من يوم ما سلفتي نجلاء بقت أرملة، وحياتي اتقلبت رأسًا على عقب، مش بسبب حزنها ولا لأنها بقت مسؤولة عن طفل صغير لوحدها، لكن بسبب حماتي اللي قررت إن ابنها لازم يعوض نجلاء عن جوزها اللي مات، وإن أنا لازم أتحمل نتيجة القرار ده من غير ما يكون ليا حق الاعتراض.
نجلاء جوزها مات فجأة بعد أزمة قلبية، وساب لها ابن عنده أربع سنين، ومن يومها وحماتي مش سايباها لحظة. في الأول، كنت مقدرة حزنها، وكنت أنا اللي ببعت لها الأكل وأتصل أطمن عليها، ولما محمود كان بيبعت لها فلوس من غير ما يقولي، كنت بعدّي الموضوع وأقول لنفسي إن دي ظروف استثنائية ولازم نقف جنبها.
لكن اللي حصل بعد كده خلاني أحس إن الموضوع مبقاش مساعدة أرملة محتاجة سند، وإنما بقى كأن نجلاء هي الزوجة، وأنا مجرد ست موجودة في البيت بتنفذ أوامر حماتي.
بقت حماتي تتصل بمحمود كل يوم، مرة عشان نجلاء محتاجة فلوس، ومرة عشان ابنها محتاج لبس، ومرة عشان نفسها تخرج تغير جو ومفيش حد يخرجها. ومحمود، من غير ما يفكر في ظروفنا، كان بينفذ كل طلباتها.
ولما حاولت أتكلم معاه، قال لي بكل بساطة:
ـ يا سارة، دي أرملة يا حبيبتي، يعني عايزاني أسيبها لمين؟ أخويا مات وسابها أمانة في رقبتي.
رديت عليه وأنا بحاول أسيطر على أعصابي:
ـ وأنا عمري ما قولتلك سيبها، ولا اعترضت على مساعدتك ليها، بس إنت بقيت شايل مسؤوليتها بالكامل، وكأنها بنتك، وإحنا عندنا بيت وولاد ومصاريف، ولازم يبقى فيه حدود.
بصلي بضيق وقال:
ـ حدود إيه اللي بتتكلمي عنها؟ دي مراتي أخويا الله يرحمه، وأم ابن أخويا، يعني مش واحدة غريبة عننا!
كنت هرد عليه، لكن تليفونه رن، وكانت حماتي، وأول ما رد سمعتها بتقوله:
ـ محمود، أنا تعبت يا ابني، ومش قادرة أفضل شايلة نجلاء والولد لوحدي. إنت لازم تاخدهم عندك، وأنا مش هرتاح غير لما أطمن إنهم في عينك.
اتسمرت مكاني وأنا ببص له، مستنية أسمع رده، لكنه قال بمنتهى الهدوء:
ـ حاضر يا أمي، اعتبري الموضوع خلص. هستناكى تيجى انتى وهى
قفل المكالمة وبصلي وقال:
ـ جهزي أوضة الأطفال نجلاء هتيجى تقعد معانا
ـ تقعد عندنا إزاي؟ وإنت أخدت رأيي في القرار ده إمتى؟
رد ببرود:
ـ هو أنا هاخد رأيك في إني أقف جنب مرات أخويا الله يرحمه؟
قلت له وأنا بحاول أتمالك نفسي:
ـ طب ما تأجر لها شقة قريبة مننا، وإحنا نساعدها ونبقى جنبها،
اتغيرت ملامحه وقال بحدة:
ـ إنتِ بتفكري في نفسك وبس! بدل ما تحتويها وتعتبريها أختك،
تانى يوم حماتى جت ومعاها نجلاء وابنها وشنطهم، وكأن كل حاجة اتقررت وانتهت من غير ما يكون ليا رأي.
دخلت نجلاء وهي شايلة ابنها، وبعدها بصتلي وقالت:
ـ معلش يا سارة، عارفة إني هبقى حمل عليكي، بس والله غصب عني، أنا ماليش حد بعد جوزي غير محمود وماما.قصص وروايات أمانى سيد
كنت لسه هرد عليها، لكن حماتي سبقتني وقالت:
ـ حمل إيه بس يا بنتي؟ ده بيت أخو جوزك، يعني بيتك، وإنتِ مش محتاجة تستأذني فيه.
وبعدين بصتلي أنا تحديدًا وأضافت:
ـ وأنا عايزة أقولك حاجة يا سارة، نجلاء دي أمانة عندنا، وجوزها مات وسابها غلبانة، ومش عايزاها تحس في يوم إنها غريبة وسط أهلها. يعني مش كل شوية نسمع كلام عن الخصوصية والمصاريف، لأن اللي هتشيله على كتفك النهارده، ربنا هيعوضك عنه بكرة
لكن اللي وجعني بجد، إني لما دخلت المطبخ أجهز الغدا، سمعت حماتي بتتكلم مع نجلاء، وكانت فاكرة إني مش سامعاهم.
قالت لها بصوت واطي:
ـ إنتِ متقلقيش من سارة، أنا عارفاها كويس، أول كام يوم هتعمل فيها زعلانة، وبعد كده هتتعود. المهم إنتِ تثبتي نفسك في البيت، ومحمود هو اللي هيتصرف في كل حاجة.
ـ بس يا ماما، سارة ممكن تزهق وتطلب مني أمشي.
ضحكت حماتي وقالت بثقة:
ـ تمشيك فين؟ هو محمود يقدر يزعلك؟ ده أنا اللي مربيّاه وعارفاه، إنتِ خليكي معاه، وهو مش هيرفضلك طلب.
وقتها حسيت إن الموضوع أكبر من مجرد أرملة محتاجة مكان تعيش فيه، وإن حماتي عندها خطة أنا آخر واحدة تعرف عنها حاجة..
عدى اسبوع ونجلاء اعتبرت إن البيت بقى بيتها وانا اللى وولادى ضيوف
في البداية، كانت بتطلب طلباتها من محمود، وهو ينفذها من غير نقاش، لحد ما جه يوم رجع فيه من الشغل، وقعدنا كلنا على السفرة، وبعد ما خلصنا أكل، طلع محفظته وحط مبلغ من الفلوس قدام نجلاء.
بصيت له باستغراب وسألته:
ـ إيه الفلوس دي يا محمود؟
رد وهو بيبص لنجلاء:
ـ ده مصروف البيت يا حبيبتي، خلي نجلاء هي اللي تمسك مصاريف الأكل وطلبات البيت، وتجيب كل اللي إحنا محتاجينه.
افتكرت إني سمعت غلط، فبصيت له وقلت:
ـ مصروف البيت إزاي؟ ما أنا اللي بمسك مصاريف بيتنا من يوم ما اتجوزنا!
اتدخلت نجلاء قبل ما يرد، وقالت بابتسامة باردة:
ـ معلش يا سارة، محمود شايف إني محتاجة أحس إني لسه ليا قيمة، وإن ليا دور في البيت، خصوصًا بعد اللي حصلي. وبعدين أنا هبقى مسؤولة عن الأكل وطلبات البيت، وإنتِ ترتاحي شوية من المسؤولية.
بصيت لها وقلت بهدوء:
ـ أنا مش تعبانة ولا طلبت منك تشيلي مسؤوليتي، ولو عايزة تساعديني مفيش مشكلة، لكن مصاريف بيتي أنا اللي أعرف احتياجاته.
محمود اتنهد بضيق، وقال: قصص وروايات أمانى سيد
ـ يا سارة، هو إنتِ لازم تعترضي على كل حاجة؟ أنا مش عايزها تحس إنها أقل من حد، ولا عايزها تحس إنها قاعدة عندنا بتاكل وتشرب وخلاص. خليها تمسك مصروف البيت، وتجيب اللي هي شايفاه مناسب، وإنتِ مش هينقصك حاجة.
كنت عايزة أسأله: طب وأنا؟ مش أنا مراتك وصاحبة البيت ده؟
لكن سكتُّ، وقررت أراقب لحد ما أشوف هما ناويين يوصلوا لإيه.
ومع مرور الأيام، بدأت نجلاء تتدخل في كل تفصيلة صغيرة وكبيرة. بقت هي اللي تحدد هنتغدى إيه، وتقرر هنشتري إيه من السوق، ولما أطلب حاجة للولاد، تسألني عن تمنها وليه اشتريتها، وكأنها هي المسؤولة عن كل جنيه بيخرج من البيت.
وفي يوم، رجعت من توصيل ولادي للمدرسة، ودخلت المطبخ عشان أجهز الغدا، لقيتها واقفة قدام الثلاجة بتخرج الخضار، فسألتها:
ـ إنتِ هتعملي إيه النهارده يا نجلاء؟
ردت من غير ما تبصلي:
ـ هعمل أكل خفيف، محمود مش بيحب الأكل التقيل، وبعدين أنا قررت إننا نقلل مصاريف الأكل شوية.
فتحت الثلاجة وبصيت على الحاجات اللي خرجتها، وبعدها قلت:
ـ طب وأنا كنت مجهزة فراخ للولاد، هما بيحبوها، وهعمل معاها رز وخضار.
لفتت لي بحدة وقالت:
ـ وإنتِ ليه مصممة تعملي أكل لوحدك؟ ما أنا اللي بقيت مسؤولة عن المطبخ، ومش معقول كل واحدة تعمل اللي على مزاجها! كده المصاريف هتضيع.
حاولت أتماسك وقلت:
ـ يا نجلاء، ده أكل ولادي، وأنا مش باخد منك فلوس عشان أعمله. قصص وروايات أمانى سيد
بصتلي من فوق لتحت وقالت:
ـ ما هو ده اللي أنا بحاول أفهمهولك، طول ما إحنا عايشين في بيت واحد، يبقى لازم يبقى فيه نظام، ومش كل واحدة تتصرف كأنها لوحدها.
وقتها حسيت إن الكلام معاها مامنوش فايده وإن فى الاخر كلامها هو اللى هيمشى لأن جوزى دايما بيختارها
لكن المصيبة الأكبر كانت يوم ما رجعت من مشوار، ولقيت عفش الصالة كله متغير مكانه، والكنبة الكبيرة اللي كنت حطاها قدام التلفزيون اتنقلت جنب الشباك، والسفرة اتحركت لمكان تاني، وحتى المكتبة اللي فيها صور ولادي اتشالت من مكانها.
وقفت في نص الصالة وأنا مش مستوعبة اللي شايفاه، سألتها بصدمة:
ـ مين اللي غيّر الفرش يا نجلاء؟
ردت بمنتهى البرود:
ـ أنا، ما كانش عاجبني النظام القديم، والصالة كده بقت أوسع وأشيك.
ـ وإنتِ غيرتي فرش بيتي من غير ما ترجعيلي؟!
رفعت حاجبها وقالت:
ـ هو أنا عملت إيه يعني؟ ده فرش البيت كله، مش فرشك لوحدك، وبعدين أنا عايشة هنا، ومن حقي أرتب المكان بالطريقة اللي تريحني.
ـ تعيشي هنا حاجة، وتتصرفي في حاجتي من غير إذني حاجة تانية خالص!
اتغيرت ملامحها، وقالت بصوت عالي:
ـ إنتِ كل كلامك حاجتي وبيتي! افهمى بقى مبقاش فى حاجة اسمها بيتى
وفي اللحظة دي بالذات، دخل محمود، وبدل ما يسأل عن سبب صوتنا العالي، بص للصالة وقال بإعجاب:
ـ إيه الجمال ده! الصالة بقت أوسع فعلًا.
