وقف التوأمان أمام قبر والدهما بعيون باكية وقلب مجروح من ألم الفراق… تذكرا زيارتهما الأخيرة لقبر والدهما قبل وفاة أمهما بأسبوع.. تذكرا دموع والدتهما وهي تودع القبر بقلب منقطر من شدة ألم الفراق وكلماتها الأخيرة وهي تلتقط أنفاسها قائلة: “متزعلوش.. أنا راجعه لحبيبي”. تذكرا كيف أمضيا لياليهما يحادثان صورة والدهما بشوق..
تمسكت حنين بيد عز وشهقت ببكاء ليضغط عز علي يدها وكأنه يقول لها: “أنا بجانبك.. اصمدي”.
لم يستطع عز السيطرة علي دموعه وتركها تهبط في صمت.. أمامه صور مشتتة لذكريات عابرة في طفولته عاشها مع أبيه..
تنهد عز بقوة وقال لنفسه: “ارتاح يا بابا.. حقك هيرجعك أنت و أمي.. حقكوا هيرجع”.
أمضي التوأمان النهار بأكمله أمام قبر والدهما متمنين له الرحمة و أن يعينهم الله في أن يظهروا الحقيقة.
—
علي موعد العشاء.. هبطت غادة إلي حجرة الطعام لتجد العائلة مجتمعة عدا سناء و عامر و أدهم… ألقت نظرة غضب ناحية عز عندما وجدته يضحك مع ماهر ليبادلها عز نظرة قوة وتحدي.. بينما حنين منشغلة بالحديث مع صديقتها الوحيدة “سمر” علي الواتساب.. فاقت حنين من شرودها مع صديقتها علي صوت جهاد تقول بفزع: حنين.. حنين ألحقي ألحقي!
حنين بخضة: ها.. ها.. في إي؟!
جهاد بمرح: لا مفيش.. كنت بجرب اسمك بس.
أمسكت حنين بسكينة الطعام وقالت: طب أقتلك يعني ولا أعملك إي؟!
رقية: مفروض تتعودي يا بنتي.. أنت هتشوفي من دا كتير.
أمجد: معلش يا حنين.. أختي طفلة لسه.
جهاد بثقة: طفلة و أفتخر يا هندسة.
غادة بضيق: أومال سناء فين يا ماهر؟!
التفت ماهر لها وهو يمسح دموعه من الضحك وقال: مع عمو عامر.. ونازلين أهو.
ارتفع صوت رنين أحد الهواتف بنغمة هادئة ليلتقط عز هاتفه من أمامه وترتسم ابتسامة سعادة علي وجهه…
رد عز علي المكالمة وقال بسعادة: عمو جميل.. بص قبل أي حاجه وحشتني جدًا جدًا جدًا.
—
وصلت قوات الشرطة العمارة المجهورة وبدأت في نشر قواتها بمهارة تقضي علي العناصر الموجودة في المبني.. خرج من سيارته بعد السماح له وصعد المبني خلف رجال الأمن.. انقبض قلبه مرة واحدة وسمع صوت صراخ أخته.. انتفض من مكانه وتبع مصدر الصوت.. لم يبالي لصيحات رجال الشرطة أن الطابق العلوي غير مؤمن، ولكنه حمل حديدة من علي الأرض وركض إلي الطابق العلوي يضرب من يراه أمامه وخلفه ابن عمه يقضي علي من باقي.. كانت عيونهم تشع غضب وخوف إلي أن وصل عز إلي الحجرة المغلقة وسمع الصيحات تزيد.. خبط عز الحديدة بكل قوته في الباب ليتحطم الباب..
انتفض هاني من مكانه عندما سمع حطام الباب.. اتجه له عز وسدد له الضربات واحدة تلو الأخري بكل قوته..
هرول عز إلي حنين المنكمشة علي الأرض وأحاطها بذراعيه ليخفيها في أحضانه وهو يقبل رأسها قائلًا: متخافيش.. متخافيش.
حاول هاني القيام ولكنه فؤجئ بدفاعات من الضربات القوية تتسدد من أدهم وهو يصيح فيه بكل قوته..
خلص رجال الشرطة هاني من بين يدي أدهم بأعجوبة ليلتفت أدهم إلي حنين المختفية في أحضان عز..
عز بخوف: عمل فيكي حاجه؟
حركت حنين رأسها بمعني “لا” ولكن زاد صوت بكائها..
ضمها عز أكثر إلي أحضانه وقَبَّل رأسها لتقول حنين بصوت مرتعش: أنا بردانة أوي يا عز.
خلع عز التيشيرت بسرعة وألبسها لأخته ولكنه تفاجأ من أن شعرها لا يغطيه إلا قطعة ممزقة من الخمار..
سمع عز صوت أدهم يقول: أنا بره لحد ما تجهزوا.. و اتفضل دا ممكن يفيدك.
نظر عز بجواره ليجد أدهم قد خلع السويت شيرت الخاص به ليلبسه عز لأخته ويداري شعرها بالكاب ويحملها بين يديه خارجًا من الغرفة ليجد أدهم في انتظاره مع باقي رجال الشرطة..
الضابط: برده مصممين علي اللي في دماغكوا؟
عز: ساعة أو اتنين مش هتفرق يا باشا وهتلاقيهم قدامك.
الضابط: ماشي.
استقل أدهم سيارته و حنين بين أحضان عز في المقعد الخلفي.. بعد ربع ساعة سادها الصمت.. ارتفاع صوت هاتف أدهم معلنًا وصول رسالة.. ليلفت أدهم إلي عز ويقول: حصل.
عز بتنهيدة: طب معلش.. أطلع بينا علي أي محل ملابس حريمي بسرعة.
أدهم: حاضر.
بعد ما يقارب الثلث ساعة.. وقفت سيارة أدهم أمام أحد محلات الملابس النسائية… لم يقدر عز علي ترك حنين بحالتها تلك ولا يقدر علي أن يدخلها المحل هكذا ليقول أدهم: أنا هنزل أجيب.
بعد ما يقارب الخمس دقائق.. عاد أدهم إلي السيارة ومعه حقيبة ملابس.. وقاد سيارته إلي أن وصلوا لاستراحة علي الطريق شبه خاوية.. ليحمل عز حنين إلي حمام السيدات ويعطيها الحقيبة ويقول: غيري بسرعة يا حنين ومتخافيش.. أنا واقف بره أهو.
حنين بصوت مرتعش: هيجوا ياخدوني!
عز: محدش يقدر.. أنا معاكي متخافيش.. يلا بسرعة.
دخلت حنين إلي الحمام بخوف وأبدلت ملابسها سريعًا وهي تلتفت حولها بخوف…
بعد خمس دقائق.. خرجت حنين من الحمام وأمسكت بيد عز واستقلوا سيارة أدهم…
بعد نصف ساعة.. في قصر آل توفيق..
دخلت حنين إلي بوابة القصر وهي مسندة علي عز.. ضغط أدهم علي الجرس لتفتح أحد الخدامات الباب وتصيح: حنين هانم!
تجمع الكل علي صرخة الخادمة وامتلأ بهو القصر بجميع أفراد عائلة آل توفيق عدا غادة…
تعجب الجميع من الحالة التي بها حنين ورفضها أن تسلم علي أي حد ورعشة جسدها إذا اقترب منها أحد غير عز..
عامر بقلق: في إي يا بني؟!
قبل أن يتكلم عز رأي غادة تهبط من علي درجات السلم بتعجب من رجوع حنين ليصيح بسخرية: أهلا أهلا غادة هانم.. والله كنت لسه هندهلك.
وقفت غادة بجانب سميرة وقالت: في إي؟!
دق الجرس مرة أخري ليقول عز: الحبايب وصلوا أهو.
فتح أدهم الباب ليدخل طارق ومعه أربعة رجال بيد كل رجل شخص مخفي الوجه بقناع أسود..
عامر بقلق: في إي يا عز.. ما تفهمنا؟!
أجلس عز حنين علي أحد الكراسي وأمسك بيدها وأشار لأحد الرجال بنزع الأقنعة.. أزال كل رجل القناع بالترتيب.. لتتسع عينا غادة دهشة وتتمتم بصوت منخفض: إسماعيل!
عامر: إي اللي خلاك تعمل في إسماعيل كدا يا عز؟
عز بقوة: أفهمكوا الحكاية من الأول.. آخر زيارة لبابا في نيويورك، وفي الحفلة اللي كان مقرر إنه يمضي عقد مع شركة أمريكية، فجأة وهو في الحفل جاله مظروف صغير بيوضح حقيقة الشركة دي وإنها وهمية وللأسف كانت تابعة لشبكة احتيال دولية! ولما بابا واجه إسماعيل صاحبه واتهمه بإنه بيخدعه، كان رد إسماعيل غريب جدا وإنه عادي لما نتعامل مع شركات استثمارية فيها شبهات مالية!
إسماعيل بغضب: طول عمر حسن غبي و…
اتجه عز ناحية إسماعيل بسرعة ووضع يده على فمه وقال: سيرة أبويا متجيش علي لسانك!
أكمل عز وهو ينظر إلي الرجل الذي بجانب إسماعيل وقال: أما بقي الأستاذ المحترم دا، فكان مكلف إنه يوهم بابا بشركته الوهمية اللي بتدعي تحقيق أرباح خيالية، ومفروض إن دا الراجل اللي بابا كان رايح يابله يوم الحادث.. ولما بابا اكتشف الحقيقة ورفض يكمل معاهم أو يمضي العقود، دبروا حادثة طريق مدبرة لإيقاف سيارته وإخفاء الملفات المالية اللي تثبت تورطهم!
عامر وهو يحاول استيعاب الكلام: بس يا عز.. تقرير المرور والجهات الرسمية أكد إنها حادثة عرضية!
عز مقاطعًا: مش ناسيها يا عمي.. الدكتور المحترم -أقصد الشريك الخامس- هو اللي تلاعب في التقارير الطبية والأوراق الرسمية بناءً على طلب إسماعيل، وعشان يغطوا على جريمة النصب الكبرى وسرقة أموال الشركة!
سميرة من بين دموعها: عز.. أنت متأكد من اللي بتقوله دا؟
عز: طبعا يا عمتي!
أشار عز لأحد الرجال ليتحرك من مكانه ويوزع أوراقًا مستندية على كل الموجودين عدا غادة.
عز: الأوراق اللي معاكوا دي تثبت كلامي.. تثبت شبكة الاحتيال والشركات الوهمية اللي إسماعيل كان بيوهم بابا بيها عشان يسيطر على أموال العيلة.
عامر بغضب: أنت يا إسماعيل تعمل في أخويا كدا؟! دا كان صاحب عمرك.. عملت فيه كدا عشان الفلوس؟!
أشار عز لأحد الرجال ليكتم فم إسماعيل، وقال عز: وققبل ما الكلب دا يتكلم، أحب أوضح نقطة بسيطة جدا.. طبعا حضرتك يا عمي نبيل، لما جيت تبلغكوا بقراره بإنه هيتقدم لمدام غادة، قال إنه شافها في حفلة واتعرفوا علي بعض.. بس اللي عمي نبيل مكنش يعرفه، واللي بابا اكتشفه في جوابات اتبعتت له في مكتبه بعد يومين من وصوله مصر بعد آخر سفرية لنيويورك، إن مدام غادة وإسماعيل متزوجين رسمياً بعقد سري قبل جواز عمي بيها، وكانوا مخططين يوقعوا نبيل عشان يسيطروا على أملاك قصر توفيق بالكامل!
اتسعت عين الجميع دهشة وصاحت غادة: أنت كداب!
عز: مممم.. طيب!
أخرج عز ورقة من جيبه وقال: مش دي صورة من عقد جوازكم السري؟
اتجه ماهر مسرعًا ناحية عز وأمسك منه الورقة ونظر فيها بصدمة، بينما تقف رقية تحاول أن تستوعب أن هذا العقد حقيقي.
عز: العقد حقيقي يا مدام.. والدكتور شاكر المحترم هو اللي ساعدك في إخفاء الحقيقة وتزوير أوراق ملكية تخص العيلة قبل الفرح، وأظن أنتي عارفه ليه.
أكمل عز وهو يجاور أخته: الجزء الباقي بقي أظن تحبوا تسمعوا من شاكر نفسه!
أشار عز لشاكر بالتكلم، فقال شاكر بخوف: يوم الحادثة.. إسماعيل كلمني وطلب مني أعدل بعض التقارير المالية والشهادات علشان نأمن موقفهم القانوني لو تم التحقيق في أموال حسن بيه..
عز بغضب: ما تكمل.. أنا مش هسكت على التزوير دا.. أخلص!
شاكر بخوف: وبعدها بسنتين.. توفيت حنان هانم وفاة طبيعية، ولكن إسماعيل طلب مني أتدخل في بعض المستندات الخاصة بالميراث والتوقيعات عشان نحول أموال لصالح حسابات غادة وإسماعيل بدون ما حد يحس!
اتسعت عين الجميع دهشة، واتجه عامر لشاكر بسرعة وأمسكه من عنقه وصاح به: أنت بتقول إي؟! تقصد إنكم سرقتم أموالنا وتلاعبتم في كل ورقة تخص العيلة؟!
عز: سيبه يا عمي.. اللي بيقوله صح..
سار عز خطوات هادئة ووقف أمام غادة ونظر لها بقوة وقال: مش برده يا مدام.. هي نفس الشبكة اللي نصبت على أبويا، وهي اللي دبرت كل مؤامرة تدمير العيلة دي من جوه؟
صاح الجميع بصدمة: إي؟!!
غادة بغضب ذبذبت نبرته: أنت شكلك أجننت وعايز تلبسني أنا المصايب كلها! أنت مجنون، أنا معملتش حاجه قانونية غلط!
صاح بها بغضب: لا عملتي.. أنتي اللي شاركتي في تدمير عيلتنا وسرقة حقوقنا!
التفت الجميع لصاحب الصوت ينظرون له بدهشة، وصاحوا بصوت واحد: أنت بتتكلم يا أدهم؟!!
أدهم بغضب وهو ينظر لغادة: أيوة.. أنتي اللي دبرتي كل دا.. فاكرة آخر يوم لي في الثانوية؟ كنت راجع مبسوط، سمعت صوتك بتتكلمي في التليفون وبتقولي له: “لازم نخلص من سيطرة نبيل ومن ورث عيلة توفيق زي ما خلصنا من تواجد حسن في طريقنا، وأنا اللي هنفذ خطة التلاعب المالي عشان محدش يشك فينا”.. كنت سامع كل حاجة يا غادة!
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”
