من اليوم ده قررت أغير طريقتي مع يسرا، بدل ما أدخل معاها في خناقات وأرد على كل كلمة، بقيت أتعامل معاها بمنتهى الهدوء، وأسيبها تعمل اللي هي عايزاه. بقت تطلب مني حاجات وأنا أنفذ من غير نقاش، وتطلب مني أجهز الأكل اللي حسن بيحبه، وأرتب لها أوضتها، وأغسل هدوم ولادها، وكنت بعمل كل ده وأنا ساكتة.
وكل ما حسن يشوفني هادية يقول:
\- أهو كده يا سعاد، أنا كنت عارف إنك عاقلة وهتفهمي إن وجود يسرا في البيت مش هيضايقك. كنت أبتسم وأرد:
\- طبعًا يا حسن، دي مراتك وليها حق تعيش مرتاحة، وأنا مش هقف في طريق سعادتك.
ويسرا كانت بتسمع الكلام وتفرح، لدرجة إنها بدأت تتعامل معايا كأني واحدة من الخدم عندها. في يوم دخلت المطبخ وقالت:
\- سعاد، أنا عايزة أعمل عزومة لصاحباتي بكرة، وهحتاجك تجهزي أكل كتير، ونظفي الصالة كويس، وخلي بالك من الحمام اللي فوق، عشان أنا هقعد معاهم هناك. بصيتلها وقلت:
\- من عيني يا يسرا. ضحكت وقالت:
\- بصراحة أنا كنت خايفة إن وجودي هنا يعمل مشاكل، بس الحمد لله حسن عرف يتصرف، وإنتِ كمان طلعتي أهدى مما كنت متوقعة. ابتسمت وقلت:
\- ربنا يديم الهدوء. ومن يومها بقت تتصرف كأن البيت ملكها، تنقل العفش من مكانه، وتغير ترتيب الأوض، وتختار الأكل اللي يتعمل، وحتى لما كانت صاحباتها بييجوا كانت بتعرفهم على البيت وتقولهم:
\- إحنا أخيرًا استقرينا هنا، وحسن موفرلنا كل حاجة. كنت بسمع وأسكت، لحد ما في يوم دخلت عليا الأوضة وقالت:
\- سعاد، أنا عايزاكي تنقلي حاجتك من الدولاب الكبير، عشان محتاجة مساحة لفساتيني. بصيتلها وقلت:
\- حاضر. اتصدمت من هدوئي وقالت:
* بجد؟ يعني مش هتزعلي؟* أزعل ليه؟ إنتِ أدرى باحتياجاتك.
خرجت وهي مبتسمة، وأنا استنيت لحد ما الباب اتقفل، وبعدها طلعت تليفوني واتصلت بمحامي كنت أخدت رقمه من واحدة صاحبتي. كنت محتاجة أعرف حقوقي القانونية، خصوصًا إن حسن كان فاكر إن مجرد إنه يرفض يطلقني يبقى يقدر يعلقني العمر كله.
رحت للمحامي وحكيتله كل حاجة، من يوم ما جاب يسرا البيت وأجبرني أقبل جوازه منها، لحد تهديده إنه مش هيطلقني ولا هيصرف عليا لو مشيت. سمعني للآخر، وبعدها قال:
\- بصي يا مدام سعاد، أول حاجة لازم تعرفيها إن جوزك مش من حقه يجبرك تعيشي في وضع إنتِ رافضاه، ورفضه للطلاق مش معناه إنك ملهاش طريق قانوني.
عني أقدر أخلص من الجوازة دي؟* تقدري ترفعي دعوى طلاق للضرر لو عندك ما يثبت الضرر، وهنشوف كمان حقوقك المالية والزوجية حسب ظروفك والمستندات الموجودة. خرجت من عنده وأنا حاسة إن فيه باب اتفتح قدامي بعد ما كنت فاكرة إني محبوسة في حياتي دي للأبد.
بدأت أجمع أوراقي بهدوء، وأحتفظ بكل الرسائل اللي حسن كان بيهددني فيها، وأوثق أي تصرفات أو مواقف تثبت الضرر اللي بتعرضله. وفي الوقت نفسه، كنت برجع البيت وأتعامل مع يسرا بمنتهى الهدوء. لدرجة إنها في يوم كانت قاعدة مع حسن وقالتله:
\- تعرف يا حسن؟
أنا حاسة إن سعاد أخيرًا فهمت إن الوضع اتغير، وبقت عارفة إن البيت ده ليه نظام جديد. حسن ضحك وقال:
\- ما هي لو كانت سمعت الكلام من الأول كانت ريحت نفسها وريحتنا. ردت عليه وهي بتبصلي:
\- أصل الست لازم تعرف إمتى تتنازل، مش كل واحدة فاكرة إن جوزها ملكها لوحدها.
رفعت عيني من الطبق وقلت:
\- عندك حق يا يسرا، الست لازم تعرف إمتى تتنازل، وإمتى تطالب بحقها. بصتلي باستغراب، لكني كملت أكلي عادي. وبعد أسبوع، كنت واقفة قدام المحامي وبمضي على أوراق رفع الدعوى. سألني:
* متأكدة إنك عايزة تكملي؟ قلتله من غير تردد:
* أنا استحملت كتير، ومش هرجع في قراري.
وبالفعل بدأت إجراءات القضية. أما في البيت، فحسن ويسرا كانوا عايشين حياتهم، بيخرجوا سوا، ويشتروا حاجات جديدة، ويسرا بقت تتكلم عن تغيير غرفة النوم، وحتى بدأت تختار ستاير جديدة للصالة. وفي يوم رجعت من الشغل لقيتها واقفة بتقيس مساحة الصالة، فسألتها:
* بتعملي إيه؟ قالت بمنتهى الثقة:
* هغير شكل البيت يا سعاد، حاسة إنه محتاج يتجدد، وبعدين أنا وحسن لازم نعيش في مكان يليق بينا وبالولاد. ابتسمت وقلت:
\- ربنا يهنيكم. قالت وهي بتضحك:
\- إنتِ غريبة أوي، بقيتي مش فارق معاكي أي حاجة!
بصيتلها وقلت:
\- أصل كل حاجة وليها وقتها يا يسرا. عدت الأيام، لحد ما في صباح يوم كنت قاعدة في الصالة، وسمعت صوت جرس الباب. فتحت، لقيت المحضر واقف ومعاه إعلان قضائي باسم حسن. استلم الورق، وبعد ما مشي، خرج حسن من أوضته وسألني:
\- مين كان على الباب؟قلتله بهدوء:
\- محضر.* محضر؟ وعايز إيه؟* جابلك إعلان من المحكمة. خطف الورق من إيدي وفتحه، وأول ما قرأ اسمي وعرف إن فيه دعوى طلاق للضرر مرفوعة ضده، وشه اتغير. رفع عينه وبصلي بصدمة:
