كان عز و حنين صامتين لا يعلمان ماذا يقولان؟؟ و ما هذا الجو الذي يحيط بهما؟؟ هل ستكون لهما عائلة بعد سنين عاشوها بمفردهما؟؟ أم ماذا تخفي الأيام لهم!!
فاق الاثنان من شرودهما علي صوت سناء تقول: مبتاكلوش ليه يا ولاد؟
عز بانتباه: بنأكل أهو يا طنط.. تسلم إيدك.
سناء: و أنتي يا حنين.. مش بتأكلي ليه؟
حنين بإحراج: لا يا طنط.. بأكل أهو.
رقية: بصي جربي الفراخ.. حاجه كدا متلاقيش منها إلا هنا لأن طنط اللي بتعملها.
حنين: أحم أحم.. أصل بصراحة مبحبش الفراخ.
نظر لها أدهم بسرعة وأعاد وجهه إلي طبقه وابتسم ابتسامة خافتة.
جهاد: ما شاء الله.. لقينا حد زيك في البيت دا يا أدهم.
حنين بعدم فهم و إحراج: ها؟!
ماهر: أصل البيت كله مفيش فيه حد مبيحبش الفراخ إلا أدهم.. ودي حاجه غريبة لأننا مدمنين الأكلة دي من طنط سناء.
سناء: بطلوا كلام بقي وتفضلوا كملوا أكل.
ما إن أنهت سناء جملتها حتي سمعت صوت يقول: كدا تأكلوا من غيري؟!
التفت الجميع إلي مصدر الصوت ليجدوا غادة.. سميرة بضيق: أهلا يا غادة.
سناء: اتفضلي يا غادة.
جلست غادة بجانب رقية بينما نظرت إلي عز و حنين بتعجب وقالت: أنا حاسه إني شوفتهم قبل كدا.
عامر بابتسامة انتصار: عز حسن توفيق السيوفي.. و حنين حسن توفيق السيوفي.
خبطت غادة يدها في الطاولة و هَبَّت واقفة و هي تصيح: نعم.. مييييييين!!!!
ماهر بضيق: ماما في إي.. وطي صوتك.
غادة بغضب: أوطي صوتي؟! أنت مسمعتش بيقول إي؟!
عامر بلا مبالاة: بقول إي.. مفيش حاجه غريبة! ولاد حسن و رجعوا بيتهم.
غادة بغضب: و مين قالك إنهم ولاد حسن؟!
عامر بحدة: و الله دا شئ يخصني.. والبيت دا هما ليه حق فيه وغصب عن أي حد.
عز مستأذناً: بعد أذنك يا عمي.
أدار عز وجهه ناحية غادة و أخرج القلادة من حول صدره وقال ببرود: السلسلة دي بابا جاب منها نسختين في عيد ميلادي الأول أنا و حنين.. و أظن لو مكذباني إسألي عمي.
أعاد عز القلادة حول عنقه و جلس بجانب حنين ببرود و أمسك بكوب العصير يرتشف منه بهدوء ليزيد من غضب غادة التي ألقت عليه نظرة نارية هي وأخته وصعدت إلي غرفتها.
نظر عز إلي أخته وقاما من موضعهما قائلين: عن أذنكوا.
سناء: معلش يا بني متزعلش من غادة.. هي بس مكنتش تعرف.
عز: لا عادي.. مفيش مشكلة.
سميرة: طب أقعدوا كملوا أكلكوا.
عز: لا معلش يا عمتو.. بس عشان تعبانين من السفر.
عامر: طب استني حد يجي يقولكوا مكان الغرف.
ماهر: عن أذنك يا عمو.. هروح معاهم.
قرأ عامر في أعين ماهر أنه يريد الاعتذار مما فعلته أمه فقال: ماشي يا ماهر.
قام ماهر وهمس في أذن فرح بسرعة: أنا هروح عشان أعتذرلهم عن طريقة ماما.
ابتسمت فرح بهدوء وقالت بهمس: ماشي.
سار ماهر بجانب عز و حنين -الممسكة بيد عز- وصعدوا السلالم في صمت..
وقف ماهر أمام حجرتين قائلًا: دي بتاعتك يا عز.. و دي ليكي يا حنين.
حنين بخوف: لا.. أنا معرفش أنام من غير ما عز يكون في الأوضة.
ماهر: هو كدا كدا في الأوضة كنبة بتتعمل سرير، ممكن عز وقت النوم ينام عليها و هدومه يسيبها في أوضته.
نظر عز إلي حنين مستفهمًا عن رأيها لتقول حنين: ماشي.
ماهر: تمام كدا.
أكمل ماهر بأسف: المهم معلش علي كلام ماما و كدا.. بس هي طريقتها كدا.
عز بابتسامة: عادي يا بني.. مفيش مشكلة.
ماهر: المهم يعني متزعلوش.
حنين: لا لا.. مفيش زعل بإذن الله.
ماهر بابتسامة: تمام.. عن أذنكوا بقي.
هبط ماهر إلي باقي الأسرة، بينما دخل عز غرفته و أتمّ استحمامه وأبدل ملابسه وذهب إلي غرفة حنين ليجدها تفتح الأريكة لتجعلها فراشًا..
حنين بأسف: معلش يا عز.. هخليك تنام هنا بس أنا بخاف.
عز: عارفه.. لولا إني مهدود من السفر كنت ضربتك.
حنين بضحك: طب الحمد لله.
مدد عز بجسده علي فراشه ونظر إلي سقف الغرفة ليقول: تفتكري غادة متغيرتش زي ما ماما كانت بتحكيلنا؟
مددت حنين جسدها علي فراشها وقالت: أنت مشفتش هي عملت إي لما عرفت؟! أنا متوقعه منها أي حاجه.
عز: نفسي أروح بيت بابا و ماما عشان أجيب المفتاح و نفتح الشنطة اللي ماما موصيانا عليها دي.
حنين: تفتكر هنلاقي المفتاح هناك ولا ممكن يكونوا باعوا البيت؟
عز بتنهيدة: مظنش يا حنين.. بس هي ماما قالت إن المفتاح اللي هيفتح الشنطة في حاجات بابا.
حنين بتنهيدة: تفتكر ممكن نجيب حق بابا يا عز؟
عز: أنا لما رجعت البيت دا رجعت عشان أجيب حق بابا.. و لحد ما أجيبه هعمل أي حاجه يا حنين.
حنين: بإذن الله يا عز.
لم يستمر حديث عز و حنين طويلاً لأن الاثنان غلبهما النوم من إرهاق السفر.
—
في صباح اليوم التالي.. علي مائدة الإفطار..
جلس عامر علي كرسيه قائلًا: أومال فين عز و حنين؟ لسه نايمين من امبارح؟!
سناء: أنا دخلت عليهم الفجر كانوا بيصلوا و ناموا.. بس زمانهم نازلين الوقتي.
غادة بتريقة: هو إحنا هنستني الهانم والبيه لحد ما ينزلوا؟! عايزه أفطر و أخرج.
رقية بضيق: ماما.. مش كفاية يعني ولا إي؟
كاد ماهر أن يتكلم ولكن منعه أدهم بحركة من يده حتي لا تتطور الأمور..
قطع حديثهم دخول عز و حنين وهما يقولان: السلام عليكم.
رد الجميع السلام عدا غادة، و جلست حنين بجانب رقية و جهاد و عز بجانب ماهر و أمجد و أدهم..
عز: أحم أحم.. بعد أذنك يا عمو، أنا و حنين هنروح نزور بابا.
عامر: مفيش مشكلة عادي.. بس خلي حد من السواقين يوصلكوا.
جهاد: بس بكرة بإذن الله حنين اليوم كله معانا.
حنين بتعجب: أنا؟!
رقية: أيوة.. و فرح هتبقي معانا عشان نخلص ترتيبات كتب الكتاب وكدا.
عامر: ماشي.. بس من بكرة عز هيستلم شغله في المجموعة، و حنين نأجلها لحد بعد كتب الكتاب.
عز: بس يا عمو أنا قولت لحضرتك إني مش هعرف أول ما أدخل الشركة أبقي رقم واحد.
أمجد: يا عز كدا كدا إحنا محتاجين مهندسين في تخصصك أنت و حنين، و كنا هننزل إعلان بس خلاص مش مهم.
حنين: بس برضه يعني في ناس تانية تستحق.
ماهر: و برضه أنتوا تستحقوا.. و بدل دا تخصصكوا و إحنا محتاجينه في أقرب وقت نختار حد تاني ليه؟
عامر: المجموعة أنت وارث فيها يعني مالكوا.. وأنتوا بتشتغلوا عشان تحافظوا عليه.
أمجد: و بعدين أنتوا مستعجلين علي المرمطة ليه؟! أنت لسه مشفتش حاجه.. شايف أبويا الراجل الطيب دا؟ في المجموعة حد تاني خالص!
ضحك الجميع عدا غادة التي تتابع الحوار في صمت وهي تشتعل غضبًا…
رقية: عارف يا عمو.. لو أنا مكانك يبقي شهر خصم.
أمجد: بس بس بس.. شهر بحاله؟! مش هلحق أجوزك ولا حاجه بس!
استمر الحديث إلي أن أنهى الجميع إفطاره وانطلق كل منهم إلي عمله.
—
في غرفة ينبعث منها صوت كوكب الشرق بأغنية “أنت عمري”.. غرفة تتميز بالأثاث الكلاسيكي بلونه البني الداكن.. شعاع من الشمس الذهبية مركز علي شاب قوي البنية يجلس علي مكتبه الهندسي ينهي أحد التصميمات..
خلع نظارته الطبية وذهب ناحية مكتبه وهبط بجسده قليلًا لتقابل عيونه الهادئة جهاز الحاسوب يتفحص أحد الملفات.. أنهي طباعة الملف الذي أراده و عاد للجلوس علي مكتبه الهندسي.. لم ينتبه لفنجان القهوة وهو يضع الأوراق ليسقط الفنجان مبعثرًا علي الأرض ليحدث ضجيجًا يقطع هذا الصمت..
حرك أدهم رأسه بضيق و انحني ليلتقط بقايا الفنجان.. دخل عليه السكرتير الخاص به وقال بقلق: أدهم بيه.. حصل حاجه؟!
أشار أدهم له بيده أن يخرج ليغلق السكرتير الباب بخوف…
حمل أدهم حطام الفنجان وقبل أن يضعه في القمامة.. وضعه أمامه علي المكتب..
أمسك أدهم بقطع الفنجان وحاول أن يجمعها لترتسم ابتسامة مكسورة علي شفتيه ويحادث نفسه قائلًا:
“الفنجان دا حاله يشبهلي أوي.. خبطة مكنتش متوقعة كسرته، وبعد ما كنت قوي بقيت حاجه هشة أوي.. الضربة جيتلي من الشخص الوحيد اللي متوقعش إني أكسر بسببه.. كسرة القلب دي صعبة أوي، و زي ما مستحيل الفنجان دا يرجع زي ما كان بشكله الجميل وثباته، مستحيل ترجع يا أدهم زي ما كنت”.
فاق أدهم من شروده علي ألم في يده… ركز أدهم نظره علي يده ليجد أنه ضغط علي حطام الفنجان بيده مما أدى لإصابة معظم كف يده بخدوش..
تنهد أدهم بحزن و اتجه إلي الحمام الملحق بمكتبه وضمّد يده و عاد ليكمل عمله بعد أن أعاد أغنية أم كلثوم.
—
