“اعملى اللى تقدری عليه.”
وفعلًا عملت الفول والبطاطس والجبنة.
وبمجرد ما حطيت الأكل…
سمعت الجرس.
فتحت…
لقيتهم قدامى.
سلفتى وحماتى والعيال.
المرة دى ما قدرت أُسكت.
بصيت لسلفتى وقلت:
“معلش يا حبيبتى… النهارده الأكل على قدنا.”
قالت وهى بتضحك:
“يا بنتى إحنا مش جايين ناكل، إحنا جايين نقعد معاكى.”
بصيت على عيالها وهم داخلين ناحية السفرة، وقلت:
“بس كل مرة بتقعدوا بتاكلوا.”
اتغير وشها وقالت:
“إنتِ بتعايرينى بالأكل؟!”
حماتى دخلت بسرعة:
“إنتِ إزاى تكلمى مرات ابنى كده؟!”
جوزى كان واقف ساكت.
وفجأة سلفتى قالت جملة خلتنى أبص لها باستغراب:
“ماشى… من النهارده مش هننزل عندك تانى.”
قلت لها: “يا ريت.”
سكتت ثوانى، وبعدين قربت منى وقالت بصوت واطى:
“بس قبل ما أقفل الباب… اسألى جوزك ليه أنا بنزل عندك كل يوم.”
بصيت لجوزى…
لقيت وشه اتغير.
واتوتر بشكل عمرى ما شفته عليه.
ساعتها قلبى وقع من مكانه.
بصيت لسلفتى وقلت:
“يعنى إيه؟!”
ابتسمت ابتسامة غريبة وقالت:
“هو ما قالكيش؟”
وسابتنى ومشيت…
وأنا فضلت واقفة أبص لجوزى، وهو ساكت ومش قادر يرفع عينه في عينى.
يا ترى إيه اللى جوزى مخبيه عنى؟ وليه سلفتى كانت مصممة تنزل عندى كل يوم؟
اللى عرفته بعدها خلاني أندم إنى فتحت لها باب بيتى من الأساس…
مسكت إيد ولادى الاثنين وضمتهم لحضنى وأنا جسمي بيترعش من الصدمة، عينى مانزلتش من على وش جوزى اللى كان واقف في نص الصالة، عرقان ووشه أصفر زي الليمونة، مش قادر يرفع عينه في عينى، ويديه كانت بترتعش بشكل غريب أول مرة أشوفه عليه.
قربت الباب في وشها بالبطيء وأنا حاسة إن الهوا اتسحب من الأوضة، ودخلت وقفت قدامه. بصيت له وقلت له ونبرة صوتى مخنوقة بالدموع:
“يعنى إيه الكلام ده يا إبراهيم؟ هى تقصد إيه؟ رد عليا ماتسكتش.. أنت مخبي عليا إيه من ورايا؟”
إبراهيم بصل للعيال وقال بصوت واطى ومكسور:
“دخلى العيال جوه يا أم سيف.. العيال مالهاش ذنب تسمع الكلام ده.”
أخدت العيال وطمنتهم ودخلتهم أوضتهم وقفلت الباب، وخرجت له وأنا قلبى بيدهس في صدرى من كثر الخوف والشك، الأفكار السودا كانت بتأكل في عقلى: هل بيخوننى مع سلفتى؟ هل بياخد منها فلوس؟ هل في سر بينه وبين أخوه؟
وقفت قدامه وربعت إيدى وقلت له بصوت حاسم:
“العيال جوه.. اتكلم بقى، ورب العزة لو ما نطقت بالحقيقة النهارده لألم هدومى وآخد ولادى وأمشى من البيت ده وما تشوفش وشي تانى.”
إبراهيم اتنهد تنهيدة طويلة ومسح وشه بإيديه الاثنين، ولقيت دمعة نزلت من عينه.. دمعة راجل حيلته قليلة ومش قادر يدارى كسرتها. قعد على الكنبة وحط رأسه بين إيديه وقال:
“أنا مظلوم يا أم سيف.. والله العظيم أنا ما عملت حاجة تعيبك أو تعيب بيتى، بس أنا اللى استحملت وسكت عشان خاطرك وعشان خاطر عيالى.”
قلت له وأنا بقرب منه وبصرخ بالراحة:
“ما تلفش وتدور عليا! فهميني الست دي كانت بينزل عندها كل يوم ليه؟! وليه هى بتقول لى اسألى جوزك؟!”
رفع رأسه وبص لى بكسرة وقال:
“من أربع شهور.. أخويا الكبير (جوزها) جالى الورشة، وقالى يا إبراهيم أنا عارف إن ظروفك صعبة والعملية مريحة معاك، وأنا عندى محلات وبكسب كويس، وأنا عايز أساعدك من غير ما أجرح كرامتك.. قلت له كتر خيرك يا أخويا بس أنا مستورة والحمد لله، قال لي لا.. أنا هبعت لك مع مراتى كل يوم أو كل كام يوم مبلغ بسيط أو بضاعة للمطبخ، أو هى تنزل تديك قرشين من غير ما حد يعرف عشان كرامتك قدام عيالك.”
أنا اتسمرت مكانى وبصيت له باستغراب:
“طب وده علاقته إيه بإنها تنزل تاكل أكلنا وتعايرنا؟!”
رد إبراهيم والدموع في عينه:
“ما هو ده اللى أنا اكتشفته بعدين يا أم سيف! أخويا كان بيديها هى الفلوس ويقول لها: ‘انزلى لإبراهيم ومراته وسيبيلهم الفلوس دي أو هاتى لهم أكل معاكى وأنتِ نازلة’.. بس هى كانت بتاخد الفلوس في جيبها! وتحطها لحسابها الشخصى، وتنزل عندنا حاف، تأكل هى وعيالها من قوت ولادنا، ولما أخوها يسألها فوق: ‘عملتِ إيه؟’ تقول له: ‘أنا نزلت وأديتهم الفلوس وقعدت أكلت معاهم عشان ما أحسسهمش بفرق!’.”
بقيت واقفة مش مصدقة اللى بسمعه.. عقلى مش قادر يستوعب كمية الغل والسواد اللى في قلب الست دى!
كمل إبراهيم وهو بيبكى:
“من أسبوعين، أخويا قابلنى في الشارع وحط إيده في جيبه وطلع لى ورقة وقال لى: ‘يا إبراهيم.. الفلوس اللى كنت ببعتها لك مع مراتى كل يوم، أنا كنت بكتبها عندى عشان لما ربنا يفتحها عليك نبقى نتتحاسب، أو يعتبروا دين عليك!’.. أنا اتصدمت! قلت له فلوس إيه يا أخويا؟! مراتك عمرها ما دخلت علينا بجنيه واحد ولا بكيس فاكهة! دى بتنزل تاكل لقمتنا ولقمة عيالى وتطلع! أخويا اتجنن وقال لى أنت بتتبلى على مراتي؟ دى بتقول لي إنها بتجيب لكم أكل وتديكم فلوس كل يوم!”
أنا حطيت إيدى على بقى من الصدمة وقلت له:
“وليه ما جيتش قلت لى يا إبراهيم؟! ليه سيبتنى أحس إن بيتى مكسور وأكل عيالى بيروح لغيرهم وأنت شايفها بتدخل تاكل وساكت؟!”
رد وقال بكل عجز:
“كنت خايف أقولك تخربى الدنيا وتعملى مشكلة بينى وبين أخويا! وأنا ماليش غيره.. كنت خايف الحقيقة لما تطلع أخويا يطلقها وبيتها يتخرب، أو يفتكر إننا طمعانين فيه وبنتبلى عليها! وهي كانت عارفة إن أخوها قال لى، وكانت بتنزل كل يوم تضغط عليا بنظراتها وتهددنى بوجود حماتى، عشان خايفة إني أواجه أخويا أو أفتح بوقى قدامك، وكانت فاكرة إنها بكده بتذلنى وتخلينى أسكت!”
وقف إبراهيم ومسك إيدى وهو بيبكى:
“هى كانت فاكراكى لما تضغطى عليا أنا هخاف وأسكت، بس لما أنتِ وقفتى في وشها النهارده وطردتيها، هى حبّت ترمى الشك في قلبك وتخليكى تفتكرى إن في بينى وبينها حاجة وحشة عشان تهد بيتنا بدال ما سرها يتكشف!”
دموعى نزلت، بس المرة دى مش قهرة من الفقر.. المرة دى كانت نار شاعلة في قلبى من الغدر والخيانة واللؤم. بصيت لإبراهيم وقلت له بصوت طالع من تحت الأرض:
“يعنى هى كانت بتاخد فلوس أكل ولادى في جيبها، وتنزل تاكل اللقمة الناشفة اللى فاضلة لعيالى وتعايرنى بها قدام أمك؟!.. بقى أنا ولادى يناموا جعانين وهى بتاخد الفلوس تشتري بها كيكة وجبن لعيالها وتمنعها عن ابنى؟!”
إبراهيم مسح دموعه وقال: “حقك عليا يا أم سيف.. أنا السبب إنى سكت من الأول.”
قلت له وأنا بنفض إيدى وبص بصة كلها غضب:
“لا يا إبراهيم.. السكوت خلاص انتهى. الست دى فاكرة إننا عشان فقراء هنوطى راسنا ونستحمل القهر. المرة دى أنا مش هسكت، والسر اللى هى خايفة منه ده.. أنا اللى هطلعه للنور وبنفسى!”
خرجت من المطبخ ورزعت باب الشقة ورايا، وطلعت السلم خطواتى كانت بتهز العمارة، وقفت قدام باب شتها ولطعت إيدى على الجرس وفضلت ضاغطة عليه بصلابة، وأنا حاسة إن حقى وحق ولادى لازم يرجع النهارده قبل بكرة…
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
