سابهم واتحرك بخطوات واسعة ومرعبة، رمى عبايته على كتافه ونزل السلم طيران، وقلبه مقبوض وكأن فيه لهيب ولعة في صدره. خرج من السرايا في الظلمة، وعينه بتدور في كل زاوية، مستعد يفعل المستحيل عشان يلاقيها.
أول ما عز نزل درجات السرايا بخطوات سريعة، كان لسه هيتحرك ناحية البوابة، لكن صوت العمدة رجب شق المكان كله. “عــــــــــــز!” وقف عز مكانه، ولف ببطء. العمدة كان واقف في نص الدوار، وهيبته مالية المكان، وكل الخدم والغفر وقفوا ساكتين.
قرب منه بخطوات ثابتة، وقال بصوت واطي، لكنه كان أشد من الصريخ: “إنت رايح فين؟” رد عز من غير ما يتهرب من عينه: “هدور على غزل.” العمدة ضحك ضحكة قصيرة، كلها غضب. “وسايب عروستك في ليلة فرحك؟” “البت مختفية يا بوي.” “تبقى رجالة الدوار تدور.” “وأنا أول واحد من رجالة الدوار.” العمدة قرب لحد ما بقى وشه قصاد وش ابنه. “دلوجتي… إنت مش ظابط.” سكت ثانية، وكمل: “إنت عريس.” رد عز بحزم: “وده يمنعني أقوم بواجبي؟” “واجبك دلوجتي جوه أوضتك… مع مراتك.” هز عز راسه بالنفي.
“لو غزل في خطر، مش هعرف أقعد دقيقة.” اتبدلت ملامح العمدة. وقال بنبرة كلها تحذير: “الاسم ده… متجبوش على لسانك الليلة.” رد عز بسرعة: “وليه؟” “عشان دي خدامة.” “لا… دي إنسانة.” العمدة ضرب عصايته في الأرض. “كفاية!” لكن عز ما سكتش.
“كل مرة يحصل لها حاجة… حضرتك أول واحد تمنعنا نقرب.” “عشان أنا أعرف مصلحتكم.” “ولا عشان في حاجة مستخبيها؟” الصمت نزل على المكان. كل اللي واقفين حسوا إن الكلام بقى أخطر من الأول. العمدة لف ناحية الغفر. “سيبونا.” في ثواني، الدوار فضي. بقي الأب وابنه واقفين قصاد بعض.
قال العمدة: “تعالى ورايا.” طلع قدامه ناحية المكتب. دخل الأول، واستنى عز يدخل، وبعدها قفل الباب بنفسه. لف الكرسي ناحية ابنه. “اقعد.” فضل عز واقف. “أنا مرتاح إكده.” ابتسم العمدة ابتسامة باهتة. “أبوك بيكلمك… ولسه واقف؟”
رد عز بهدوء: “قول اللي عندك.” سكت العمدة شوية، وكأنه بيدور على الكلمات. “إنت فاكر إن الرجولة إنك تمشي ورا قلبك؟” “لأ.” “أمال إيه الرجولة عندك؟” “إني محطش راسي على المخدة وأنا عارف إن في حد محتاجني وسيبته.” العمدة بصله طويل. “إنت اتغيرت يا عز.” “يمكن… ويمكن أنا بدأت أشوف حاجات مكنتش شايفها.” “زي إيه؟” “زي إن كل ما اسم غزل يتجاب… حضرتك تتوتر.” العمدة ملامحه جمدت. “دخل البت دي حياتنا كان غلط.” “غلط على مين؟” “علينا كلنا.” “ليه؟” العمدة قرب من المكتب، وحط كفه عليه بقوة.
“متسألنيش السؤال ده تاني.” “هفضل أسأله… لحد ما ألاقي إجابته.” العمدة أخد نفسً عميقً، وقال بصوت منخفض: “إسمعني زين يا عز… من النهارده، ملكش أي علاقة بغزل.” اتشدت ملامح عز. “وده أمر؟” “أمر.” “ولو رفضت؟” رفع العمدة عينه في عين ابنه. “يبقى هتخليني أعمل حاجة عمري ما تمنيت أعملها.” “إيه هي؟” قالها العمدة ببطء، وكل كلمة كانت أثقل من اللي قبلها: “هخرج غزل من الدار… ومش هتدخلها تاني طول ما أنا عايش.” اتجمد عز مكانه. عرف إن أبوه مش بيهدد… وإنه لو قال كلمة، هينفذها فعلًا. وقبل ما يرد… اتفتح باب المكتب من غير استئذان.
دخل الغفير منصور وهو بينهج، ووشه كله تراب. “يا عمدة… ملقناش ليها اي اث عز سأل الغفير “فين غزل؟” الغفير هز راسه. “ملقينهاش… بس لقينا طرحتها مرمية عند الترعة.. والعمدة لأول مرة، اختفى لون وشه، وكأن الخبر أكد أسوأ حاجة كان خايف منها.
جري عز من قدامة ومستناش يقولة اي كلمة.. …….. كانت شوارع البلد غارقانة في سكون الليل، ظلام كثيف بيبتلع كل حاجة حواليه، لا يُسمع فيه غير نباح كلاب بعيد، وصوت الهوا وهو يشق زرع الذرة في الحقول كأنه بيهمس بسر محدش يعرفه.
يه كانت بتفتش كل شبر قدامه بعين ظابط متعود يطارد المجرمين… لكن الليلة دي ماكانش بيدور على مجرم. كان بيدور على قلبه. دقات قلبه كانت عنيفة بشكل عمره ما حس بيه قبل كده. اشتغل في أخطر القضايا، وشاف الموت بعنيه أكتر من مرة، لكن الخوف اللي كان بياكله دلوقتي كان مختلف… خوف راجل حاسس إن أغلى إنسانة عنده ممكن تضيع منه.
ضيق عينيه، ورفع الكشاف ناحية الحركة، وفي نفس اللحظة اتحرك بخطوات هادية وحذرة، وغريزة الظابط اللي جواه خلت إيده تستعد لأي خطر ممكن يقابله. كل ما قرب… كل ما قلبه كان بيدق أسرع. ولما لف من ورا الركن… وقف مكانه. اتسمرت رجليه في الأرض.
غزل… كانت قاعدة ورا كومة كبيرة من حطب القش، ضامة رجليها لصدرها، وساندة راسها على دراعاتها، وجسمها كله بيترعش من البرد والخوف، بينما شهقات عياطها المكتومة كانت بتقطع القلب. في اللحظة دي… نور الكشاف نزل من إيده، وانطفى.
والغضب اللي كان مولع جواه من ساعة ما عرف باختفائها… انطفى هو كمان. فضل واقف يبصلها ثواني، قلبه بيتقطع وهو شايفها بالحالة دي. نزل على ركبته قدامها بهدوء، ومد إيده ولمس كتفها برفق، كأنه خايف حتى لمسته توجعها.
وقال بصوت مليان حنان لأول مرة: “بتعملي إيه إهنه يا غزل؟ إزاي قاعدة لوحدك في نص الليل والبرد ده؟” رفعت راسها ببطء. كانت عيونها حمرا من كتر البكا، ورموشها مبلولة، وشعرها مبعثر على وشها. أول ما شافته… انهارت.
بصتله بنظرة وجع، وقالت بصوت متكسر: “أنا… أنا مقدرتش أفضل جوه السرايا… كل ما أسمع الزغاريد أحس إن كل حاجة انتهت… سمعتهم وهما بيقولوا إن الفرح خلص… وإنك بقيت راجل واحدة غيري… مقدرتش أشوفك معاها… ولا قدرت أستحمل إني أفضل قريبة منك وأنا ماليش حق حتى أبصلك.”
