بنت خالتي أثرت في حياتي وخلت خطيبي يتركني قبل الفرح بأسبوع
من يوم ما اتخرجت من كلية الطب، وقرايبي مش سايبين أمي في حالها.
كل يوم نفس الكلام:
– بنتك لسه متجوزتش ليه؟
– هي مستنية إيه؟
– البنت هتعنس، شوفي لها عريس بدل ما يفوتها القطر!
وأمي كانت بتسمع الكلام ده كل يوم، وأنا بصراحة مكنتش فارق معايا. كنت لسه متخرجة، وفرحانة بنفسي وباللي وصلت له بعد سنين تعب ومذاكرة.
كنت بقول النصيب على ربنا، وكل اللي بدعي بيه إن ربنا يرزقني بإنسان محترم، يحبني ويصوني ويكون سند ليا.
عدى شهرين، وبعدهم خمسة شهور، وبدأت أحس إن كلام الناس دخل جوايا من غير ما أحس.
مش عشان خايفة أتأخر في الجواز، لكن حسيت إن نفسي أعيش حياة مختلفة، يبقى ليا بيت وأسرة، وأخلف بنت صغيرة أفرح بيها.
كنت الحمد لله موفرة لنفسي كل حاجة، لكن كان جوايا إحساس إن في حاجة ناقصة.
وفي يوم، صليت ودعيت ربنا من قلبي، وقلت يا رب ارزقني بزوج صالح يكون على قد قلبي، وورّي الناس اللي بتضحك عليا إن رزقك ملوش ميعاد.
وسبحان الله، ما عداش أسبوع إلا وكان في عريس متقدم لي!
مش هقولكم كام واحد اتقدم قبل كده ومحصلش نصيب، لكن الشخص ده كان مختلف فعلًا.
عملنا الرؤية الشرعية، وارتحت له جدًا. كان محترم وهادي، وشكله ما شاء الله جميل، وعنده شقة ومستقر ماديًا، والأهم إنه كان بنفس المواصفات اللي كنت بدعي ربنا بيها.
في أقل من شهر، كنا كتبنا الكتاب وعملنا الخطوبة، وحددنا الفرح بعد تلات شهور.
كان مغرقني هدايا واهتمام، وكل شوية يقولي:
– إنتِ تؤمري يا سارة، أي حاجة نفسك فيها قوليلي.
وأنا كنت بكسف وأضحك وأقوله:
– أنا مش عايزة حاجة، كفاية إنك بتعاملني كويس.
لدرجة إني مرة عملت تفاعل على صفحة فيسبوك على بوكس هدايا عجبني، لقيته جابهولي ونزل صورته وكتب:
«شوفتك مدايقة عليه، مقدرتش أفرط في إنك تفرحي بيه».
ومرة تانية قالي:
– قوليلي نفسك في إيه، عشان متستنيش لما أجيبلك مفاجأة.
حسيت وقتها إني لقيت فارس أحلامي بجد.
ورغم إني عصبية وعنيدة ومش كل حاجة بتعجبني، كان بيعرف يحتوي غضبي بكلمة، ويصالحني من غير ما يحسسني إني غلطانة أو قليلة.
عدى شهرين وأسبوعين، ومفضلش على الفرح غير أسبوع واحد!
كنت طايرة من الفرحة، وبدأت أجهز نفسي، ولميت بنات العيلة في قاعة خاصة VIP، وهو اللي أصر يأجرهالي ويقولي:
– اعملي كل اللي نفسك فيه، ده يومك وإنتِ تستاهلي تفرحي.
وعملنا سهرات واحتفالات، وكل يوم الفرحة كانت بتزيد.
لحد ما جه اليوم التالت…
كنت قاعدة وسط البنات، وبنت خالتي جنبي، وفجأة لقيت رسالة منه على الواتساب.
فتحته وأنا مبتسمة، لكن أول ما قريت كلامه حسيت إن قلبي وقع في رجلي.
كان كاتب:
«يا سارة، أنا مكنتش متوقعك كده!»
اتخضيت ورديت عليه:
– إيه؟ في إيه؟ أنا عملت إيه؟
رد عليا بكلمتين خلوا الدنيا تلف بيا:
«اللي بينا انتهى».
فضلت باصة للتليفون مش مستوعبة، وبنت خالتي جنبي بتسألني:
– مالك يا سارة؟ حصل إيه؟ وشك اتغير ليه؟
قولتلها وأنا بحاول أتماسك:
– مفيش، مجرد سوء تفاهم.
لكن دموعي نزلت غصب عني، وكنت عاملة مكياج ومش عارفة حتى أمسح دموعي من غير ما أبوزه.
بعدها بعتلي رسالة تانية:
«انزلي تحت، أنا مستنيكي على السلم».
قمت بسرعة، وأنا مش قادرة أستوعب اللي بيحصل، ونزلتله وأنا لابسة قفطان قصير، وإيدي بتترعش والتليفون بيقع مني من كتر التوتر.
أول ما شافني بصلي بنظرة عمري ما شوفتها في عينه قبل كده.
قولتله بصوت مبحوح:
– في إيه؟ إيه اللي حصل؟ أنا عملت إيه عشان تعمل فيا كده؟
بصلي وسكت شوية، وبعدين قال كلام خلاني أتمنى الأرض تنشق وتبلعني…
#حكاوي_شيمو
يتبع…
مين عايزة تكملها لايك وصلى الله على نبينا محمد فى التعليقات وهرد بالتكملة
الجزء الثاني
بصلي وقال بصوت كله غضب:
– إنتِ فاكرة إني ممكن أكمل معاكي بعد اللي شوفته؟ إنتِ فاكرة إني هتجوز واحدة بتضحك عليا بالشكل ده؟
حسيت إني مش فاهمة حاجة، وقلتله وأنا بعيط:
– أضحك عليك في إيه؟ والله أنا مش فاهمة إنت بتتكلم عن إيه!
طلع تليفونه وفتحلي صور ومحادثات، وقال:
– شوفي بنفسك، دي صورك وإنتِ بتتكلمي عني مع الناس، وبتقولي إني غير مدرك وإنك مش مقتنعة بيا، وإنك مستنية الفرح عشان تضمني مستقبلك!
مسكت التليفون وإيدي بتترعش، وأول ما شفت الصور اتصدمت!
قولتله وأنا منهارة:
– طب اسمعني، أنا بحبك، وإنت عارف إني عمري ما قللت منك ولا اتكلمت عليك وحش، إزاي تصدق كلام حد وتكذبني أنا؟
سابني ومشي، وفضلت واقفة مكاني مش قادرة أتحرك.
طلعت القاعة وأنا بعيط، وأول واحدة قابلتني كانت بنت خالتي.
جريت عليا وقالت:
– مالك يا سارة؟ هو حصل إيه؟
بصتلها وقلت:
– إنتِ عملتي إيه فيا؟
وشها اتغير، وقالت:
– أنا؟ عملت إيه بس؟ إنتِ بتقولي إيه؟
قولتلها:
– هو قالّي إنك بعتيله كلام وصور مفبركة عني!
لقيتها فجأة اتعصبت وقالت:
– أيوه، وأنا لو عملت كده أبقى بعمل الصح! إنتِ مش شايفة نفسك؟ من ساعة ما اتخطبتي وإنتِ مش شايفة حد، وكل حاجة عندك فلوس وهدايا وفرح وقاعات!
وقفت مذهولة من كلامها.
قالتلي وهي بتعيط:
– أنا كمان كان نفسي أفرح، وكان نفسي أتجوز قبلك، لكن إنتِ كل حاجة بتيجي لك بسهولة!
ساعتها فهمت إن الموضوع مش مجرد سوء تفاهم، دي كانت غيرانة مني لدرجة إنها مستعدة تأذي بيتي قبل ما يتبني!
لكن المفاجأة الأكبر كانت لما ماما دخلت علينا، وشافت بنت خالتي واقفة قدامي، وقالت لها جملة خلتها تسكت تمامًا:
– إنتِ نسيتي إن إحنا عارفين حكايتك القديمة، ولا فاكرة إن محدش هيقدر يثبت اللي عملتيه؟
بنت خالتي وشها اصفر، وأنا بصيت لماما بصدمة وسألتها:
– حكاية إيه يا ماما؟ وإنتِ تعرفي عنها إيه؟
ماما بصتلي وقالت:
– تعالي يا بنتي، لازم تعرفي الحقيقة كلها، لأن اللي حصل معاكي مش أول مرة تعمله…
يتبع في الجزء الأخير
يا ترى إيه السر اللي ماما مخبياه؟ وهل سارة هتلحق تنقذ جوازها قبل الفرح بأسبوع؟
