قررت أدوق مرات بابا اللي عملته زمان في ماما.
أنا اتربيت من صغري على بابا مش موجود أغلب الوقت، ولما كبرت شويه عرفت إنه متجوز واحدة تانية وبيروحلها أغلب الوقت، وبيجلنا كل أسبوع يوم أو اتنين.
ماما وافقت عشان خاطرنا.
لما كبرت شويه بقيت أشوف الفرق في المعامله بين ماما ومراته الجديدة، حتى بنتها اللي مش من صلبه زيي كان بيعاملها أحسن مني ويفضلها عليّ في كل حاجة.
مهما حاولت أتكلم أو آخد حق ماما، كانت ماما بتوقفني وتقولي استحملي، أنا عايشة معاه عشانكم لحد ما أجوزك وأفرح بيكي.
لكن جوايا فضل غيظ وغل، وقررت إني في يوم لازم أردلها اللي عملته أضعاف مضاعفة.
لما ارتبطت سمر بنت مرات بابا، سبتها وماتدخلتش، بس عرفت إنه عريس متريش وجايبلها كل اللي هي عايزاه.
من وقتها قررت إني أردلهم كل اللي عملوه في ماما عن طريقه.
من يوم الفرح كنت بتعمد أبصله نظرات إعجاب من بعيد لبعيد، كنت عايزاه يلاحظ وجودي.
لما بيتعزموا عند بابا كنت أنزل عند بابا في نفس اليوم بحجة إني عايزة فلوس للمدرسة، ولما أشوفه أفضل قاعدة معاهم أضحك وأهزر معاه.
وفي يوم طلبت منه رقمه لأني عايزاه في موضوع مهم.
اتصلت بيه وطلبت منه يشوفلي شغل معاه في الشركة لأني محتاجة فلوس.
ولما سألني: هو باباكي مش بيصرف عليكوا كويس؟
قلتله: لأ، مش بيصرف، يادوب بيدينا على أد الأكل والشرب، لأن سعاد والدة مراته بتمنعه إنه يصرف علينا.
مرت المكالمات بينا، وبقيت أحكيله اللي بابا كان بيعمله معانا عشان خاطر سمر ومامتها، وإنه جهزها هي وأنا بنته ولا عبرنا.
بعدها أدهم جابلي شغل معاه في الشركة، وقربنا جدًا من بعض، وبدأ يحكيلي مشاكله مع سمر، وإنها فعلًا أنانية ومش عايزها، لكن سايبها على زمته عشان القايمة والمؤخر.
استغليت الوضع أكتر، وكنت بسمعه وأهون عليه.
وفي مرة عرض عليّ الجواز، وقالي نتجوز في شقة إيجار وهيجبلي كل اللي أنا عايزاه.
بدأت في جو المسكنة، وقلتله إني موافقة أعيش معاه في أي مكان، وعرضت عليه اتجوز في شقته مع سمر.
هو وقتها وافق بدون أي اعتراض، وفرح إني حاسة بيه.
أنا مكنتش بحب أدهم، ولا كان فارق معايا هو راجل كويس ولا وحش.
كل اللي كان شاغلني إني أشوف سمر وهي بتدوق من نفس الكاس اللي أمها دوقته لماما زمان، وأشوفها وهي بتتحرم من الدلال اللي اتعودت عليه، وتعرف يعني إيه واحدة تانية تشاركها في جوزها وبيتها.
اتجوزنا أنا وأدهم عند محامي عشان أجبر بابا يوافق على جوازنا رسمي.
وفعلًا بابا الأول اعترض وانهار، ومراته وسمر بقوا يسخنوه، لكن عشان الفضايح وافق مرغم.
وفعلًا نقلت شقة أدهم، ووقتها عذاب سمر بدأ.
كنت بتعمد أذلها وأغيظها.
أول حاجة عملتها حطيت هدومها في شنطة زبالة ورمتها في أوضة الأطفال الصغيرة.
طلبت من أدهم إن مصرف البيت كله يبقى في إيدي، تعويض ليه عشان وافقت اتجوز بالوضع ده.
كنت أي حاجة أقولها أو أطلبها تبقى مجابة بشوية حنية.
حاولت سمر تقرب منه زي ما أمها كانت بتعمل، لكن كانت بتقابل بالصد من أدهم.
كنت في حياته كل حاجة.
يدخل الشقة وجايبلي الأكل اللي بحبه، بما كانت سمر تطلب منه حاجة كان بيتجاهلها نهائي.
كانت تشوفنا وأحنا سهرانين سوا، وبياكلني في بوقي، ويقوم بنفسه يعملي الحاجة اللي بحبها.
كان طول الوقت يسمعني أحلى كلام، ويبوس إيدي قدامها، ويتجاهل وجودها.
من جوايا كنت أسعد واحدة.
واللي عملته بعد كده معاها كان أكبر من كل اللي فات.
بقلم أماني سيد.
الجزء الثاني
كنت فاكرة إني لما أشوف سمر مكسورة ومقهورة زي ما أمي كانت مكسورة زمان، هحس إني أخدت حق أمي، وإن النار اللي جوايا هتطفي أخيرًا.
لكن اللي ماكنتش أعرفه إن الانتقام لما بيدخل القلب، بيخلي صاحبه مش شايف غير الوجع اللي عايز يسببه لغيره، وينسى إنه ممكن في لحظة يخسر نفسه كمان.
في يوم كنت قاعدة في الصالة، وأدهم جنبي، بنشرب القهوة ونتفرج على التلفزيون، وفجأة سمر خرجت من أوضتها وهي لابسة ونازلة.
أدهم بص لها من فوق لتحت وقال ببرود: رايحة فين؟
ردت عليه وهي بتحاول تتمالك أعصابها: رايحة عند ماما، بقالي كتير ماشوفتهاش.
قال لها من غير ما يبصلها: براحتك، بس ماتتأخريش، عندي شغل بكرة.
بصت له بوجع، وبعدها عينيها راحت عليا، وأنا كنت قاعدة جنبه ومسنودة على كتفه، وبابتسامة هادية قلت لها: خلي بالك من نفسك يا سمر، ولو محتاجة أي حاجة قوليلي، إحنا بقينا أهل دلوقتي!
ضحكت ضحكة صغيرة، ضحكة كلها شماتة، لكن سمر ما ردتش، وخرجت وقفلت الباب وراها.
أدهم بص لي وقال: إنتِ إزاي طيبة كده معاها بعد كل اللي بتعمله؟
ابتسمت وقلت: أصل أنا مش بحب أزعل حد، وبعدين دي مراتك، ولازم أحترمها.
ضحك أدهم وقال: مراتى على الورق بس، إنما إنتِ اللي مالية عليا حياتي.
الكلام ده كان المفروض يفرحني، لكن الغريب إني لأول مرة حسيت بحاجة غريبة جوايا.
يمكن عشان أدهم كان بيتكلم عن سمر كأنها ولا حاجة، مع إنها في يوم من الأيام كانت إنسانة ليها قلب ومشاعر، حتى لو كانت مغرورة ومتعودة تاخد كل حاجة لنفسها.
بس بسرعة طردت الفكرة من دماغي.
أنا مش جاية هنا عشان أحن عليها، أنا جاية عشان أرجّع حق أمي.
وده اللي كنت بقوله لنفسي كل يوم.
بعد أسبوع، بابا اتصل بيا.
أول ما شفت اسمه على الموبايل، استغربت، لأن بابا عمره ما كان بيتصل بيا إلا لو محتاج حاجة أو عايزني أروح له.
رديت: أيوه يا بابا.
