مراتي طيبة جدًا وبتحبني وبتحب البيت والولاد، وبتحب أمي جدًا، وأمي كمان بتحبها وبتعتبرها بنتها؛ لأن مراتي يتيمة الأب والأم، وكانت عايشة مع خالها. كان جوازي بيها تقليدي، شوفتها في فرح وعجبت أمي ولفتت نظري لأنها حلوة، واتجوزنا وخلفت منها ولد كان شبهها.
وأنا ماما كانت مريضة، وأختي مشغولة مع جوزها وولادها، ومعتمدة على مراتي في كل حاجة، ومراتي مكنتش بتقصر مع حد أبدًا. بس رغم كده الحب مش بإيدينا، لما كنت ألاقي واحدة تلفت نظري كنت أبعد فترة لحد ما أنسى، عشان أفضل وفي لمراتي وتفضل حياتي مستقرة، لحد ما جت في يوم شمس، موظفة جديدة، دمها خفيف وحلوة.
مكنتش بقدر أشيل عيني من عليها، حاولت أعمل زي ما عملت مع اللي قبلها، معرفتش، أو شمس مكنتش بتديني فرصة؛ لأنها كانت بتثير غيرتي لمجرد إني ألاقيها بتكلم حد تاني. وقتها سبت مشاعري فترة وقربنا من بعض، واعترفتلها إني بحبها، وهي اعترفتلي إنها بتحبني هي كمان، وإن جوازي مش فارق معاها، أهم حاجة إني أحبها هي وأفضلها هي وقلبي يبقى ليها هي.
وأنا وافقت وقلتلها إني فعلًا بحبها، وقررت إن ليلى تعيش مع أمي وتاخد عفشها، وأوضب شقة ماما وتعيش فيها، وأنا أتجوز شمس في الشقة التانية. ورتبت أموري على كده، وفعلاً عملت قعدة مع ماما وليلى وقلتلهم رغبتي.
ليلى فضلت قاعدة ساكتة بتراجع نفسها؛ لأنها لو اتطلقت مالهاش غير خالها، ومابقاش ينفع تروحله بابنها كمان ويتحمل مسؤوليتهم. ماما فضلت تعترض، وليلى ساكتة بتعيط، والنقاش اشتد بيني وبين ماما، وماما سألتني:
ـ مراتك ناقصها إيه عشان تتجوز غيرها؟
رديت بعصبية من غير ما أراجع كلامي:
ـ ناقصها إني أحبها، أنا مابحبهاش، أنا عايش معاها عشان تخدمك، إنما مشاعري كلها لشمس.
بعد الكلمة دي السكوت حل في المكان كله، ومراتي قالت لأمي:
ـ خلاص أنا موافقة، وهقعد معاكي.
لا أحلل قرائتها غير على صفحتى قصص وروايات أماني سيد
وانت اتجوز اللي قلبك دق لها.
وسابتنا ودخلت، وأمي كانت بتعيط على كسرتها.
وفعلًا نزلت العفش ووضبت الشقة واتجوزت شمس. كنت طالع العمارة وأنا شايل شمس، وفعلاً كنت فرحان من قلبي، وكنت بعمل أي حاجة عشان أفرحها، ومش حاسس إني متجوز واحدة تانية.
بقى وقتي وحياتي ليها، حتى أمي نسيتها ومابقتش أنزل أعدي عليها زي الأول. كانت شمس بتعرف تاخد مني أي حاجة هي عايزاها وتخليني أنفذلها أي طلب نفسها فيه. كنت باخد طلباتها على أساس إنها جنان، وقلت لنفسي أتجنن معاها، ونسيت إن في واحدة تانية بتشوف ده وبتسمعه، وإن قلبها بيتكسر.
أغلب أكلنا كان جاهز وأنا مكنتش مهتم. كنت بعيش اللحظة، ولما يهفني الشوق لأكل البيت كنت أنزل أنا وشمس لماما ناكل ونطلع. وماما مكنش عاجبها الوضع، وكانت نظراتها لشمس بتضايقني.
وشمس عشان تضايق ماما كانت تتعمد تطلب من ليلى إنها تخدمها، تعملها شاي وقهوة ونسكافيه، ومرة طلبت منها كيكة.
وفي يوم كنا سهرانين، وأمي قالتلي أنا عايزة أنام، فراحت شمس قالتلي وأنا كمان عايزة أنام ومش قادرة أمشي، شيلني لحد فوق. وأنا عشان أعوضها عن معاملة أمي سمعت كلامها وشيلتها قصاد أمي وليلى، وهي بقت تهز رجلها وأنا شايلها وبتبصلهم بسخرية.
وفي مرة ليلى تعبت وسخنت، وأمي بقت تكلمني وتطلب مني أوديها المستشفى وهي تقعد بابني، لكن وقتها شمس وقفت قصادي وقالتلي:
ـ لو نزلت يبقى ليلى تهمك، بلاش تروح عشان ماتعشمهاش إن ممكن في يوم تهتم بيها.
قولتلها:
ـ بس هي سخنة.
وماما وقتها أدتني ضهرها وقالتلي:
ـ لأ يا سامح، يا أنا يا هي. مراتك مش عيلة صغيرة، تقدر تقوم تاخد برشامة وهتبقى كويسة، لكن هما بيعملوا كده عشان يضايقوني. أوعى تسمع كلامهم، ولو نزلت هعرف إنك لسه مهتم بيها.
بصيت لشمس اللي كانت واقفة قصادي مستنية ردي،
ولقيت نفسي مش عايز أزعلها أو أحسسها إن ليلى لسه ليها مكان عندي، فقلت لها:
ـ خلاص يا شمس، مش هنزل.
أنا مش ناقص وجع دماغ، وبعدين هي مش صغيرة وعارفة تتصرف.
شمس ابتسمت ورجعت تقعد على الكنبة، وأنا طلعت موبايلي وقفلتُه خالص عشان محدش يقدر يوصل لي، وبعدها قعدت جنبها وحاولت أغير مودها.
ـ إيه رأيك نطلب أكل من بره ونتفرج على فيلم؟
ردت بدلع:
ـ بس أنا مش عايزة أكل، أنا عايزة تقعد معايا وتنسى أي حاجة تانية في الدنيا.
ضحكت وقلتلها:
ـ هو أنا ليا غيرك؟
وفي الوقت ده كانت أمي بتتصل بيا مرة ورا التانية، وكل مرة تلاقي الموبايل مقفول، لحد ما قلقت أكتر، خصوصًا إن ليلى كانت حرارتها بتعلى ومش قادرة تقوم من مكانها.
أمي حطت إيدها على راسها وهي بتكلمها:
ـ يا بنتي اصبري، أنا هتصرف، بس مش عارفة أوصل لسامح.
ليلى كانت مرهقة، ومع ذلك حاولت تطمنها:
ـ معلش يا ماما، أكيد عنده ظروف، أنا هبقى كويسة إن شاء الله.
لكن أمي ماقدرتش تستحمل، قامت وطلعت الشقة اللي فوق، وخبطت على الباب أكتر من مرة. شمس فتحت لها، وبصتلها من فوق لتحت وقالت ببرود:
ـ خير يا طنط؟
أمي ردت بقلق:
ـ سامح موجود؟ أنا بقالي ساعة بتصل بيه وموبايله مقفول، وليلى حرارتها عالية ومحتاجة تروح المستشفى.
شمس اتكأت على الباب وقالت:
ـ أنا تعبانة يا طنط، وهو قاعد معايا، اديها برشامة مسكن وهتبقى كويسة، هي مش كل شوية هتتعب وتخليه ينزل لها.
أمي بصتلها باستغراب وقالت:
ـ دي مراته يا بنتي وأم ابنه، ومش بتطلب منه حاجة لنفسها، دي تعبانة ومحتاجة حد يساعدها.
شمس رفعت حاجبها وردت:
ـ وأنا مراته برضه، ولا حضرتك نسيتي؟ وبعدين أنا كمان تعبانة ومحتاجة جوزي يقعد جنبي.
صوت أمي علي شوية وهي بتقول:
ـ أنا مش جاية آخد جوزك منك، أنا جاية أطلب منه ينزل يلحق أم ابنه قبل ما حالتها تتعب أكتر.
وقتها سمعت صوت أمي، فقمت من مكاني وخرجت، وأول ما شفتها حسيت بضيق، مش عشان هي أمي، لكن عشان عارف إن شمس هتضايق لو نزلت معاها.
قلتلها:
ـ في إيه يا ماما؟ مش اتكلمنا في الموضوع ده قبل كده؟
بصتلي أمي بعيون مليانة دموع وقالت:
ـ يا ابني مراتك تعبانة، سخنة ومش قادرة تقوم، أنا مش بطلب منك تبات عندها، انزل وصلها المستشفى وارجع لمراتك.
تنهدت بضيق ورديت:
ـ يا ماما أنا تعبان ومراتي تعبانة، ومش قادر أروح في حتة، اتصلي بالصيدلية وهاتي لها خافض حرارة ومسكن وهتبقى كويسة.
أمي فضلت باصة لي كأنها مش مصدقة اللي سمعته.
ـ يعني إيه يا سامح؟ دي ممكن تكون محتاجة دكتور!
ـ يا ماما بلاش تكبري الموضوع، هي سخنة، ولو حالتها ساءت نبقى نشوف.
شمس كانت واقفة ورايا، وسمعتها بتقول:
ـ أنا قلتلك يا طنط، هو تعبان وأنا تعبانة، وبعدين ليلى إنتِ معاها وأنا لوحدي، مش لازم كل حاجة سامح يعملها.
أمي بصتلها بضيق، وبعدها رجعت بصتلي وقالت:
ـ أنا مش زعلانة منك عشان مراتك، أنا زعلانة عليك أنت يا سامح، عشان مش متخيلة إنك بقيت بالشكل ده، دي اللي كانت بتخدمك وتخدمني وتراعي ابنك، لما احتاجتك بقيت تقفل موبايلك في وشها وتقول لها تاخد برشامة!
رديت بعصبية:
ـ خلاص يا ماما، أنا مش عايز أسمع الكلام ده تاني، انزلي شوفيها ولو محتاجة حاجة هاتيها لها.
أمي سكتت، وفضلت تبصلي شوية، وبعدها قالت بصوت مكسور:
ـ ربنا يهديك يا ابني، بس افتكر إن اللي بتعمله النهارده ممكن يتعمل فيك بكرة.
ومشيت، وشمس أول ما قفلت الباب بصتلي بابتسامة وقالت:
ـ أخيرًا عرفت تحط حدود، أنا كنت خايفة تنزل وتفضل هناك بالساعات.
ضحكت وقلتلها:
ـ ماتقلقيش، أنا مش هعمل حاجة تضايقك.
رجعت قعدت جنبها، لكن كلام أمي فضل يتردد في ودني للحظات، حاولت أطرده من دماغي، وشغلت التلفزيون، وطلبنا الأكل.
أما أمي فنزلت لليلى، جابت لها الدوا وقعدت جنبها تحاول تخفض حرارتها، وكل شوية تحط إيدها على جبينها وتدعي ربنا يشفيها.
ليلى كانت بتبص لابنها النايم جنبها، ودموعها بتنزل في صمت، مش عشان سامح ماجاش بس، لكن عشان بدأت تفهم إن الراجل اللي اختار يبعد عنها بإرادته، ممكن كمان يسيبها وقت ما تكون محتاجاه فعلًا.
