سلفتى وعيالها كل يوم تنزل تاكل أكل عيالى وتطلع وأنا عيالى بيصحوا جعانين ومش بلاقى اللقمة. أنا واحدة على قدى، جوزى أرزقى، يوم يشتغل ويوم لأ، ولو ربنا رزقه بـ300 جنيه في اليوم يرجع بيهم فرحان ويقول لى: “اعملى لنا أى حاجة يا أم العيال… المهم نكون راضيين.” وأنا والله كنت برضى باللى ربنا يكتبه لنا. عندى ولدين، ومصاريفهم كتير، والأكل اللى بعمله بيكون محسوب بالواحدة.
لكن سلفتى كانت شايفة الموضوع بشكل تانى خالص…
كل يوم تقريبًا، قبل ما جوزى يرجع من شغله بساعتين، ألاقى جرس الباب بيرن.
أفتح ألاقيها هى وعيالها التلاتة.
وأقول لها: “أهلاً يا حبيبتى، اتفضلى.”
فتدخل بمنتهى العادية، تقعد وتفتح كلام، والساعة تعدى… لحد ما جوزى يرجع.
والغريب إن أول ما ميعاد العشا يقرب، ألاقيها بتقول:
“يلا يا ولاد، اغسلوا إيديكم.”
في الأول كنت بقول لنفسى: يمكن مكسوفة تقول إنها عايزة تاكل.
فكنت أزود حبة رز، أو أعمل مكرونة، أو أمد إيدى على اللى موجود.
لكن الموضوع بقى يومى!
لدرجة إنى بقيت وأنا بطبخ أحسب حسابها هى وعيالها غصب عنى.
ومشكلتى إن بيتنا على قدنا جدًا.
جوزى مش موظف بمرتب ثابت، ده بيطلع الصبح يدور على رزقه، ويرجع باللى ربنا كتبه له.
وفى يوم رجع لى بـ100 جنيه بس.
حطهم في إيدى وقال:
“دبريهم يا أم العيال لحد بكرة.”
اشتريت فول وطعمية، وحمرت شوية بطاطس، وكان عندى حتة جبنة قديمة عملتها بالطحينة، وحطيت خيار وطماطم.
وقلت الحمد لله… ربنا يبارك في القليل.
ما لحقتش أحط الأكل على السفرة، إلا وسمعت جرس الباب.
فتحت…
لقيت سلفتى وعيالها.
ومش بس كده…
كانت جايبة حماتى معاها!
حماتى أصلًا مبتنزلش عند حد، وبتحب تقعد لوحدها، فاستغربت جدًا.
قلت: “أهلاً يا ماما، اتفضلى.”
دخلوا وقعدوا.
وبمجرد ما الأكل اتحط، عيالها هجموا عليه.
وأنا كنت ببص على طبق الفول وبقول في سرى:
“يا رب يكفينا.”
وفجأة سلفتى بصت للأكل وقالت وهى بتضحك:
“إيه ده؟ فول وطعمية؟ ده أكل الناس الجعانة!”
ضحكت هى وحماتى…
لكن أنا والله الكلمة دخلت في قلبى زي السكينة.
بصيت على جوزى، لقيته ساكت ووشه اتغير.
وبعد شوية قال لها:
“يا أختى، دى أكلتنا… واللى ربنا بيرزقنا بيه بناكله.”
ردت وهى بتضحك:
“يا راجل بهزر!”
لكن أنا كنت خلاص مش قادرة.
خصوصًا إنى كنت عارفة إن ولادى ممكن يصحوا بالليل يقولوا:
“ماما إحنا جعانين.”
وأنا مش هيبقى عندى حتى باقى أكل أحطه لهم.
وفوق كل ده، سلفتى نفسها جوزها عنده كذا محل، وحالتهم المادية كويسة جدًا.
والأغرب إنها كانت دايمًا تحكى لى:
“أنا بقى بحب أدلع جوزى… لازم أعمل له كل يوم أكلة حلوة، وأعمل له حلويات.”
وأنا كنت أسمع وأسكت.
لحد ما حصل موقف خلancى أفقد أعصابى تقريبًا.
كنت عاملة يومها 3 أوراك فراخ، وصينية بطاطس ورز بالشعرية.
وكانت سلفتى مش موجودة.
فقلت أخيرًا:
“الحمد لله… النهارده هنتغدى ونشبع.”
غرفت الأكل، ولسه هاقعد مع جوزى والعيال…
جرس الباب رن.
فتحت…
هى وعيالها!
دخلت ولا كأن في حاجة.
وقبل حتى ما أقول لها اتفضلى، لقيتها راحت واخدة ورك فراخ من الصينية!
وقالت: “يا سلام! ريحة الأكل جابتنى.”
أنا اتجمدت مكانى.
ما عرفت حتى أقول لها “لا”.
قسمت الباقى بينى وبين جوزى وولادى، وقعدت طول الأكل وأنا قلبى بيتقطع.
ومن يومها وأنا كل ما أعمل أكل، أفضل مرعوبة من الجرس.
لكن المصيبة الأكبر كانت لما بدأت تدخل حماتى معاها.
وفى يوم، بعد ما خلصوا أكل، سلفتى قامت وقالت:
“بصى يا حماتى، هى بتعمل لنا أكل بسيط كده ونقعد ناكل عندها.”
حماتى ضحكت وقالت:
“ما هى مرات ابنى… يعنى مش غريبة.”
بصيت لهم وسكت.
دخلت المطبخ ودموعى نزلت.
مش عشان الأكل…
عشان حسيت إن بيتى بقى مكشوف.
بقيت مش عارفة أعيش مع جوزى ولا أربى عيالى ولا حتى أحوش لقمة لبكرة.
وفى مرة ابنى شاف عندها كيكة كانت عاملاها وقال لها:
“عمتى ممكن حتة؟ نفسى في كيكة.”
بصت له وقالت:
“معلش يا حبيبي، دى لجوزى.”
وسكتت.
ابنى رجع لى زعلان وقال:
“ماما… هى ليه مش بتديني زي ما إحنا بنديهم؟”
السؤال ده كسرني.
ومن يومها بدأت أفكر:
هو أنا لازم أكره بيتى عشان أرضيهم؟
هو الفقر بقى عيب؟
هو لما نأكل فول نبقى أقل من غيرنا؟
لحد امبارح…
جوزى رجع بـ100 جنيه.
حطهم في إيدى وقال:
“ده اللى ربنا رزقنى بيه النهارده.”
بصيت للفلوس، وبصيت لولادى، وقلت له:
“خلاص… النهارده مش هقدر أعمل أكتر من كده.”
قال لى:
