بصيت للحتة الصغيرة اللي كلها دهن، وقلبي اتقبض، وقلت بصوت مكسور: دي لحمة يا ماما؟ وانا والدة المفروض ماكلش لحمة اكل فراخ قالتلي كلي وبلاش دلع بس يا ماما دي كلها دهن مفيهاش حتة صافية تتاكل! وأنا لسه والدة، وجسمي محتاج أكل، والبيبي محتاج يرضع.
وشها اتغير في لحظة، وكأن كلامي إهانة ليها، وردت بعصبية: إنتِي بتعايريني بالأكل اللي بجيبهولك؟! ده أنا سايبة بيتي، وبخدمك، وبطلعلك الأكل لحد عندك، وفي الآخر مش عاجبك؟!
اتصدمت من كلامها، وحسيت بدموعي بتنزل لوحدها.
أنا اللي من يوم ما اتجوزت وأنا بخدمها، وأعاملها زي أمي، وأسبق طلباتها قبل ما تنطق، كنت فاكرة إن وقت ضعفي هلاقي منها الحنية اللي كنت بتمناها من أمي، لكن اكتشفت إن كل اللي قدمته ليها طول السنين دي ممكن يختفي قدام أول موقف أحتاج فيه منها حاجة.
حاولت أبلع غصة في حلقي، وقلت: والله يا ماما ما كان قصدي أزعلك، أنا بس جعانة وتعبانة، ومش قادرة أقوم أعمل لنفسي حاجة. أنا لو كنت أقدر أقوم، مكنتش استنيت حد.
ردت وهي بتتحرك ناحية الباب: خلاص، كلي اللي قدامك، ولما تجوعي تاني ابقي كلي اي حاجة وقومي واتحركي لا انتي اول ولا اخر واحدة تولد! هو أنا هفضل طول اليوم طالعة نازلة عشانك؟ عندي بيت ومسؤوليات، ومش فاضية أفضل واقفة على طلباتك!
وقبل ما أقدر أرد، خرجت وقفلت الباب وراها.
فضلت باصة للطبق، والدموع مغرقة وشي، وابني بيعيط جنبي، وأنا مش عارفة أواسيه ولا حتى أواسي نفسي.
أكلت بالعافية الاربع صوابع محشي وحاولت آكل من حتة اللحمة، لكن طعم الدهن فيها كان صعب مقدرتش.
والأصعب من كل ده، إنها سابتني على الطبق ده طول اليوم، لا طلعتلي أكل تاني، ولا سألت إذا كنت محتاجة أشرب أو أتحرك، ولا حتى دخلت تطمن على حفيدها.
يعني الطبق ده كان المفروض يبقى فطاري وغدايا وعشايا!
فضلت أحاول أهدي ابني وأرضعه، وكل شوية أبص للموبايل وأفكر أكلم جوزي وأحكيله اللي حصل، لكن كنت خائفة أكون سبب في مشكلة بينه وبين أمه، وكنت لسه متمسكة بفكرة إنها مهما قست عليا، في الآخر دي أمه، وإنه أكيد مش هيقبل يشوفها بصورة وحشة.
لكن مع مرور الساعات، بدأت أحس إن اللي حصل مش مجرد إهمال، وإن فيه حاجة جوايا اتكسرت ومش هترجع بسهولة.
عدي اليوم وجوزي رجع ومحكتش ليه اي حاجة ولاقيتة كان جايب عشا معاه كلت حتي هو لاحظ اني باكل بسرعة وبنهم استغرب قالي انتي جعانة اوي كدا هو امي مطلعتش اكل ليكي ولت اية قولتلة كتر خيرها طلعت بس الرضاعة بتجوع قالي الف هنا يا حبيتي.
انجي_الخطيب
تاني يوم قبل ما ينزل طلبت منه يسباي اكل قبل ما يمشي واتحججت اني بتكسف اتصل بمامتة تطلعلي فقولتلة اكل ساندوتش لحد ما تطلع براحتها وفعلا عملي ساندوتشات وسابها جنبي اكلت واخدت الدوا واخدت مسكن عشان اقدر اقوم وانحرك واللي كنت عاملة حسابة حصل حماتي مطلعتش ليا نهائي.
وقرب المغرب حماتي فتحت باب الشقة ودخلت ابني كان نايم عملت نفسي نايمة انا كمان بصت علينا في الاوضة وقالت بصوت واطي لانها مفكراني نايمة نامي ياختي اكل ومرعي وقلة صنعة ما هو اللي يلاقي دلع وميدلعش تحرم عليه عيشتة وقفلت الباب وخرجت فكرتها نزلت شقتها لكن سمعت صوت حماتي في الصالة وهي بتتكلم في التليفون وكان صوتها واضح لدرجة إني قدرت أسمع كل كلمة بتقولها.
في الأول ماكنتش مركزة، لحد ما سمعتها بتقول جملة خلت جسمي كله يقشعر، وإيدي تتجمد على ابني.
قالت بصوت واطي، وهي فاكرة إن محدش سامعها: أيوه، أنا عملت اللي اتفقنا عليه… بس المشكلة إن البنت لسه مش فاهمة إحنا ناويين على إيه، ولا تعرف إن اللي جاي أصعب بكتير من اللي شافته امبارح والنهارده!
وقفت عن الكلام لحظة، وبعدها ضحكت ضحكة خفيفة خلت قلبي يدق بعنف.
ما تقلقيش هنخلص منها أنا هتصرف معاها بطريقتي… وقبل ما ابني يرجع، كل حاجة هتكون اتظبطت.
حسيت إن نفسي اتسحب مني.
مين اللي بتكلمها؟ وإيه اللي اتفقت عليه؟ وإيه اللي ناوية تعمله معايا قبل ما جوزي يرجع؟
فضلت قاعدة مكاني، بحاول أستوعب اللي سمعته، لكن قبل ما أقدر أتحرك أو حتى أفكر أكلم جوزي، سمعت خطواتها بتقرب من أوضتي من جديد.
وبعدين مقبض الباب اتحرك ببطء…
والباب بدأ يتفتح، وأنا لأول مرة من يوم ما اتجوزت ابنها، حسيت بخوف حقيقي من الست اللي كنت طول الوقت بقول عليها أمي التانية.
انجي_الخطيب
أول ما الباب اتفتح، غمضت عيني بسرعة، وشديت ابني لحضني، وعملت نفسي نايمة، لكن قلبي كان بيدق بعنف لدرجة إني كنت خائفة حماتي تسمع دقاته. سمعتها بتدخل الأوضة على أطراف صوابعها، وبعدها وقفت جنب السرير، وسكتت شوية كأنها بتتأكد إني فعلًا نمت. وفجأة حسيت بإيدها بتتحرك ناحية ابني. جسمي كله اتشد، وكنت هفتح عيني وأصرخ فيها، لكني سمعتها بتهمس: لسه صغير ومش فاهم حاجة… يا حرام، ذنبه إيه في اللي أمه بتعمله؟
