الجزء الاول
لو منزلتيش تنضفي المنور دلوقتي… أقسم بالله هطردك من البيت!
صرخة حماتي شقت الشقة كلها، لدرجة إن الجيران فتحوا أبوابهم وبقوا يسمعوا اللي بيحصل. متوفره على روايات واقتباسات
وقفت مكاني مصدومة، وبصيتلها وأنا مش مستوعبة اللي سمعته.
قلت وأنا بحاول أتمالك نفسي
حضرتك بتهزري… صح؟
ردت وهي شايفة الرعب في عيني ووشها كله تحدي
أنا عمري ما بهزر… يا تنزلي تنضفي المنور، يا تشيلي هدومك وتمشي من البيت ده النهارده قبل بكره!
لفيت أبص لجوزي… كنت مستنية كلمة واحدة منه، كلمة توقف الإهانة دي كلها…
لكن اللي قاله بعدها، قلب حياتي رأسًا على عقب. حكايات منال علي
أنا اسمي ياسمين، عندي سبعة وعشرين سنة، ومتجوزة كريم بقالي سنة ونص. من أول يوم جواز وأنا ساكنة في بيت العيلة، وكنت دايمًا بقول لنفسي اصبري… بكرة نستقل.
بس بكرة دي عمرها ما جات.
حماتي، أم كريم، كانت ست صعبة جداً. مبتحبش حد يقولها لأ، وكل كلمة منها كانت بالنسبة للكل قانون.
كل يوم تطلعلي بطلب جديد
اغسلي السلم. حكايات منال علي
انشري هدومي.
حضري الغدا لإخوات جوزك.
امسحي السطح.
وأنا أسكت… مش ضعف، بس كنت بحاول أحافظ على بيتي، وبقول لنفسي إن الراجل اللي بحبه يستاهل أستحمل عشانه… لحد ما جه اليوم اللي غير كل حاجة.
كنت بعمل الفطار وإيدي مليانة عجين، لما سمعت صوت حماتي بينادي بعنف من آخر الصالة
يا ياسمين… تعالي هنا!
نشفت إيدي بسرعة وروحت لها. لقيتها واقفة عند باب المطبخ، حاطة إيديها في وسطها وباصالي بنفس النظرة اللي بتخوفني كل مرة.
قالت ببرود
المنور بقى وسخ قوي… انزلي نضفيه.
افتكرتها بتهزر، فضحكت ضحكة صغيرة
أنزل فين؟
بصتلي باستغراب وشكيمة
هو فيه كام منور؟ المنور اللي تحت!
اتجمدت مكاني… المنور ده كان مكان ضيق وخنقة، مابينزلوش غير العمال لما يكون فيه مواسير بايظة. سلالم حديد قديمة ومصدية وجزء منها مكسور، وريحة الرطوبة والعفونة طالعة منه.
قلت بخوف
بس ده خطر قوي يا ماما!
ردت من غير ما ترمش
يعني أنا بكدب عليكِ؟
لا… بس المكان مقفول وممكن…
قاطعتني بصوت عالي هز المكان
يعني مش هتنزلي؟
ابتديت أحس إن قلبي بيدق بسرعة وصدري بيتخنق
والله يا ماما أنا بخاف من المقفول والضلمة.
ضحكت بسخرية
بتخافي؟ يا حنينة!
وبعدين بصت ناحية أوضة كريم وقالت بصوت أعلى
شوف يا ابني… مراتك بترفض تساعد في بيت حماتها!
خرج كريم وهو ماسك الموبايل، بصلي وقال بزهق
فيه إيه على الصبح؟
حماتي سبقتني وقالت بتجني
بقولها تنضف المنور وهي عاملة فيها أميرة ومأنتخة!
استنيت إنه يقول أي كلمة تدافع عني… أي كلمة تجبر خاطري.
لكنه بصلي وقال بمنتهى البرود واللامبالاة
خلصي اللي ماما طلبته يا ياسمين.
حسيت إن الدنيا بتلف بيا
كريم… المنور خطر والسلالم مكسورة!
متكبريش الموضوع بقى!
طيب انزل معايا أو اقفلي فوق…
قال بضيق وهو بيلف وشه
هو أنا فاضي للعب العيال ده؟
الكلمة وجعتني أكتر من أي إهانة.
بصيت لحماتي، لقيتها مبتسمة ابتسامة انتصار وتشفّي.
سكت… لفيت ورجعت أوضتي، قفلت الباب وقعدت على السرير أبكي. أول مرة أحس إني لوحدي ورخيصة بالشكل ده.
بعد شوية سمعت خبط جامد على الباب. فتحت، لقيت حماتي رامية جردل وممسحة قدام الرجلي
يلا… الوقت بيجري، مش هنقضي اليوم دلع!
قلت وأنا بمسح دموعي وبحاول أقف على حيلي
والله مش هقدر أنزل المكان ده.
وشها اتغير فجأة، قربت مني وقالت بصوت واطي يخوف
يبقى اسمعيني كويس… لو منزلتيش تنضفي المنور دلوقتي، أقسم بالله هطردك من البيت!
حسيت إن دمي اتجمد
تطرديني؟
أيوه!
ده بيت ابني… وأنا صاحبة البيت! ولو مش عاجبك… الباب يفوت جمل!
وقفت مكاني مش عارفة أقول إيه. كل اللي جه في بالي ساعتها هروح فين؟ أنا ماليش حد! أبويا متوفي، وأمي عيانة وعايشة مع أخويا في شقة ضيقة بالعافية… ولو خرجت دلوقتي، يبقى جوازي انتهى.
دخل كريم في اللحظة دي، قلتله بسرعة وأنا بتعلق بقشة
سمعت مامتك قالت إيه؟
بصلي ثانيتين… وبعدين قال بمنتهى البرود
اسمعي الكلام وخلاص يا ياسمين، ومتعمليناش مشاكل.
في اللحظة دي، عرفت إن سندي مكسور، وإن المعركة مش بس مع حماتي… المعركة مع جوز سكت وباعني.
قضيت الليل كله صاحية. كل ما أبص من البلكونة على فتحة المنور أحس برعشة في جسمي. كان المكان تحت ضلمة وكأنه بئر مالوش نهاية.
وقبل الفجر بشوية، صحيت على صوت حماتي وهي بتخبط على الباب بعنف
قومي… الناس كلها صحيت، النهارده هتنزلي يعني هتنزلي!
خرجت وأنا جسمي كله بيرتعش. لقيت السلم الحديد القديم متسند على حافة المنور، وهي واقفة فوق مربعة إيديها، مستنية تشوفني وأنا بنزل.
الجيران بدأت فتحات شبابيكهم تبان، والكل بيتفرج وساكت… مفيش حد اتكلم ولا حش عني.
مسكت السلم الحديد… حطيت رجلي على أول درجة، وكانت بتتهز تحت جسمي.
تاني درجة… إيدي كانت بتترعش ومش قادرة تمسك الحديد المصدّي.
تالت درجة…
وفجأة…
سمعت صوت خبط جامد جداً طالع من قاع المنور تحت… كأن حد بيخبط بإيده على حيطة أو باب مقفول!
وبعدها بثانية واحدة… طلع صوت راجل مبحوح ومكتوم بيقول من الضلمة
متنزليش… لو نزلتي مش هتطلعي تاني!
واتجمد الدم في عروقي…
يتبع..
