عيب إني أتجوز على سنة الله ورسوله؟! الشرع محلل لي أربعة، وطالما أنا راجل قادر أفتح أكتر من بيت وأعدل بين نسواني، يبقى محدش له عندي حاجة. ولا حضرتك شايف إن شرع ربنا يتطبق على الناس كلها إلا عز العمدة؟!
” المأمور احمر وشه من الغضب وقال بحدة: “إنت بتتكلم عن الشرع دلوقتي؟! إنت تتجوز على بنتي، وفوق كل ده تتجوز مين؟! خدامة؟! إنت واضح إنك اتجننت رسمي، ومش مدرك إنت بتعمل إيه!” عز اتبدلت ملامحه في لحظة، واختفت نبرة الهدوء من صوته، وبص للمأمور نظرة خلت الكلام يتحشر في زوره، وقال بلهجة صعيدية قاطعة: “أولًا، إياك تغلط فيا ولا في مرتي، فاهمني يا حضرة المأمور؟
! غزل بقت مرتي واحترامها من احترامي، ومش هسمح لحد مهما كان مقامه إنه يقلل منها بكلمة واحدة! وثانيًا، بنتك أنا لا طلبتها ولا سعيت وراها عشان أتجوزها، وده كان اتفاق بينك وبين أبوي، وإنت عارف الكلام ده زين.
وبرغم إني كنت رافض الجوازة دي من أصلها، ما كسرتش كلمة أبوي، ووافقت احترامًا ليه، إنما ما تجيش النهارده تحاسبني على اختيار إنت اللي كنت طرف فيه من الأول!” المأمور قبض على ايدة بقوة، لكن عز ما ادّالوش فرصة يرد، وكمل وهو بيبص في عينيه مباشرة: “وثالثًا، ودي أهم نقطة، لو بنتك خرجت معاك من باب الدوار ده، تبقى طالق، ومتلزمنيش بعد النهارده!
” ساد الصمت المكان، حتى الخدم اللي كانوا واقفين بعيد بطلوا حركتهم، وبصوا لبعضهم بقلق. العمدة نفسه اتعدل في قعدته، وبص لابنه بنظرة فيها تحذير واضح، كأنه بيقوله إن اللي بيعمله ده ممكن يولّع لهيب محدش هيعرف يطفيها.
أما المأمور، ففضل واقف مكانه لحظات، بيبص لعز باحتقار، وبعدها لف ناحية السلم ونادى بصوت جهوري! حد من الخدم يطلع ينادي ياسمين هانم بنتي ويقول لها تنزل حالًا!” ما عداش وقت طويل إلا وياسمين نزلت السلم، لابسة هدومها وملامحها مشدودة، وعينيها بتتنقل بين أبوها وعز، وهي حاسة إن في مصيبة حصلت، بس مش عارفة حجمها إيه.
أول ما وصلت لآخر السلم، مدّ المأمور إيده ومسك إيدها، ولف ناحية عز، وقال بنبرة باردة مليانة كرامة مجروحة: “أنا واخد بنتي وماشي، والغلطة غلطتي من الأول، وأنا اللي هصلّح اللي حصل. أما إنت، فابعت لها ورقة طلاقها، وكل واحد يروح لحاله، واعتبر إن اللي كان بينا انتهى!
” ياسمين شهقت بخفة، وشدت إيدها من إيد أبوها وهي بتبص له بصدمة: “بابا! إنت بتقول إيه؟! طلاق إيه اللي بتتكلم عنه؟! هو حصل إيه؟!” لكن المأمور ما ردش عليها، وشدها ناحيته وهو بيقول بحزم: “تعالي يا ياسمين، مش عايز أسمع منك كلمة واحدة دلوقتي!
” عز ما اتحركش من مكانه، ولا حاول يمنعهم، بالعكس، كان واقف بملامح جامدة، وكأنه مستني اللحظة دي من زمان. ولما المأمور عدى من قدامه، اكتفى إنه يرفع حاجبه شوية ثم حوّل نظره بعيد، في حركة استفزت فاروق أكتر من أي رد كان ممكن يسمعه منه.
وبعد ما باب الدوار اتقفل وراهم، أطلق العمدة نفسًا طويلًا، ومسح على وشه بكفه، وبص لابنه بعتاب شديد: “إنت عملت إللي نفسك فيه يا عز؟! إنت فاكر إن الجوازة دي هتعدّي بالساهل؟! ده المأمور مش هيسيبك، واللي حصل النهارده هيفتح علينا أبواب إحنا في غنى عنها!
” عز رد وهو بيظبط طرف جلابيته بمنتهى البرود: “اللي عنده حاجة يعملها يا بوي، وأنا ما عملتش حرام. وبعدين إنت بنفسك عارف إن جوازة ياسمين ما كانتش على هوايا، وأنا من الأول كنت رافضها، بس رضيت بكلمتك. دلوقتي كل واحد راح لحاله، وخلصنا من الحكاية دي.
” العمدة قرب منه خطوة، وقال بصوت واطي لكنه مليان تحذير: “إنت مشكلتك يا ولدي إنك فاكر كل حاجة بتتحل بالعند، بس فيه ناس لو حطت حاجة في دماغها، ما بترتاحش غير لما توصل لها. والمأمور فاروق مش راجل هينسى اللي حصل النهارده.
” عز بص له لحظة، وبعدها قال بثقة: “خليه يفتكر يا بوي، وأنا كمان مش هنسى إن بنتة اتفزضت عليا وأنا ما كنتش عايزها من الأساس. إنما غزل… ” سكت فجأة، كأن الاسم وحده كان كفاية يغيّر ملامحه، ثم لف ناحية السلم، وعينيه بقت بتدور عليها وسط الوجوه.
“غزل فين؟!” العمدة رفع حاجبه باستغراب وقال: “ومالك مستعجل عليها إكده ليه؟! دي واقفة من بدري فوق واكيد بتتفرج علي اللي انت عملته عشانها عز ما ردش ونده عليها كأنه خايف يلاقيها اختفت هي كمان قربت وكانت ضامة إيديها لبعض، وعينيها في الأرض، وملامحها شاحبة من كتر الصدمة.
