قرب أكتر، لحد ما بقى بينهم خطوة واحدة. “ولو قلتلك إني مستعد أخسر الدنيا كلها… وأكسبك؟”
رفعت عينيها لأول مرة، وكان فيهم خوف أكتر من أي حاجة. “بس أنا مش مستعدة أخسرك.”
سكت عز. الكلمة وقفت قلبه.
همست وهي صوتها بيرتعش: “لو حد عرف… هيقولوا الخدامة لفّت على ابن العمدة. وهتبقى سيرتي على كل لسان… وأنا مليش غير سمعتي.”
بص لها بصة طويلة… ولأول مرة، حس إن خوفها أكبر بكتير من حبها.
مد إيده كأنه هيلمس خدها… لكنه وقف قبل ما يلمسها بسنتيمتر.
“أنا عمري ما هسمح لحد يأذيكي.”
ابتسمت ابتسامة كلها وجع. “مش كل الأذى بيتشاف يا سي عز.”
وقبل ما يرد… اتسمع صوت خطوات طالعة السلم… وصوت حد بيقرب من الأوضة.
شهقت غزل وهمست بخوف: “يا نهار أبيض… حد جاي!”
وفي نفس اللحظة… اتحرك مقبض الباب من برّه ……….
اتجمد عز مكانه، وغزل وشها اصفر من الخضة، ولسه هيبعد عنها، الباب اتفتح من بره.
دخل سالم، ابن خال عز، وهو بيضحك. “إيه يا عم… أنا قطعت عليكم ولا إيه؟”
غزل استغلت انشغالهم، وحاولت تعدي من جنبهم. لكن سالم وقفها.
“استني يا بت.”
اتخشبت مكانها. “أيوه يا سيدي.”
بصلها من فوق لتحت وقال وهو بيبتسم: “دي البت الجديدة اللي البلد كلها بتتحدت عنها؟”
رد عز بسرعة ونبرة صوته اتغيرت. “مالك بيها؟”
ضحك سالم وهو رافع إيده. “خير يا خوي… هو أنا بصيت لخطيبتك اياك دي خدامة هتفرج معاك في اية؟”
رد عز بحدة وهو بيبص في عينيه: “في ناس مينفعش حد يبصلهم.”
غزل حست إن الكلام هيولع بينهم، فقالت بسرعة: “عن إذنكم.”
ولسه هتمشي، سالم قال وهو بيبصلها: “اسمك إيه يا بت؟”
ردت وقالت “غزل.”
“اسم على مسمى والله.”
قبل ما ترد، عز قال بنبرة جامدة: “غزل… انزلي شوفي شغلك.”
بصت له لحظة، وفهمت إنه بيحاول يبعدها، فنزلت جري وهي حاسة إن قلبها هيفضحها.
أول ما خرجت، سالم قعد على طرف السرير وهو بيضحك. “إيه الحكاية يا عز؟ أول مرة أشوفك بتغير بالشكل ده.”
“مفيش حكاية.”
“إياك تكدب عليا. احنا متربين سوا، وبعرف عينك زين. الواد لما يحب، عينه بتفضحه.”
سكت عز.
ابتسم سالم بمكر. “يبجى صدجت.”
رد عز بصوت واطي: “بحبها.”
رفع سالم حاجبه بدهشة. “بت مين؟”
“غزل.”
اختفت الضحكة من وش سالم. “الخدامة صوح؟”
هز عز راسه.
قام سالم وقف قدامه. “إوعى تكون فاكر إن الموضوع ساهل. دي دار العمدة، وأبوك اسمه يهز البلد كلها.”
“عارف.”
“ولو خالك منصور عرف، أول واحد هيجولك انسَاها.”
“برضه عارف.”
“وأبوك؟”
ابتسم عز ابتسامة كلها مرارة. “أبويا عمره ما هيوافق.”
سالم تنهد وقال: “يبجى من دلوجتي اجطع الحكاية دي قبل ما تكبر.”
وقبل ما عز يرد… اتفتح الباب مرة تانية من غير استئذان.
دخل راجل في أواخر الخمسينات، هيبته مالية المكان، وعصايته بتخبط في الأرض خبطة تهز القلوب.
كان هو العمدة رجب.
بص لعز، وبعدين لسالم. “كويس إنكم الاتنين موجودين.”
وقفوا الاتنين في لحظة.
قال العمدة بصوت ملهوش رد: “بعد المغرب هيتجمع كبار البلد كلهم في المندرة… عشان أعلن خبر مهم يخص عز.”
سالم ابتسم وقال: “خير يا خالي.”
لكن العمدة كانت عينه ثابتة على ابنه. “خير إن شاء الله… الليلة هعلن ميعاد خطوبة عز على بنت مأمور البلد متعلمة في بلاد برا وابوها محلتوش غيرها وكل املاكة باسمها.”
اتجمد عز، وكأن الأرض انسحبت من تحت رجليه.
وفي نفس اللحظة… كانت غزل واقفة بره الأوضة، ماسكة صينية الشاي، وسمعت كل كلمة… فوقعت الصينية من إيديها، ودوى صوت تكسير الكبايات في السرايا كلها.
انجي الخطيب يتببببع
رن صوت تكسير الكبايات في السرايا كلها، فلف العمدة رجب راسه ناحية الباب وهو مكشر. “مين اللي بره؟”
اتجمدت غزل مكانها، وعينيها مليانة دموع، ومقدرتش تنطق.
فتح سالم الباب، وبص لها وقال: “البت غزل يا خالي… الصينية وقعت من يدها.”
زجرها العمدة بنظرة حادة. “هو الشغل بقى بالهوجة دي؟”
نزلت غزل راسها وقالت بصوت مخنوق: “حقك عليّ يا سعادة البيه… غصب عني.”
قبل ما العمدة يرد، عز اتحرك خطوة لقدام. “أنا اللي خضيتها يا بوي… كنت فاتح الباب مرة واحدة.”
بصله العمدة باستغراب. “من إمتى وإنت بتدافع عن الخدم يا حضرة الظابط؟”
اتشد فك عز، لكنه حاول يسيطر على نفسه. “الغلط يتشال على اللي عمله.”
العمدة سابه من غير رد، وبص لغزل. “لمي الازاز، وبعدها روحي شوفي شغلك.”
“حاضر يا بيه.”
ركعت غزل على الأرض تجمع إزاز الكبايات، لكن إيديها كانت بترتعش.
وفجأة… “آه!”
شهقت وهي سحبت إيديها، والدم بدأ ينزل من صباعها.
عز نزل بسرعة على ركبته قدامها، ومسك إيديها. “وريني.”
حاولت تسحب إيديها. “سيبني يا سي عز… الناس باصة.”
لكنه مكنش سامع غير صوت أنفاسها. طلع منديله وكتم بيه الجرح. “الدم بينزل كتير.”
العمدة كان واقف بيتفرج، وعينه ضاقت. أما سالم… فبدأ يحس إن اللي بينهم أكبر من مجرد شفقة.
في اللحظة دي، دخلت بنت لابسة عباية سماوي، ملامحها هادية، لكن فيها كبرياء واضح.
أول ما شافت عز ماسك إيد غزل، وقفت مكانها. “السلام عليكم.”
رفع عز راسه بسرعة. “وعليكم السلام.”
