وقفت ورا الحيطة، حابسة أنفاسي بإيديا الاتنين عشان صوت شهقاتي ما يفضحنيش. وكل تفصيلة سمعتها كانت بتضرب في عقلي. جوازي؟ بيتي؟ شقايا؟ جهازي اللي أبويا طلع عينه عشان يجيبهولي؟ كل ده كان مرسوم له يضيع بمؤامرة رخيصة عشان ريهام تاخد كل حاجة على الجاهز، وطارق جوزي اللي ائتمنته على اسمي وعمري، مطلعش بس ضعيف ده طلع شريك في المخطط!
سمعت خطوات طارق بتقرب من أوضة النوم، وصوت الكيس البلاستيك اللي في إيده بيخروش.
فتحت كاميرا تليفوني وبدأت أسجل فيديو وصوت، وقربت الكاميرا بحذر شديد من فتحة الباب الموارب.
ريهام كانت لسه واقفة قدام المراية، لفت وشها لطارق بدلع وقالت:
اتأخرت ليه يا بيبي؟ جبت اللي قولتلك عليه؟
طارق طلع من الكيس علبة دوا وورقة مطبقة، وقال بنبرة مهزوزة باين فيها الخوف:
ريهام أنا مش مطمن. المنوم ده لو زودتي منه نقطتين ممكن تروح فيها، والورقة دي تنازل عن القايمة والمؤخر، إنتِ فاكرة منال غبية عشان تمضي عليها بمنتهى السهولة كده؟!
ريهام ضحكت ببرود وقالت:
ما تبقاش خيخة بقى زي ما مامتك بتقول عليك! هتحط لها النقط في العصير، ولما تدوخ ومش هتبقى حاسة بحاجة، هنبصمها على الورقة بهدوء. وتاني يوم تبدأ الحفلة خناقة صغيرة، تخرج من هنا بهدومها، ونرمي لها ورقة طلاقها على بيت أبوها من غير ولا مليم! والشقة دي بجهازها وعفشها هتبقى بتاعتي أنا وإنت ولا مش عايز تتجوزني ونعيش هنا ملوك؟!
طارق بلع ريقه بتردد، وقال:
أمي قالت لك إنها مجهزة المأذون لأول ما نخلص من منال؟
طبعاً يا حبيبي، خالتو نفسها في اليوم ده أكتر مني ومنك!
في اللحظة دي، حسيت إن البرود اللي في عروقي اتحول لنار.
ما بقاش فيه خوف، ولا صدمة، حل محلهم غضب وعي رهيب بالخطورة اللي أنا فيها.
عملت إيقاف للفيديو فوراً، وسيفته.
وبحركة سريعة وبدون تردد، بعتت الفيديو على واتساب لبابا، ولأخواتي الاتنين، وحطيته على جروب العيلة الكبير اللي فيه أعمام طارق وخيلانه وحماتي نفسها وكتبت معاه جملة واحدة:
“ده المخطط اللي كان معمول لبنتكم في بيت جوزها أنا في خطر ومستنياكم.”
وفجأة وأنا برجع خطوة لورا عشان أخرج بره الشقة أستناهم في الشارع، كعب شوزي خبط في فازة صغيرة كانت محطوطة على طربيزة المدخل.
الفازة اتهزت ووقعت على الأرض، وطلعت صوت عالي كسر هدوء البيت!
الصوت جوة الأوضة انقطع فجأة.
ثانية واحدة وباب الأوضة اتفتح على آخره.
خرج طارق ووراه ريهام، وشافوا منال واقفة قدامهم، ماسكة الموبايل في إيدها، وعينيها بتطق شرار.
طارق وشه بهت واتحول للون الكفن، ورجع خطوة لورا برعب:
م… منال؟! إنتِ هنا من إمتى؟!
ريهام ملامحها اتغيرت من الصدمة لغضب، وبصت للتليفون اللي في إيدي وقالت بصوت حاد:
سمعتي إيه يا حلوة؟!
بصيت لهم بقوة، ورفعت راسي وقولت بصوت زلزل أركان الشقة:
سمعت كل كلمة وسجلت كل نفس، وعرفت إن جوزي وأمه مش أكتر من عصابة، وبنت خالتك مش أكتر من حد جاي يسرق راجل وشقة مش بتوعه!
طارق صرخ برعب:
سجلتي؟! هاتي الزفت ده هنا!
اندفع طارق عليا وهو بيحاول يشد التليفون من إيدي، بس أنا كنت أسرع زقيته بكل قوتي خبط في الحيطة، وفي نفس اللحظة ريهام هجمت عشان تشد شعري وتاخد الموبايل، وصوتها بيعلى:
مش هتخرجي من هنا من غير التليفون ده! طارق اقفل باب الشقة بالمفتاح متخليهاش تطلع!!
جري طارق على الباب عشان يقفله، وأنا اتعاركت مع ريهام مسكت دراعها ولويته ورميتها على الكنبة، وصريت في طارق:
اقفل الباب يا طارق، اقفله كويس عشان لما البوليس وأهلي يكسروه فوق دماغكم، تلبسوا قضية شروع وتعدي واحتجاز مع قضية التزوير والنصب!
طارق اتجمد وإيده على الأكرة، وبصلي بذهول:
بوليس؟! أهلك؟!
ابتسمت بسخرية، ورفعت الموبايل قدام وشه:
الفيديو اتبعت لبابا وأخواتي، ولجروب العيلة كله من دقيقة كاملة، زمان مامتك دلوقتي بتشوف الفيديو، وزمان أعمامك عرفوا فضيحتكم!
ريهام قامت من على الكنبة، وشها احتقن بالدم وصرفت في طارق:
كدابة! بتخوفك عشان تسيبها تمشي! امسكها يا غبي!
وقبل ما طارق يمد إيده أو ينطق بحرف:
رن جرس الباب بعنف، وراه صوت خبط قوي كان هيهد الباب من مكانه!
وصوت بابا وأخويا الكبير بيهز العمارة كلها:
افتح يا طارق! افتح بدل ما أكسر الباب على دماغك ودماغ اللي معاك!!
طارق ركبه سابت ووقع على الأرض، وشه كان ميت تماماً.
وريهام عينيها وسعت برعب حقيقي، وبدأت تبص حواليها كأنها بتدور على مكان تستخبى فيه، خصوصاً وهي لسه لابسة الروب بتاعي وشكلها يفضح كل حاجة.
مشيت بكل ثقة ناحية الباب، وطارق بيزحف على الأرض وبيترجاني بدموع:
منال أبوس إيدك بلاش فضايح، هنحل الموضوع ودي والله أمي وريهام هما اللي ضغطوا عليا!
بصيتله باحتقار، وقولتله:
إنت خلاص مبقتش موجود في حياتي، إنت دلوقتي في إيد القانون وإيد الرجالة اللي بجد.
فتحت الباب.
دخل بابا وإخواتي الاتنين، وكان معاهم اتنين أمناء شرطة من النجدة اللي كان بابا مكلمهم في طريقه أول ما شاف الفيديو.
الصالة في ثواني اتحولت لساحة حساب.
ريهام أول ما شافت البوليس حاولت تجري على الأوضة، بس أخويا قفل السكة في وشها، والظابط لما دخل وشاف علبة المنوم والورقة البيضا المطوية والمقص على السرير، أثبت كل ده في محضر رسمي بتهمة التهديد والنصب ومحاولة الإضرار.
وفي وسط الهيصة دي، تليفون طارق كان بيرن باستمرار؛ كانت مامته، وصوتها طالع من السماعة بتصرخ بعد ما شافت الفيديو، وأعمام طارق اتصلوا بيها بهدلوها وأعلنوا تبرؤهم من اللي طارق وأمه عملوه.
بصيت لطارق وهو متكلبش في إيد أمين الشرطة، مذلول وراسه في الأرض، وريهام جنبه بتعيط وتتبرأ من الاتفاق.
أخدت شنطة هدومي، ودهبي، وكل ورقة تخص حقوقي وجهازي بالقانون وبمحضر إثبات حالة رسمي في وجود الشرطة.
وقبل ما أخرج من عتبة الباب، وقفت والتفت ليهم للمرة الأخيرة.
بصيت للشقة، وبصيت للشخص اللي اخترته، وبصيت لريهام.
وقولت لطارق بهدوء:
ورقة طلاقي توصلي لبيت أبويا بكرة الصبح بكامل حقوقي، والشقة دي؟ اشبعوا بيها، بيت مبني على الحرام والغدر ميعمرش.
نزلت السلم وإيدي في إيد بابا، راسي مرفوعة.
كنت موجوعة؟ أكيد قلبي كان مكسور، بس كرامتي كانت سليمة.
وفهمت إن ربنا أحياناً بيكشف لنا الناس بدري عشان ينقذنا من حفرة كان ممكن ندفن فيها باقي عمرنا وإحنا مغميين عينينا.
خرجت للشارع وأنا بتنفس هوا نضيف، وعارفة إن النهاية دي كانت في الحقيقة أعظم بداية لحياتي الحقيقية.
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة
