“يا عاقر! مش كفاية إنهم رجعوكي قدام الناس كلها؟ ما صدقنا خلصنا منك! ما قعدتيش كام سنة ورجعتيلنا مطلقة مين هيرضى بيكي دلوقتي؟ ومين هييجي يطلب إيدك للجواز؟ إنتِي عارفة إننا في بلد صغيرة والأخبار فيها بتنتشر أسرع من في القش!”
“بصيت لمرات أبويا بعيون مليانة دموع وقلبي بيتقطع من القهر. كنت حاسة إن كل كلمة بتقولها بتغرز سكينة في صدري، ومع ذلك حاولت أتماسك وأدافع عن نفسي. يا مرات أبويا هو أنا ذنبي إيه؟! أنا عملت إيه عشان أستاهل كل اللي حصلي ده؟!”
“أنا عشت معاه تلات سنين بخدم العيلة كلها. بغسل وأطبخ وأنضف تحت البهايم وأأكل الطيور وأزرع معاه الأرض كمان! كنت بقضي اليوم كله واقفة على رجلي لحد ما رجلي ما كانتش بتشيلني من التعب. وفي آخر اليوم كنت بنام وأنا قاعدة من كتر التعب.”
“عمري ما اشتكيت ولا اتكلمت بكلمة وحشة. كنت بعمل كل اللي أقدر عليه عشان أرضيه وأرضي أمه!” شهقت وأنا بمسح دموعي بطرف طرحة رخيصة كنت لسه لابساها من يوم ما رجعت بيت أبويا. “عارفة يا مرات أبويا كانوا بيأكلوني إيه؟”
“رغيف عيش واحد في اليوم وعليه حتة جبنة! أيوه والله! كنت بشوف الأكل قدامي ومقدرش أمد إيدي عليه لأن الأكل للراجل بس! كنت بستحمل الجوع والإهانة وأقول معلش يمكن ربنا يكرمني وأفرح زي أي ست في الدنيا.”
“ولما اتأخرت في الحمل روحت الوحدة الصحية وعملت كل التحاليل اللي طلبوها مني ومطلعش عندي أي حاجة! فضلت ساكتة سنين ومستحملة كلام أمه وإهاناتها لحد ما طلبت منه مرة واحدة بس إنه يروح يكشف هو كمان.” سكت لحظة وبلعت غصة وقفت في زوري وأنا بفتكر اليوم اللي حياتي اتقلبت فيه.
“عارفة عمل إيه؟! بدل ما يسمعني ويطمن قلبي مد إيده عليا وضربني! وبعدها جرجرني من شعري لحد بره البيت ورماني في الشارع قدام الناس وقال لي: إنتِي طالق! ملكيش لازمة عندي! أنا راجل ومفيش حاجة تعيبني!” ضربت على صدري بإيدي وأنا بصرخ من الوجع.
“تلات سنين يا مرات أبويا! تلات سنين من عمري ضاعوا وأنا بحاول أثبت إني ست كويسة وإن العيب مش فيا! وفي الآخر اترميت في الشارع كأني كلبة ملهاش صاحب! رجعت بيت أبويا مكسورة ومش عارفة حتى أرفع عيني في عين حد.”
“ودلوقتي بدل ما تطيبوا خاطري وتقولوا لي معلش يا بنتي ربنا يعوضك بتعاملوني كأني أنا اللي عملت الفضيحة!” مرات أبويا عقدت إيديها قدام صدرها وبصت لي من فوق لتحت ببرود. “خلصتي؟! الكلام ده كله مش هيغير الفضيحة اللي حصلت. الناس مش هتسأل مين الغلطان.”
“الناس هتقول بنت فلان اتطلقت عشان مبتخلفش. وإحنا مش ناقصين كلام الناس ولا عايزين حد يعايرنا بيكي.” بصيت لها بصدمة وكأني بسمعها لأول مرة. “يعني إنتِي عايزاني أعمل إيه؟!” صرخت في وشي وقالت: “لمي لسانك يا بت! إنتِي ناسية نفسك؟”
“ده بيت أبوكي مش فندق تقعدي فيه براحتك! من النهارده مفيش أكل ولا شرب غير لما تخلصي شغل البيت كله. وطالما رجعتي لنا من غير عيال يبقى على الأقل تنفعي نفسك بشغلك!” حسيت إن الدنيا بتلف بيا.
حتى أبويا اللي كنت مستنية يجري عليا ويحضني ويسألني مين وجع قلب بنته كان واقف عند باب الأوضة ساكت. بصيت له برجاء وقلت بصوت مبحوح: “ابويا … إنت كمان شايف إني أستاهل كل اللي ده؟ أنا بنتك أنا ماليش غيرك!”
أبويا نزل عينه في الأرض واتنهد من غير ما يرد. ومرات أبويا ابتسمت ابتسامة انتصار وهي بتول: “أبوكي عارف مصلحتك أكتر منك. وبعدين إنتِي فاكرة إن طليقك طلقك من غير سبب؟ أكيد فيه حاجة إنتِي مخبياها علينا!” الكلمة نزلت عليا زي الصاعقة.
رفعت عيني لها وكنت لسه هرد عليها لما سمعت صوت خبط عنيف على الباب. أبويا اتحرك يفتح وهو بيتمتم بضيق. لكن أول ما الباب اتفتح سمعت صوت راجل غريب بيقول: “مساء الخير يا حاج. أنا جاي أسأل عن بنتك المطلقة. وعندي كلام مهم لازم تعرفه قبل ما توافق على أي حاجة تخصها.”
مرات أبويا بصت لي بسرعة وتبدلت ملامحها من الغضب للدهشة. أما أنا فقلبي بدأ يدق بعنف وأنا بحاول أفهم مين الراجل ده وإزاي عرف حكايتي.
الباب اتفتح على آخره، وظهر شاب طويل وعريض الكتاف، بشرته بيضا مائلة للحمرة من شمس الغيطان، ولابس جلابية بلدي نضيفة وشبشب في رجله، وفي إيده عصاية خشب كان بيتسند عليها وهو واقف. ملامحه كانت جامدة، وعينيه ثابتة بنظرة تخلي أي حد يفكر ألف مرة قبل ما ينطق بكلمة مش على هواه.
كان باين عليه إنه في أوائل التلاتينات، ووشه رغم هدوئه كان فيه حدة وهيبة تخلي أي حد يحسب له ألف حساب. أبويا بص له باستغراب وقال: “أيوه يا ابني، خير؟ إنت مين وعايز إيه؟” الشاب عدل وقفته، وبص لأبويا مباشرة وقال بصوت ثابت: “أنا اسمي جابر يا حاج، جابر عبد الرحيم.”
“عندي أرض على طرف البلد، وبيتي معروف هناك جنب الساقية القديمة. وجاي لك في طلب، ومش هلف ولا هدور حواليه.” مرات أبويا ظهرت من ورا أبويا، وأول ما سمعت اسمه، ملامحها اتغيرت، وبصت له من فوق لتحت وهي بتهمس: “جابر عبد الرحيم؟! بتاع الأرض اللي على الترعة؟”
لف جابر عينه ناحيتها وقال ببرود: “أيوه، أنا هو يا حاجة، والاسم مش غريب عليكي يعني.” بلعت ريقها وسكتت، وأبويا وسع له الباب وقال: “اتفضل يا ابني، ادخل. البيت بيتك.” جابر دخل بخطوات هادية، وقعد على طرف الكنبة الخشب اللي جنب الحيطة، وحط العصاية جنبه، وبعدها رفع عينه لأبويا وقال: “أنا جاي أطلب إيد بنتك على سنة الله ورسوله.”
حسيت إن الأرض بتتهز من تحتي، ورفعت راسي بسرعة أبص له، مش مصدقة اللي سمعته. حتى مرات أبويا فتحت بوقها من الصدمة، وبعدها ضحكت ضحكة قصيرة مليانة سخرية وقالت: “إنت بتقول إيه يا راجل إنت؟! إنت جاي تطلب إيد المطلقة دي؟!”
جابر لف وشه ناحيتها ببطء، ونظرته اتغيرت في لحظة. “ممكن أعرف بتضحكي على إيه يا حاجة؟” اتلجلجت شوية، لكنها حاولت تداري ارتباكها وقالت: “أصل يا ابني البنت دي لسه راجعة من جوازة فاشلة، ومطرودة من بيت طليقها عشان مبتخلفش، والله أعلم عملت إيه تاني!”
“ربنا يستر علينا وعليها. ومشاكلها كتير، والبلد كلها عارفة حكايتها. إنت شكلك راجل محترم، وأكيد تقدر تتجوز واحدة أحسن منها، واحدة صغيرة وتجيب لك عيال تفرح بيهم.” جابر سكت ثواني، وبعدين سند ضهره للكنبة وقال: “هو أنا جيت أسألك رأيك في اختياري؟ ولا جيت أطلب البنت من أبوها؟”
