ردت بهدوء غريب:
ـ أنا لسه مسألتكش عملت إيه، لكن واضح إن فيه حاجة إنت مش عايزنى أعرفها.
قامت من مكانها ومدت إيدها وقالت:
ـ هات موبايلك.
ضحكت بتوتر وقلتلها:
ـ إنتِ اتجننتى؟!
ردت وهى بتبص فى عينى:
ـ لأ، أنا بس عايزة أعرف جوزى اللى بقاله كام يوم عايش فى عالم تانى، بقى مشغول بمين للدرجة دى؟
وقتها عرفت إن الموضوع قرب ينكشف، لكن بدل ما أعترف، قررت أهاجمها وأقولها إنها شكاكة وإنها بتخنقنى، وكنت فاكر إن بالطريقة دى ههرب من المواجهة. لكن حور قالت جملة خلتنى أسكت:
ـ الغريب إنك عمرك ما خفت تخسرنى، مع إنك عارف إنى بحبك، بس واضح إنك أول ما لقيت واحدة تانية عجبتك نسيت إن ليك بيت ومرات مستنياك فيه.
بصيت لحور بعصبية وقلتلها:
ـ إنتِ بتتهمينى بإيه بالظبط؟ هو عشان واحدة بعتتلى رسالة يبقى أنا بخونك؟
قالتلى وهى بتحاول تتحكم فى دموعها:
ـ أنا مش بتهمك، أنا بس بسألك، ولو مفيش حاجة تخبيها ورينى الموبايل.
رفضت وقلت لها إن مفيش حد من حقه يفتش فى خصوصياتى، وإنها لو فضلت بالطريقة دى هتخلينى أكره القعدة فى البيت.
سكتت حور، ورجعت قعدت مكانها، لكن نظراتها اتغيرت. كانت أول مرة أحس إنها مش مصدقانى، والغريب إنى بدل ما أحاول أطمنها، كنت كل اللى شاغلنى إنى أعرف صاحبتها ليه مردتش على رسالتى الأخيرة.
عدى اليوم، وتانى يوم حور قالتلى إنها هتخرج تقابل صاحبتها، فسألتها بلهفة حاولت أخفيها:
ـ صاحبتك مين؟
قالتلى:
ـ نفس صاحبتنا اللى كانت فى الحنة، عايزة أقعد معاها شوية.
حاولت أبان طبيعى وقلتلها:
ـ طب سلميلى عليها.
بصتلى باستغراب وقالت:
ـ إنت تعرفها منين عشان أسلملك عليها؟
اتلخبطت، لكنها ابتسمت ابتسامة صغيرة وقالت:
ـ بهزر معاك.
أول ما خرجت، فتحت صفحتها ودخلت أشوف آخر حاجة نزلتها، لقيتها منزلة صورة ليها مع حور من يوم الحنة، وكاتبة:
«مش كل اللى بيقرب منك بيكون عايز يعرفك، ساعات بيكون عايز ياخد منك حاجة وبس».
حسيت إن الكلام مقصود بيا، وبعتلها رسالة أسألها إذا كانت حور حكتلها حاجة عنى، لكنها المرة دى ردت بسرعة:
ـ حور مش محتاجة تحكيلى، أنا عارفة كويس إنت مين، وياريت تبعد عنى وعنها، لأنك لو فاكر إن سكوتى معناه إنى مش فاهمة اللى بتعمله، تبقى غلطان.
وقتها اتعصبت جداً، وقررت إنى لازم أواجهها وأفهمها إن مش من حقها تحاسبنى. لكن أول ما رجعت حور البيت لقيتها داخلة ووشها متغير، وقالتلى:
ـ عايزة أسألك سؤال، وتجاوبنى بصراحة… إنت كلمت صاحبتى من ورايا؟
بصيتلها وسكت شوية، وبعدها قولتلها:
ـ وإنتِ عرفتى الكلام ده منين؟
حور ضحكت بسخرية وقالت:
ـ يعنى بدل ما تنكر، بتسألنى عرفت منين؟ أنا صاحبتها يا حبيبى، وهى حكتلى كل حاجة، من أول المكالمات اللى كنت بتتصل بيها فيها وإنت مخبى اسمك، لحد ما قابلتها وعرضت عليها تعمل أى حاجة عشان توافق تقرب منك!
حاولت أدافع عن نفسى وقلتلها:
ـ أنا كنت معجب بيها، وده مش بإيدى.
ردت بصدمة:
ـ معجب بيها؟! وإنت متجوزنى! يعنى إنت كنت قاعد معايا بتتفرج على فيديوهات الحنة، وبتسألنى عن أسماء صاحباتى عشان تعرف توصل لواحدة فيهم؟!
سكت، ومقدرتش أرد.
كملت وهى بتعيط:
ـ أنا اللى كنت بفرجك على صورى وفرحانة إنى بشاركك يومى، وإنت كنت بتدور بعينك على واحدة تانية! أنا مش قادرة أصدق إنك استغليت ثقتى فيك عشان توصل لصاحبتى.
قولتلها بعصبية:
ـ خلاص بقى، هو أنا عملت جريمة؟ ما أنا لسه ماعملتش حاجة!
بصتلى وقالت:
ـ إنت شايف إن الخيانة لازم تحصل فى السرير عشان تبقى خيانة؟ إنت خنتنى من أول ما قررت تستغلنى وتوصل لصاحبتى من ورايا.
وبعدها دخلت الأوضة وقفلت الباب، وأنا فضلت مكانى متضايق، لكن بدل ما أحس بالندم، كنت غضبان إن صاحبتها حكتلها كل حاجة وضيعت عليا فرصة إنى أقرب منها.
وبعد شوية سمعت صوت حور وهى بتتكلم فى التليفون وبتقول:
ـ أنا جاية أقعد عندك كام يوم، ومش عايزة أسمع أى تبرير منه… أنا مش هقدر أبص فى وشه بعد اللى عمله.
ساعتها أدركت إن الموضوع أكبر بكتير مما كنت متخيل، وإن حور المرة دى مش ناوية تعدى اللى حصل بسهولة.
خرجت وراها أول ما لقيتها بتجهز شنطتها، وقلتلها:
ـ إنتِ رايحة فين يا حور؟ هو الموضوع وصل إنك تسيبى البيت؟
ردت من غير ما تبصلى:
ـ أيوه، هسيب البيت لحد ما أفكر أنا عايزة أكمل معاك إزاى.
قولتلها:
ـ يعنى عشان واحدة صاحبتيها رفضتنى هتخربى بيتنا؟
لفت وبصتلى بصدمة وقالت:
ـ إنت لسه فاهم إن المشكلة فى صاحبتها؟! إنت مش شايف إنك جرحتنى أنا؟ أنا اللى كنت قاعدة جنبك وبفرجك على صورى، وإنت كنت بتختار من وسط صاحباتى واحدة تعجبك وتدور وراها!
حاولت أمسك إيدها، لكنها سحبتها وقالت:
ـ متلمسنى، أنا مش قادرة أستحمل وجودك جنبى.
خرجت حور وسابتني لوحدي، وبعد ما الباب اتقفل اتصلت بصاحبتها، وكنت متعصب جداً. أول ما ردت قولتلها:
ـ إنتِ مبسوطة باللى عملتيه؟ خربتى بيتى وخلتى مراتى تسيبنى!
ردت ببرود:
ـ أنا مخربتش بيتك، إنت اللى خربته بإيدك، وبعدين أنا محذراك من الأول، وقلتلك تبعد عنى وعنها.
قولتلها:
ـ إنتِ السبب فى كل ده، ولو كنتِ وافقتى نتعرف على بعض مكنش حصل اللى حصل.
ضحكت وقالت:
ـ بجد؟ يعنى أنا كمان بقيت مسؤولة عن جوازك؟ إنت محتاج تراجع نفسك، لأنك مش بس أنانى، إنت كمان مش شايف غلطك وبتدور على حد تعلق عليه فشلك.
وقبل ما أرد قفلت المكالمة. فضلت قاعد لوحدي، وبعد ساعات لقيت حور باعتالى رسالة قصيرة:
«متتصلش بيا، أنا محتاجة أبعد عنك، ولما أقرر هكلمك».
وقتها لأول مرة بدأت أحس إن الموضوع مش مجرد زعل وهيعدى، وإن الست اللى كنت ضامن حبها ووجودها، ممكن فعلاً تقرر تكمل حياتها من غيرى.
عدى يومين وحور مابتردش على مكالماتى، وكنت كل شوية أدخل أشوف آخر ظهور ليها وأبعتلها رسايل، لكنها كانت بتتجاهلنى تماماً.
وفى اليوم التالت لقيت حماتى بتتصل بيا، رديت عليها، فقالتلى بعتاب:
ـ إنت عملت إيه فى بنتى؟ حور عمرها ما نامت عندى وهى مكسورة بالشكل ده!
