بعد صلاة العصر في قصر آل توفيق.. أنتهت سناء من تأكدها إتمام الطعام وتجهيز الغرف لاستقبال عز و حنين..
وسط تعجب من سميرة و الفتيات من الحالة الطارئة علي القصر..
وضعت سناء هاتفها بجوارها وقالت: خمس دقايق و هيكونوا هنا.
سميرة بتعجب: معرفش ليه حاسه إن عامر عامل حاجه.
أشار أدهم علي اصبعه بمعني “اتجوز”.
ضحكت سناء و ضربت أدهم ضربة خفيفة في كتفه وقالت: ماشي يا أدهم.. بقي دي آخرتها؟!
جهاد بمرح: هو قال حاجه عجيبة يعني؟ ما الشعر محلل أربعة.
فرح: بس يا بت.. أنت كمان هتبقي أنت و ماهر.
رقية: علي فكرة ماهر بيكلم صح.. اعترضي بقي اعترضي.
فرح برفعة حاجب: تقصدي بقي إنه ممكن يعملها تاني؟!
ناصر: لا يا فرح.. العاقل ميعملهاش مرتين.
سميرة: تقصد إي يا ناصر؟
رقية: اوووبا.. شكلها كدا هتولع.
أما في خارج القصر أمام البوابة.. هبطت حنين من سيارة عامر و هي ممسكة بيد عز بخوف..
عامر للخدم: طلعوا الشنط فوق.
حنين بخوف: أنا عايزة أروح يا عز.
عز بقلق: متقلقيش يا حنون.. أهدي.
ماهر: أهدي يا بنتي دا مش امتحان فيزيا.
عامر: يلا يا شباب.
في بهو الصالة.. عَالَت ضحكات الجميع وقال ناصر: بتحبي أنت تهدي النفوس يا روء!
رقية ببراءة: طبعا طبعا يا عمو.
قطع كلامهم صوت عامر يقول: السلام عليكم.
التفت نظر الجميع إلي عامر و ماهر و أمجد…. رد الجميع السلام وقال عامر: طبعا أنتوا فاكرين إي.. إني جاي ومعايا ضيوف أو مفاجأة، بس اللي متعرفهوش إني جاي ومعايا صحاب بيت ليهم في المكان دا زي ما لينا بل و أكتر.. اللي أقصده إنهم جزء من العيلة دي اتحرمنا منه فترة كبيرة.
وقفت سميرة بصدمة وقالت: عامر.. أنت تقصد إن…
أشار عامر إلي ماهر و أمجد بالابتعاد عن بعض ليدخل عز و بيده حنين لتقول سناء بصدمة: فيروز!!
عامر: أحب أهربكوا.. عز حسن توفيق السيوفي و حنين حسن توفيق السيوفي.
اتسعت عين الجميع دهشة و انطلقت سميرة إلي عز و جذبته إلي أحضانها بقوة وهي تشعر أنها تحتضن أخيها، بينما وقفت سناء أمام حنين تتأمل وجهها بيدها و كأنها تشعر أن من أمامها هي فيروز.. ضمت سناء حنين إلي أحضانها بحنان وهي تقول: وحشتيني يا بنتي.
لم تعلم حنين ماذا تفعل؟! فمهما كان هي لم تختلط بأحد من قبل.. نعم هم أهلها و لكنها تشعر القلق.. و لكن سرعان ما بدأ يختفي القلق تدريجيًا في أحضان سناء لتتعلق حنين بها وتشعر بالحنان في ضمتها لتقول لنفسها: “كان عندك حق لما حبيتها أوي يا ماما”.
أما الحال لم يختلف عند عز قليلًا.. فقد تعجب من ردة فعل سميرة و لكنه أيقن أنها عمته عندما شعر بالأمان في ضمتها.. عندما قالت له سميرة: وحشتيني يا ابن أخويا.
أما الفتيات وناصر كانوا في حالة من الدهشة.. غير مستوعبين أن بعد كل ما مضي سيعود أولاد حسن إلي قصر آل توفيق.. ابتسمت سميرة لحنين و ابتعدت عن عز لتضمها، و ضمت سناء عز.
صاحت جهاد بمرح في سميرة: لو سمحتي كدا يا عمتو أنا عايزه أسلم بقي.. مليش دعوة.
ابتعدت سميرة عن حنين بعيون دامعة لتقول جهاد: أنا جهاد.. بنت الحاج عامر العسل دا.
حنين بابتسامة هادئة: و أنا حنين.
ضمتها جهاد بمرح وقالت: لا.. أنا بحضن علطول.
بينما كانت حنين منشغلة في التعرف علي فرح و رقية، كان عز منشغلًا بالتعرف علي ناصر و أدهم..
أشار أدهم بيده بمعني: “كان نفسي أوفكوا من زمان”.
تكلم عز بلغة الإشارة بمعني: “و أنا كمان نفسي أوف اللي كان بيخربطني كل ما ألعب معه”.
ضحك أدهم بتعجب لتذكر عز ذكرياتهم في حديقة القصر عندما كانوا يلعبون بعيد عن أعين غادة ليتكلم بلغة الإشارة بمعني: “لسه فاكر؟”.
تكلم عز بلغة الإشارة بمعني: “محدش ينسي طفولته”.
ابتسم أدهم، و التفت عز إلي ماهر و أمجد اللذان قدما رقية و فرح له.
كانت جهاد تقف بجانب حنين تداعبها بمرح لتقول: بصي بقي.. هعرفك علي أهم شخص في العيلة دي، و هو البشمهندس أدهم.
جهاد بصوت عالي نسبياً: يا أدهم!
التفت أدهم لجهاد و انتبه إلي حنين التي تقف بجانبها و خداها يتوردان خجلًا.. ردد أدهم في نفسه: “سبحان من خلقك بهذا الجمال”.
أبعد أدهم نظره سريعًا عن حنين و تقدم ناحيتها وهو يحاول أن يتلافي النظر لها وحرك يده بمعني: “حمد لله عالسلامة”.
أيقنت حنين من أن هذا أدهم الذي أخبرها عامر عنه وهو في الطريق الذي فقد النطق فأشارت بيدها بمعني: “شكرًا”.
جهاد بمرح: بصي بقي.. أدهم دا بقي شكله ميقولش مهندس خالص، ممكن تقولي هو الدكتور النفسي للعيلة المعقدة دي.
ضحكت حنين بخجل بينما رفع أدهم حاجبه لجهاد و رفع يده كأنه سيضربها لتقول جهاد بطريقة مسرحية: هتمد إيدك علي أمك يا بني؟!
حنين بضحك: يخربيتك.. أنت بتهزري في أي حاجه و كل حاجه.
كتب أدهم علي هاتفه: “دي تافهة أساسًا” و وضعها أمام حنين لتنفجر ضاحكة و تقول جهاد: ماشي يا أدهم.. و الله هقول لأمجد يجبلي حقي!
كان أمجد منشغلًا بالضحك هو و ماهر و عز ليسمع صوت جهاد تنادي باسمه ليلتفت لها ويقول: نعم يا بنتي؟
جهاد بحزن مصطنع: أدهم بيقول إي تافهة!
أمجد: ما هي دي الحقيقة.. أدهم مقلش حاجه غلط.
أرسل أدهم قبلة في الهواء لأمجد وبادله هو فعلته، بينما قالت جهاد بغضب طفولي: أنت أخ أنت؟!
ماهر: بذمتك دا منظر بني آدم مش أخ؟
من بين هذا الحوار كان عز متعجبًا من تلك الفتاة التي يبدو عليها ملامح الطفولة حتي في كلامها.. و لكنه سرعان ما أبعد وجهه عنها وقال لنفسه: “هي دي هربانة من مستشفي المجانين ولا إي؟!”.
سمع عز صوتها الطفولي يقول: نورت البيت.
ابتسم عز لها لتظهر غمازاته وقال: شكرًا.
جهاد بهمس لرقية: أمسكيني يا رقية.
رقية بخضة: في إي؟!
جهاد: مش شايفه الغمازات؟ يالهوووي!
بينما يقف الفتيات والشباب يتكلمون بسعادة.. كانت عيون عامر وناصر و سناء و سميرة تتابعهم بفرحة لأنهم تعرفوا علي بعض بسهولة، بل و إن صوت ضحكاتهم علا أركان قصر آل توفيق الذي خيم الحزن عليه سريعًا..
حزنت سميرة و سناء عندما علما بوفاة فيروز، بينما قال ناصر: بس المهم إنهم رجعوا بالسلامة.
سميرة بسعادة: أنا حاسه إني بحلم والله.. مش مصدقة إني شايفاهم.
سناء بابتسامة: هما الاتنين نسخة من حسن و فيروز.
عامر: ربنا يحميهم.. صحيح، فين غادة؟
سناء: مشيت من الصبح وقالت إنها هتيجي علي ميعاد الغدا.
عامر في نفسه: “أحسن برضه”.
قطع حديثهم صوت الخدم يخبرهم بانتهاء إعداد الغذاء ليلتف الجميع حول المائدة في سعادة بانضمام عز و حنين لهم..
اندمج عز مع ماهر و أمجد و أدهم سريعًا، بينما احتفظت حنين بابتسامتها الهادئة و صمتها..
سناء: بصوا.. أنا معرفش أنتوا بتحبوا تأكلوا إي، بس عملت الأكل اللي كانت فيروز بتحبه.
أمجد: أيوة يا بختكوا بقي! دا أنا يوم ما نجحت في الثانوية العامة اتعملي عصير فراولة بس.
فرح: لا لا.. أنت كداب بقي علي فكرة، لأن كان في عصير فراولة و عصير مانجو.
سناء: اتلموا بقي عشان أنتوا عارفين أنا هعمل إي.
رقية: أيوة بقي يا طنط.. يا مسيطرة.
أكملت رقية مداعبة: بس برضه يا طنط.. اشمعنا أمجد كان فراولة و مانجو و أنا مفيش حتي جوافة؟!
جهاد: عشان أنا و أنت فاشلين و جيبنا كلية فنون جميلة مش هندسة زي الدحيحين دول!
سميرة: ما شاء الله.. بقيتي حافظة الكلام أهو.
جهاد: أعمل إي يا عمتو.. بسمعه أكتر ما بأكل.
عامر: أكتر ما بأكلي!! هنكدب بقي؟
ضحك الجميع بقوة بينما قال ماهر: أيوة كدا يا عمو.. سكتها بدل ما هي شغالة لوك لوك من الصبح.
جهاد: طب بذمتك.. في مهندس محترم يقول لوك لوك؟
ماهر: بصراحة بصراحة.. لا.
