مسكت الورقة من إيد أخت أحمد وبدأت أقرا، وكل سطر كنت بقراه كنت بحس إن أعصابي بتغلي أكتر.
الورقة كانت عبارة عن جدول أسبوعي، مكتوب فيه الأيام اللي هتكون فيها مسؤولة عن حماتي، ومواعيد أكلها، ومواعيد مشاويرها، وحتى الأيام اللي أخوات أحمد هييجوا فيها بعيالهم!
رفعت عيني وبصيتلهم وقلت:
ـ هو إيه ده بالظبط؟
أخت أحمد ردت بكل بساطة:
ـ ده نظام هنمشي عليه علشان ماما متتعبش، وكلنا نبقى عارفين دورنا.
ضحكت بسخرية وقلت:
ـ دورنا؟ طب فين دوركم إنتوا؟
قالت: ـ إحنا بنات ومش بنكون موجودين طول الأسبوع، وإنتِ موجودة معاها.
بصيت لحماتي وقلت:
ـ يعني أنا اللي هخدم ماما، وأستقبل إخوات جوزي، وأراعي عيالهم، وأعمل كل حاجة، وإنتوا تيجوا الخميس تاكلوا وتروحوا؟
حماتي اتنرفزت وقالت:
ـ هو إنتِ بتتكلمي معانا بالطريقة دي ليه؟ إحنا بنحاول نريحك وننظم حياتك!
قولتلها: ـ تريحوني؟ إنتوا حتى في الورقة دي محددتوش يوم واحد أرتاح فيه!
أخت أحمد قالت بعصبية:
ـ خلاص يا مريم، لو مش عاجبك الوضع قولي من دلوقتي، بس متجيش بعد كده تقولي إننا مقصرين في حق أمنا.
ماما كانت واقفة جنبي، ولما لقتهم بيتكلموا معايا بالطريقة دي قالت:
ـ يا جماعة، بنتي لسه عروسة، ومن حقها تعيش حياتها مع جوزها، ومفيش مانع إنها تراعي حماتها، لكن مش بالشكل ده.
حماتي ردت:
ـ هو أنا طلبت منها حاجة فوق طاقتها؟ دي شوية خدمة في بيتها!
ساعتها بصيتلها وقلت:
ـ لأ يا ماما، ده مش بيتي لوحدي، ده بيتي أنا وأحمد، وأنا مش هقبل إن حد يحول جوازي لوظيفة خدمة طول اليوم.
قاموا ومشيوا وهما متضايقين، لكن قبل ما أخت أحمد تخرج قالتلي:
ـ أحمد هيعرف يتصرف معاكي، وإنتِ هترجعي بيتك غصب عنك.
الكلمة دي فضلت ترن في ودني.
بعدها بساعتين أحمد اتصل بيا وطلب مني أرجع البيت علشان نتكلم.
رجعت، ولقيته قاعد في الصالة، وحماتي جنبه.
أول ما دخلت قال:
ـ اقعدي يا مريم، إحنا لازم نحط النقط على الحروف.
قعدت قدامه وقلت:
ـ اتفضل.
قال: ـ أنا مش هقدر أسيب أمي لوحدها، وده شيء مش قابل للنقاش.
قولتله: ـ وأنا مش طالبة منك تسيبها.
كمل: ـ يبقى مفيش داعي لكل المشاكل دي. أمي هتفضل معانا، وإخواتي هييجوا في أي وقت، وإنتِ تتعاملي معاهم كويس.
قولتله: ـ طب وإنت شايف إن ده عدل؟
رد: ـ أمي تعبت في تربيتنا، ومن حقها علينا.
قولتله: ـ وأنا ماليش حق عليك؟ مش من حقي أعيش مع جوزي؟ مش من حقي يكون ليا وقت وخصوصية؟ مش من حقي أرتاح في بيتي؟
سكت شوية، وبعدها قال:
ـ بصي يا مريم، أنا عايزك تفهمي إن البيت ده فيه أم، ولازم كلنا نراعيها.
ابتسمت وقلت:
ـ تمام، عندي اقتراح.
بصلي باستغراب.
كملت:
ـ شقة ماما سعاد تحت موجودة، وممكن ترجع تقعد فيها، وإنت تنزل تقعد معاها كل يوم بعد الشغل، وإخواتك ييجوا يزوروها في أي وقت، وكل واحد فيهم يساعد في خدمتها. وأنا كمان هنزل أزورها وأساعدها، لكن شقتي تفضل بيتي أنا وإنت.
حماتي قامت من مكانها وقالت:
ـ يعني إنتِ عايزاني أرجع شقتي تحت علشان تتهني بجوزك؟
قولتلها: ـ لا يا ماما، أنا عايزاكي ترجعي بيتك علشان كل واحد يعيش حياته من غير ما حد يحس إنه مفروض عليه حاجة.
أحمد بصلي بغضب وقال:
ـ أنا مش موافق.
قولتله: ـ يبقى لازم تعرف إن أنا كمان مش موافقة أكمل بنفس الطريقة.
دخلت أوضتي، وبدأت أرتب هدومي.
أحمد دخل ورايا وقال:
ـ إنتِ كل شوية هتعملي شنطتك وتهدديني؟
بصيتله وقلت:
ـ أنا مش بهددك يا أحمد، أنا بقولك إن حياتنا بالشكل ده مش هتنفع تكمل.
وفي اللحظة دي موبايله رن.
كانت أخته الكبيرة.
رد عليها، وسمعتها بتقوله:
ـ أحمد، إحنا اتفقنا إن ماما مش هتنزل شقتها تاني، وإنت لازم تفهم مراتك إن مفيش حاجة اسمها خصوصية في بيت العيلة.
بصلي أحمد، وبعدين قالها:
ـ حاضر يا سحر، هنتصرف.
هنا فهمت إن الموضوع مش مجرد إن حماتي محتاجة حد جنبها.
دي عيلة كاملة اتفقت إن شقتي تبقى مكان تجمعهم وخدمتهم، وإن جوزي هو اللي هينفذ الكلام ده.
لكن المفاجأة الحقيقية كانت لما أحمد قفل المكالمة، وبصلي وقال:
ـ على فكرة يا مريم، فيه حاجة لازم تعرفيها، أمي مش هترجع شقتها تحت، وإنتِ اللي لازم تتعودي على الوضع الجديد.
ابتسمت، وقلتله:
ـ خلاص يا أحمد، طالما إنت اخترت راحتهم على حساب بيتي، يبقى أنا كمان أخدت قراري.
خرجت من الأوضة، ومسكت موبايلي، واتصلت بشخص كان مستنيني من يومين.
وأول ما رد قلتله:
ـ أيوه يا أستاذ سامح، أنا موافقة على الاتفاق، وعايزة أبدأ الإجراءات من بكرة.
أحمد بصلي باستغراب:
ـ اتفاق إيه؟ وإجراءات إيه؟
بصيتله وقلت:
ـ بكرة هتعرف إن مش كل واحد بيسكت يبقى مش قادر ياخد حقه.
أحمد كان واقف قدامي ومش فاهم أنا بتكلم عن إيه، وقال بعصبية:
ـ إنتِ بتكلمي مين يا مريم؟ وإيه الاتفاق اللي بتتكلمي عنه؟
بصيتله بهدوء وقلت:
ـ بكرة هتعرف.
نمت الليلة دي عند ماما، وتاني يوم الصبح روحت مع أستاذ سامح، وكان محامي العيلة بتاعتنا، علشان ننفذ اتفاق كنت مجهزاه من فترة.
قبل جوازي، بابا الله يرحمه كان سايبلي شقة صغيرة باسمي في نفس المنطقة، وكنت مأجراها، ولما المستأجر مشي من شهر، كنت بفكر أجهزها وأستثمر فيها.
لكن بعد اللي حصل مع أحمد وأهله، قررت أجهز الشقة وأرجع أعيش فيها مؤقتًا لحد ما أحدد مصير جوازي.
وفي نفس اليوم روحت شقتي عند أحمد، ولقيت حماتي قاعدة في الصالة، وأخت أحمد الكبيرة والتانية معاها.
أول ما دخلت، أخت أحمد قالت بسخرية:
ـ أهو العروسة رجعت، يلا بقى يا مريم حضريلنا الغدا، إحنا جعانين.
ابتسمت وقلت:
ـ معلش، الغدا النهارده مش عندي.
حماتي بصتلي وقالت:
ـ أمال هنتغدى فين؟
رديت: ـ كل واحد يتغدى في بيته يا ماما، أنا مش هقدر أعمل أكل للعيلة كلها بعد النهارده.
أخت أحمد اتعصبت وقالت:
ـ إنتِ بتتكلمي جد؟!
قولتلها: ـ أيوه، وبالمناسبة، أنا جايه أخد باقي حاجتي.
أحمد خرج من الأوضة وقال:
ـ مريم، إنتِ بتعملي إيه؟!
قولتله: ـ أنا قررت أعيش في شقتي التانية، لحد ما نعرف إحنا هنكمل حياتنا إزاي.
قال بغضب: ـ يعني هتسيبي البيت؟
ـ أنا مش بسيب بيتي، أنا بسيب المكان اللي إنت حولته لبيت العيلة كله.
حماتي بدأت تعيط وتقول:
