي زي ما إنتِ؟ هتنزلي تساعدي حماتي، وتهتمي بيه وبالبيت، وهو رايح يتجوز واحدة تانية؟
ابتسمت ابتسامة باهتة، وقالت: ـ أنا مش بعمل الحاجات دي عشانه لوحده، أنا بعملها عشان دي طبيعتي، وعشان بحب ماما، وبعتبرها زي أمي. مش هتغير معاملة الناس اللي بحبهم عشان هو قرر يتجوز عليا. وبعدها شالت طبق الفطار وخرجت من الأوضة، وسابتني واقفة مكاني مش عارفة أقول لها إيه.
كنت شايفة قد إيه هي موجوعة، رغم إنها مش بتعيط، وقد إيه بتحاول تحافظ على كرامتها حتى لو قلبها بيتكسر من جواها. لكن اللي شغل تفكيري أكتر هو سيف، جوزها. لما رجع من شغله الظهر، ودخل البيت، لقى تقى بتضحك مع الولاد وبتساعدهم في مذاكرتهم، ولما دخل عليهم، رفعت عينيها له وقالت عادي جدًا: ـ حمد الله على السلامة، الغدا جاهز لو عايز تاكل.
وقف مكانه وبصلها شوية، وبعدين قال: ـ تقى، ممكن نتكلم؟ ردت من غير ما تبصله: ـ لما تخلص أكلك، عشان الولاد بيذاكروا دلوقتي. ولأول مرة من ساعة ما أعلن جوازه، شفت سيف متلخبط ومش فاهم يتصرف إزاي.
هو كان مستني منها تعترض، وتتمسك بيه، وتطلب منه يغير رأيه، لكنه ما كانش متخيل إنها ممكن تسيبه يواجه قراره من غير ما تحاول تمنعه. ويمكن هو ما كانش فاهم إن سكوت تقى مش معناه إنها مش موجوعة، وإن قبولها الظاهري مش معناه إنها سامحته، ولا إن قلبها لسه زي ما كان.
لأن في وجع بيخلّي الإنسان يصرخ، وفي وجع تاني بيخلّيه يسكت، ويبدأ من اللحظة دي يبعد بقلبه، حتى لو لسه عايش في نفس البيت. وتقى، من غير ما حد ياخد باله، كانت بدأت تبعد. رفضت تقى أنها تكلمه فى اى حاجه تخص جوازه وهو كان بيوضب شقته ولما كان بيطلب مساعدتها كانت بتساعده حاولت حماتى من ورا الكل انها تخليه يغير رأيه لكن مقدرتش عشان كده اخدت جمب وسابته يعمل اللى هو عايزه ويتحمل نتيجه أفعاله وفعلاً عدت الشهور والعروسه جت عشان تشوف بيتها وقابلت تقى ياترى هتقابلها إزى
قصص وروايات أماني سيد
وفعلًا عدت الشهور، وسيف خلّص تجهيز الشقة، وكان محدد يوم إن منه تيجي تشوفها قبل الفرح، وقرر إنه ياخدها معاه عند أمه عشان تتعرف على العيلة، خصوصًا تقى اللي هتبقى ضرتها.
كنت قاعدة عند حماتي أنا وتقى، بنجهز الغدا، لما سمعنا صوت سيف بره وهو بيقول إنه وصل، وبعدها دخل ومعاه منه. حماتي خرجت تستقبلهم، وأنا وتقى خرجنا وراها، وأول ما منه دخلت، سيف بدأ يعرفها علينا. ـ ماما، دي منه. حماتي سلمت عليها ببرود : ـ أهلًا يا بنتي، نورتينا.
منه ابتسمت ابتسامة خفيفة وردت: ـ ده نور حضرتك. وبعدها سيف بص لتقى وقال: ـ ودي تقى، مراتي. تقى قربت منها وسلمت عليها بهدوء: ـ أهلًا يا منه، إزيك؟ منه بصتلها من فوق لتحت، ومدت إيدها تسلم عليها ببرود، وقالت: ـ الحمد لله.
من أول لحظة حسيت إن البنت دي داخلة وهي حاطة نفسها في مكانة أعلى من الكل، لكن قلت يمكن ده مجرد انطباع أول، وإنها مع الوقت هتتعود علينا. قعدنا كلنا في الصالون، وحماتي بدأت تسأل منه عن أهلها وشغلها وحاجات كتير عشان تكسر الحاجز اللي بيننا، وكانت تقى قاعدة جنبي ساكتة، بتسمع أكتر ما بتتكلم.
بعد شوية، حماتي قالت: ـ طيب يا بنتي، تحبي تشربي إيه؟ شاي ولا قهوة ولا عصير؟ منه ردت: ـ قهوة لو سمحتِ، بس تكون مظبوطة، أنا مبحبش القهوة التقيلة. حماتي كانت لسه هتقوم، لكن تقى سبقتها وقالت: ـ أنا هعملهالك يا ماما.
قامت تقى ودخلت المطبخ، وأنا قمت وراها أساعدها، لكنها قالتلي: ـ اقعدي إنتِ مع ماما، أنا هعمل القهوة وأجيلكم. وبعد دقائق، رجعت تقى بالصينية، وحطت فنجان القهوة قدام منه، اللي أخدته من غير ما تبصلها، وبعد ما داقت منه، قطبت حواجبها وقالت: ـ القهوة دي مسكرة زيادة، أنا قلت معلقة واحدة بس.
تقى بصتلها بهدوء وقالت: ـ معلش، أنا افتكرت إنك بتحبيها بمعلقتين، أعملك واحدة تانية؟ منه حطت الفنجان على الترابيزة وقالت: ـ خلاص، مش مشكلة. لكن نبرة صوتها كانت كفيلة إنها تضايق أي حد، وسيف بدل ما يعتذر لتقى عن أسلوب منه، قال لها: ـ معلش يا حبيبتي، تقى متعرفش إنتِ بتحبيها إزاي، المرة الجاية هتظبطهالك.
بصيت له وأنا مش مصدقة إنه بيتكلم بالطريقة دي، وكأن تقى غلطت غلطة كبيرة، مع إنها قامت من مكانها عشان تخدم ضرتها ! أما تقى، فما علقتش، واكتفت إنها تشيل الصينية وتحطها على الترابيزة الجانبية. وبعد شوية، حماتي قامت تدخل المطبخ تتابع الغدا، وتقى قامت معاها تلقائيًا تساعدها، لكن منه فضلت قاعدة مكانها، ولما سيف قال لها: ـ تحبي تدخلي تقعدي مع ماما وتقى شوية؟
ردت بضيق: ـ لأ، أنا أفضل قاعدة هنا، وبعدين أنا مش بعرف أقعد في المطبخ كتير. سيف ابتسم وقال: ـ خلاص يا حبيبتي، براحتك. أنا كنت واقفة عند باب الصالون وسمعت الكلام، وحسيت إن منه مش بس بتتعامل بتعالي، دي كمان من أول زيارة ليها بتتعامل كأنها عايزة تثبت إنها مش زي تقى، وإنها مش هتعمل أي حاجة هي مش حاباها.
بعد الغدا، رجعنا كلنا قعدنا مع بعض، ومنه بدأت تتكلم عن شقتها وتجهيزاتها، وإنها عايزة كل حاجة تكون على ذوقها، وإنها مش بتحب حد يتدخل في حياتها. حماتي قالت لها بابتسامة: ـ طبعًا يا بنتي، بيتك وإنتِ حرة فيه، وربنا يسعدكم.
منه بصت لتقى فجأة وقالت: ـ أصل أنا من النوع اللي بيحب يعتمد على نفسه، ومش بحب أبقى مضطرة أعمل حاجات عشان أرضي حد، خصوصًا لو الحاجات دي مش واجبة عليا. فهمت إنها بتلمح لموضوع مساعدة حماتي، وإنها عايزة توصل من أول يوم إنها مش هتعمل زي تقى، لكن تقى فضلت ساكتة، ولا كأن الكلام ليها.
