حماتي طلبت مني أديها الغسالة عشان بتاعتها باظت، ولما رفضت قالتلي إني اتجوزت ابنها وطمعانة في خيره…
أنا متجوزة بقالي سبع شهور، وجوزي اسمه كريم، ومن أول يوم جواز وأنا بحاول أعيش في هدوء وأكسب رضا أهل جوزي، حتى لو على حساب راحتي.
أنا موظفة، وبصرف على نفسي من مرتبي، وبحاول أساعد في مصاريف البيت على قد ما أقدر، وأهلي كمان ساعدوني في جهازي، وكل حاجة جابوهالي كانت بفرحتهم وتعبهم.
ومن ضمن الحاجات اللي بابا جابهالي غسالة أوتوماتيك جديدة، كان عارف إني برجع من الشغل تعبانة، ومش عايزني أقف بالساعات أغسل بإيدي.
لكن اللي ما كنتش أعرفه إن الغسالة دي هتبقى سبب في مشكلة تقلب حياتي كلها!
في يوم، كنت راجعة من الشغل، لقيت حماتي قاعدة عندي في الصالة، وبتبص ناحية البلكونة اللي فيها الغسالة.
أول ما شافتني قالتلي من غير حتى ما تسألني عاملة إيه:
_ إيه يا ندى، هو إنتِ مش بتشغلي الغسالة غير كل يومين ولا تلاتة ليه؟
استغربت سؤالها وقلتلها: _ على حسب الهدوم يا ماما، ساعات بشغلها كل يوم وساعات لأ، هو في حاجة؟
قالتلي وهي بتتنهد: _ أصل غسالتي باظت، والراجل قاللي محتاجة تتصلح، ومش عارفة هقعد قد إيه من غير غسيل. فقولت بدل ما أوجع دماغي، آخد غسالتك عندي لحد ما غسالتي تتصلح.
بصتلها وأنا مش مصدقة اللي بسمعه، وقلتلها بهدوء: _ بس يا ماما أنا محتاجاها، وبعدين إزاي هتنقلوها من هنا؟ دي مش حاجة صغيرة، ولو اتخبطت أو حصل فيها حاجة هنعمل إيه؟
وشها اتغير فجأة وقالتلي: _ يعني إيه محتاجاها؟ ما إنتِ قاعدة لوحدك إنتِ وكريم! هتغسلي إيه يعني؟ وبعدين أنا أم جوزك، ولازم أكون أولى منك بأي حاجة.
حاولت أتكلم معاها بالعقل: _ يا ماما، والله لو أقدر أساعدك بحاجة تانية مش هتأخر، لكن الغسالة دي من جهازي، وبابا جابهالي مخصوص عشان الشغل، وأنا مش هقدر أستغنى عنها.
قامت من مكانها وقالتلي بحدة: _ آه، فهمت! يعني إنتِ شايفة إن الحاجة اللي في شقتك ملكك لوحدك، وإن ابني ملوش فيها حاجة؟ ده أنا اللي ربيته وتعبت فيه، وفي الآخر ييجي يتجوز واحدة تحسبها بالورقة والقلم!
الكلام وجعني، لكن مسكت نفسي وقلتلها: _ محدش قال كده يا ماما، بس دي حاجتي وأنا محتاجاها.
ردت وهي خارجة من الشقة: _ ماشي يا ندى، الأيام بينا، وهشوف آخرتها معاكي إيه!
قفلت الباب وراها، وكنت مخنوقة جدًا، لكن قلت لنفسي لما كريم يرجع هحكيله، وأكيد هيفهم إن من حقي أحافظ على حاجتي.
بالليل، رجع كريم من الشغل، وحكيتله اللي حصل.
لقيته ساكت شوية، وبعدها قاللي: _ معلش يا ندى، أمي غسالتها باظت وهي متضايقة، وإنتِ عارفة إنها ست كبيرة ومش بتستحمل التعب.
قلتلُه: _ وأنا قلتلها إني مش هساعدها؟ أنا بس مش موافقة إنها تاخد غسالتي من غير ما ترجعلي، دي حاجة أساسية في بيتي!
رد عليا بضيق: _ خلاص يا ستي، ما تكبريش الموضوع. لو كنتِ وافقتي من الأول، مكنش حصل كل ده.
ساعتها حسيت إني لوحدي، وإن جوزي بدل ما يفهمني، شايف إن راحتي آخر حاجة يفكر فيها.
عدى يومين، وفي صباح يوم الجمعة، ماما اتصلت بيا وقالتلي: _ يا بنتي تعالي اقعدي معايا النهارده، وحشتيني، وعاملة لك أكلة بتحبيها.
فرحت إني هخرج من الجو المشحون ده، ولبست ونزلت، وقبل ما أمشي قلت لكريم إني هقضي اليوم عند أهلي.
قعدت مع ماما وأكلنا واتكلمنا وضحكنا، ولأول مرة من كام يوم حسيت إني مرتاحة.
على الساعة سبعة بالليل، اتصلت بكريم أسأله هيرجع إمتى، فقاللي إنه لسه بره مع صاحبه، وإنه هيتأخر شوية.
قررت أرجع البيت عشان عندي شغل الصبح.
طلعت السلم، وفتحت باب الشقة، وأول حاجة عملتها إني دخلت المطبخ أحط شنطتي وأشرب مية.
لكن وأنا معدية ناحية البلكونة، وقفت مكاني!
الغسالة اختفت!
بصيت مكانها كذا مرة، وخرجت من المطبخ ورجعتله تاني، يمكن أكون بتخيل.
لكن لأ… مكان الغسالة فاضي، وخرطوم المية متني على الأرض، والفيشة متعلقة في الحيطة!
جريت على باب الشقة وفتحته، وبصيت على السلم، وفجأة سمعت صوت حماتي من تحت بتقول لبنتها:
_ بالراحة يا سمر، خلي بالك من الجنب ده، دي غسالة أوتوماتيك جديدة، مش عايزينها تتخربش!
نزلت كام درجة، وبصيت من بين سور السلم، لقيت أخت جوزي واقفة عند مدخل العمارة، وجوزها بيساعد عاملين يشيلوا الغسالة ويحطوها في عربية نقل صغيرة!
صرخت من فوق: _ إيه اللي بيحصل ده؟! غسالتي بتعمل إيه تحت؟!
حماتي رفعت راسها وبصتلي بمنتهى البرود وقالت: _ مالك بتصرخي ليه؟ ما أنا قلتلك إن غسالتك هتنزل عندي!
قلتلها وأنا نازلة بسرعة: _ إنتِ أخدتيها من شقتي وأنا مش موجودة؟! إزاي تعملي كده؟!
سمر بصت لأمها بتوتر، لكن حماتي ردت بثقة: _ أيوه، أخدناها! وإيه المشكلة؟ دي غسالة في بيت أخوكي، وإحنا أهل، ولا إنتِ هتخلينا نستأذن منك على كل نفس؟!
بصيت لسمر وقلتلها: _ وإنتِ موافقة على اللي بيحصل ده؟ دي حاجتي، وبابا اللي جابهالي!
سمر وطت عينيها وقالت: _ معلش يا ندى، ماما قالتلي إن كريم موافق، وإنكم اتفقتوا على الموضوع.
حسيت إن الأرض بتلف بيا، وبصيت لحماتي وقلتلها: _ كريم وافق؟!
قالتلي بسرعة: _ أيوه طبعًا، هو ابني، وأنا مش هعمل حاجة من وراه!
في اللحظة دي، مسكت موبايلي واتصلت بكريم، وأول ما رد قلتله: _ كريم، إنت وافقت إن غسالتي تنزل عند أمك؟!
سكت ثانيتين، وبعدها قال: _ يا ندى، اهدي بس، أمي محتاجاها كام يوم، وأنا كنت هكلمك.
صرخت فيه: _ كام يوم إيه؟! دي غسالة جهازي، وإنت عارف إني رفضت من الأول! إزاي توافق على حاجة تخصني من غير ما ترجعلي؟!
رد بعصبية: _ إنتِ هتعملي مشكلة عشان غسالة؟! ما هي أمي، ومش واحدة غريبة!
قفلت المكالمة وأنا مش قادرة أصدق إن ده جوزي اللي لسه مكملش معايا سنة.
لكن قبل ما أقدر أتكلم تاني، سمعت سمر بتقول لأمها بصوت واطي، وهي فاكرة إني مش سامعاها:
_ يا ماما، طب وإحنا هنقولها إيه لو عرفت إن الغسالة مش هتفضل عندنا أصلًا؟
حماتي اتلفتت ناحيتها بسرعة وقالتلها: _ اسكتي يا بت! مش وقته الكلام ده!
قلبي بدأ يدق بسرعة، وبصيت لسمر وقلتلها: _ يعني إيه مش هتفضل عندكم؟ إنتوا ناويين تعملوا إيه بغسالتي بالظبط؟!
سمر اتلخبطت، وحماتي حاولت تغير الكلام، لكن في اللحظة دي، جوز سمر طلع من العربية ورمى جملة خلتني أحس إن الموضوع أكبر بكتير من مجرد غسالة!
قال بمنتهى العفوية: _ يا جماعة خلصونا بقى، الراجل اللي مستني الغسالة في الشقة الجديدة مش هيستنى لحد الصبح!
غسالة إيه اللي رايحة لشقة جديدة؟! ومين الراجل اللي مستني حاجتي؟! وليه حماتي كانت مخبية عني الحقيقة دي؟!
يتبع… 😱🔥
