فكر أطلق مراتي وأتجوز الشغالة.. متعيبوش عليا يا جماعة!
بفكر أطلق مراتي وأتجوز الشغالة، متعيبوش عليا يا جماعة، وخلوني أحكيلكم اللي أنا عايشه الأول قبل ما تحكموا عليا.
أنا راجل متجوز بقالي 7 سنين، ومراتي ست محترمة ومتعلمة وشغالة في وظيفة كويسة، ومن أول جوازنا وهي بتحب شغلها جدًا، ودايمًا كانت بتقولي إن طموحها تحقق نفسها وإنها مش عايزة تعتمد على حد.
في الأول كنت بشجعها وبقولها ربنا يوفقك، لكن مع مرور الوقت بدأت أحس إن شغلها بقى أهم مني ومن بيتها.
مراتي بتخرج من البيت الساعة 7 الصبح، وترجع حوالي الساعة 3 العصر، وأول ما تدخل تاكل لقمة وتنام من التعب، ولما تصحى تفتح الموبايل شوية، وبعدها تطلب أكل من بره.
طب وأنا فين من كل ده؟
أنا كمان برجع من شغلي تعبان، وبلاقي المطبخ محتاج يتنضف، والهدوم متكومة، ومفيش أكل جاهز، ولو فكرت أتكلم ألاقي نفسي داخل في خناقة.
في يوم قلتلها: ـ يا حبيبتي هو إحنا هنفضل عايشين كده لحد إمتى؟ أنا مش طالب منك المستحيل، أنا نفسي أرجع ألاقي بيت مرتب وأكل معمول.
بصتلي بضيق وقالت: ـ وإنت فاكر إني برجع من الشغل فايقة؟ أنا بقضي 8 ساعات واقفة على رجلي، وببقى محتاجة أنام، وبعدين إحنا الاتنين بنشتغل، يعني البيت مسؤوليتنا إحنا الاتنين.
قولتلها: ـ يعني إيه مسؤوليتنا إحنا الاتنين؟ أنا راجل برجع من الشغل محتاج أرتاح، مش محتاج أدخل المطبخ أغسل وأطبخ.
ردت بعصبية: ـ وأنا ست مش ماكينة يا أحمد! هو إنت فاكر إني لما بروح شغلي ببقى قاعدة بتفسح؟!
سكت وقتها، لكن جوايا كان فيه كلام كتير.
وبعد كام يوم اقترحت عليها نجيب شغالة تساعدنا في شغل البيت، ونقسم أجرها بينا.
وافقت، وقالتلي: ـ مفيش مشكلة، المهم تكون أمينة ومحترمة.
أمي هي اللي جابتلنا بنت اسمها ندى، عندها 26 سنة، بنت بسيطة وهادية، وكانت بتدور على شغل يساعدها تصرف على نفسها وعلى أمها المريضة.
من أول أسبوع البيت اتغير تمامًا!
المطبخ بقى نضيف، والأكل بقى جاهز، والهدوم مغسولة ومكوية، وكل حاجة في مكانها.
والغريبة إن مراتي نفسها كانت مبسوطة جدًا من ندى، وكانت بتشكر فيها قدامي.
لكن أنا بدأت ألاحظ حاجة تانية…
كنت بستنى أرجع من الشغل علشان ألاقي ندى بتسألني: ـ حضرتك تحب تتغدى إيه النهارده؟ ـ أعملك شاي؟ ـ الأكل عجب حضرتك ولا أغير الطريقة المرة الجاية؟
أسئلة بسيطة، لكن أنا كنت محروم منها من زمان، أو يمكن كنت متخيل إني محروم منها.
وبدأت من غير ما أحس أهتم بشكلي قبل ما أرجع البيت، وأجيب حاجات حلوة وأنا راجع، وأحيانًا أسيب فلوس زيادة لندى وأقولها: ـ دي علشان تعبك، إنتِ فعلًا بتتعبي معانا.
عدى خمس شهور، وفي يوم مراتي رجعت من الشغل بدري، ودخلت المطبخ لقتني واقف مع ندى وبضحك معاها.
قالتلي: ـ إيه ده؟ هو أنا دخلت في وقت غلط ولا إيه؟
قولتلها: ـ غلط إيه بس؟ إحنا بنتكلم في الأكل.
