قولتلها:
ـ يا طنط الموضوع سوء تفاهم، وحور مكبرة الحكاية.
ردت بغضب:
ـ سوء تفاهم إيه؟ إنت بتكلم صاحبتها من وراها وبتحاول توقعها فيك، ولما البنت رفضتك فضلت تحاصرها! إنت شايف بنتى قليلة للدرجة دى عشان تعمل فيها كده؟
قولتلها:
ـ أنا غلطت، بس الموضوع مكنش يستاهل إنها تسيب البيت.
قالتلى:
ـ الغلط مش إنك أعجبت بواحدة، الغلط إنك نسيت إن عندك مرات بتحبك وواثقة فيك، وبدل ما تحافظ عليها استغليت ثقتها عشان توصل لصاحبتها.
قفلت معايا وأنا متضايق، وقررت أروح أجيب حور بنفسى.
روحت بيت حماتى، وأول ما حور شافتني قالت لأمها:
ـ سيبينا لوحدنا يا ماما.
دخلنا الأوضة، وقلتلها:
ـ يلا يا حور، كفاية لحد كده، ارجعى بيتك.
بصتلى وقالت:
ـ بيتى؟ إنت لسه فاكر إن ده بيتى؟ أنا من ساعة ما عرفت حقيقتك وأنا مش عارفة إزاى كنت عايشة معاك ومطمنة.
قولتلها:
ـ أنا جوزك، ومش هقبل إنك تفضلى هنا.
ردت بهدوء:
ـ وإنت فاكر إن كلمة جوزى دى هتدينى أمان؟ أنا مش هرجع معاك دلوقتى، ولما أرجع هيكون عشان آخد باقى حاجتى، مش عشان أرجع أعيش معاك.
سألتها:
ـ يعنى إنتِ ناوية تطلبى الطلاق؟
بصتلى وقالت:
ـ أنا كنت فاكرة إنك بتحبنى، لكن واضح إنك بتحب وجود واحدة جنبك تديك اهتمام، وأول ما تشوف واحدة تانية تعجبك تجرى وراها. وأنا مش مستعدة أقضى عمرى مع راجل كل ما يعجبه وش جديد ينسى مراته.
وسابتنى وخرجت من الأوضة، وأنا لأول مرة أحس إن حور ممكن تكون فعلاً قررت تنهى جوازنا، لكن اللى صدمنى أكتر إنى لقيت صاحبتها باعتالى رسالة بتقول فيها:
«أتمنى تكون فهمت إنك خسرت مراتك بسبب تصرفاتك، وياريت متحاولش تتواصل معايا تانى».
رجعت البيت وأنا فى قمة عصبيتى، وفضلت أفكر إزاى كل حاجة اتقلبت عليا بالشكل ده. كنت فاكر إن حور هتزعل يومين وترجع، لكن الأيام عدت وهى مصممة على موقفها.
بعد أسبوع اتصلت بيا وقالت إنها عايزة تيجى تاخد باقى حاجتها، وافقت وقلت لنفسى دى فرصتى أتكلم معاها وأصالحها.
جت حور ومعاها أمها، وبدأت تجمع هدومها وحاجتها، وأنا واقف مستنيها تخلص، لحد ما مقدرتش أستحمل وقلتلها:
ـ إنتِ بجد هتضيعى عشر سنين جواز عشان غلطة؟
بصتلى وقالت:
ـ عشر سنين جواز دول كانوا غاليين عندى، وعشان كده وجعونى أكتر، أنا مكنتش متخيلة إن الراجل اللى ائتمنته على نفسى وبيتى ممكن يبص لصاحبتى ويجرى وراها بالشكل ده.
قولتلها:
ـ أنا معملتش حاجة، وكل اللى حصل إنى اتعرفت عليها.
ردت:
ـ وإنت شايف إنك لما خبيت عنى وخدت رقمها من موبايلی وفضلت تطاردها واتصلت بيها وقابلتها، كل ده اسمه اتعرفت عليها؟!
سكت، لأنها كانت بتتكلم عن حاجات مفيش عندى رد عليها.
قربت منى وقالت:
ـ عارف أكتر حاجة وجعتنى إيه؟ إن صاحبتك اللى كنت بتجرى وراها كانت أشرف منك، لأنها رفضت تخون صداقتى، وحافظت على بيتى أكتر منك.
الكلام نزل عليا زى الصاعقة، وحاولت أقولها إنى ندمان، لكنها رفعت إيدها تمنعنى وقالت:
ـ متقوليش ندمان، لأنك لو كنت ندمان فعلاً مكنتش هتفضل تلومها على إنها رفضتك، كنت هتلوم نفسك على إنك خنت ثقتى.
شالت شنطتها وخرجت، وقبل ما تقفل الباب بصتلى وقالت:
ـ أنا مش زعلانة إنك أعجبت بواحدة تانية، أنا زعلانة إنى اكتشفت إنك راجل مفيش عنده أمان، ودى حاجة صعب أقدر أنساها.
وقفل الباب وراها، وفضلت واقف لوحدى، ولأول مرة البيت اللى كنت فاكر إنه مضمون ليا، أحس إنه فاضى وموحش من غير حور.
بعد ما حور مشيت، حاولت أعيش حياتى بشكل طبيعى، لكن اكتشفت إن وجودها كان مالى البيت بتفاصيل مكنتش واخد بالى منها. مفيش حد يسألنى أكلت ولا لأ، ولا حد يستنانى لما أرجع من الشغل، وحتى التليفون بقى هادى بشكل غريب.
بعد أسبوعين قررت أكلمها وأطلب منها نبدأ من جديد، لكنها ردت عليا وقالت:
ـ عايز إيه يا مؤمن؟
ـ عايزك ترجعى بيتك يا حور، أنا غلطت واعترفت بغلطتى، ومش هكررها تانى.
قالتلى:
ـ إنت عارف يا مؤمن، أنا قعدت أفكر كتير فى اللى حصل، واكتشفت إن المشكلة مش فى البنت اللى عجبتك، المشكلة فيك إنت. إنت كنت مستعد تخسرنى عشان واحدة شوفتها بترقص فى فيديو، وده معناه إنك عمرك ما قدرت قيمة اللى عندك.
قولتلها:
ـ أنا اتعلمت الدرس، وصدقينى مش هبص لغيرك تانى.
ردت:
ـ أنا مش عايزة أعيش مع راجل محتاج يتعلم إزاى يحترم مراته بعد عشر سنين جواز.
وبعدها قالتلى إنها عايزة ننفصل بهدوء ومن غير مشاكل، وإنها مش مستعدة تدى فرصة تانية لجواز فقدت فيه إحساسها بالأمان.
قفلت المكالمة وأنا مش مصدق إنها وصلت للقرار ده فعلاً. بعد كام يوم قابلت واحد صاحبى، ولما عرف اللى حصل قالي:
ـ إنت كنت فاكر إنك بتكسب واحدة جديدة يا مؤمن، لكن الحقيقة إنك كنت بتفرط فى واحدة اختارتك وعاشت معاك عشر سنين. والأغرب إن البنت اللى جريت وراها رفضتك عشان تحافظ على صاحبتها، يعنى هى كانت أوفى ليك من نفسك.
الكلام فضل يرن فى ودنى، ولأول مرة استوعبت إنى خسرت حور مش عشان هى مابتسامحش، لكن عشان أنا استهنت بيها لحد ما مبقاش عندها حاجة تتمسك بيها.
عدى شهر كامل وحور مصممة على الانفصال، وأنا كنت كل يوم أحاول أوصلها وأكلمها، لكنها كانت بتتهرب منى. لحد ما فى يوم لقيتها باعتالى رسالة بتقول إنها عايزة تقابلنى فى مكان عام عشان نتكلم فى إجراءات الطلاق.
روحت قابلتها، ولقيتها قاعدة مستنيانى، كانت هادية بشكل غريب، وده خلانى أتوتر أكتر. قعدت قدامها وقلتلها:
ـ إنتِ مصممة تضيعى بيتنا يا حور؟
قالتلى:
ـ أنا مش بضيع بيتى يا مؤمن، أنا بحاول أخرج من علاقة مبقتش حاسة فيها إنى متقدرة.
قولتلها:
ـ طب ادينى فرصة أخيرة، أنا مستعد أعمل أى حاجة تطلبها.
ابتسمت بحزن وقالت:
ـ المشكلة إنك قلت الكلام ده قبل كده، وكنت مستعد تعمل أى حاجة عشان صاحبتنا توافق تقرب منك، لكن لما مراتك طلبت منك تحافظ على بيتك، لقيت ألف مبرر عشان ترفض.
حاولت أمسك إيدها، لكنها سحبتها وقالت:
ـ أنا مش جاية أعاتبك يا مؤمن، أنا جاية أقولك إن قرارى نهائى. وعايزة ننفصل باحترام، من غير ما نحاول نجرح بعض أكتر من كده.
سألتها بصوت مكسور:
ـ يعنى خلاص مش بتحبينى؟
ردت:
ـ الحب لوحده مش كفاية يا مؤمن، أنا حبيتك فعلاً، بس مش هفضل أعيش معاك وأنا خايفة كل يوم إن واحدة جديدة تعجبك وتقرر تجرى وراها.
قامت وسابتني قاعد، وقبل ما تمشى قالت:
ـ أتمنى فى يوم تفهم إن مش كل حاجة تعجبك لازم تكون من حقك، وإن الإنسان ساعات بيخسر أغلى حاجة عنده وهو فاكر إنه بيكسب حاجة أحلى.
