فضلت طول الليل أفكر في المكالمة اللي سمعتها، وكل شوية أفتكر جملته: «شهد لسه مش عارفة حاجة، وأنا هتصرف زي ما اتفقنا».اتفقوا على إيه؟ وإيه اللي أنا معرفهوش؟تاني يوم الصبح، أنور خرج الشغل، وقبل ما يمشي اداني شريط أقراص وقال:
\- خدي بالك من نفسك، وما تنسيش تاخدي الحباية بعد الفطار. بصيت للشريط وسألته:
\- هي الحبوب دي إيه يا أنور؟رد بسرعة:
\- دي فيتامينات، عشان صحتك، أنا مش عايزك تتعبي. قولت له:
\- طب اسمها إيه؟ عايزة أعرف أنا باخد إيه. اتضايق وقال:
\- يا شهد ما تعقديش الدنيا، أنا جايبهالك من الصيدلية، يعني مش هجيب لك حاجة تضرك. أول ما خرج، صورت الشريط واحتفظت بيه، وبعدها قررت أروح لدكتورة نجلاء كانت رشحتهالي أختي، وأعرف منها حقيقة الأقراص دي. ولما كشفت عليها ووريتها الشريط، سألتني:
\- مين اللي وصف لك الدواء ده؟
قولتلها:
\- جوزي، وقال لي إنه فيتامينات. بصت لي باستغراب وقالت:
\- دي أقراص لمنع الحمل، مش فيتامينات. حسيت إن الدنيا اسودت قدامي، وسألتها:
\- يعني إيه؟ أنا باخدها بقالي فترة على إنها فيتامينات!قالت:
\- لازم نعرف إنتِ بدأتي تاخديها إمتى، وهل بتاخديها بانتظام، وهنراجع حالتك ونحدد الخطوة المناسبة لو إنتِ عايزة تحملي.
خرجت من عند الدكتورة وأنا مش شايفة قدامي، يعني أنور فعلًا كان بيديني مانع حمل من غير علمي، وكان بيضحك عليا ويقنعني إنه مجرد فيتامينات!رجعت البيت واتصلت بنجلاء، ولما حكيت لها، قالت لي:
\- أنا كنت حاسة إن ده اللي بيحصل، بس كنت مستنية نتأكد.
دلوقتي بقى لازم تعرفي هو عمل كده ليه، وتواجهيه بالحقيقة. قولتلها:
\- أنا مش هواجهه قبل ما أفهم كل حاجة، عايزة أعرف أنا اتجوزت ليه أصلًا، وإيه اللي كان بيخطط له من البداية. وبالفعل، استنيت لحد ما أنور رجع، وأول ما دخل البيت حطيت شريط الأقراص قدامه على الترابيزة.
بص له وسألني:
\- إيه ده؟قولت له وأنا بحاول أسيطر على أعصابي:
\- مش عارف؟ دي الفيتامينات اللي كنت بتدهالي كل يوم. اتوتر وقال:
\- مالها؟قولت:
\- الدكتورة قالت لي إنها حبوب منع حمل يا أنور، مش فيتامينات!اتغير لون وشه، وحاول يضحك ويقول:
\- إنتِ رحتي لدكتورة من غير ما تقولي لي؟قولت له:
\- جاوبني، ليه بتديني مانع حمل من غير ما أعرف؟ وإيه اللي يخليك تخدعني في حاجة زي دي؟فضل ساكت، ولما كررت سؤالي قال:
\- عشان مش عايزك تحملي دلوقتي. قولت بوجع:
\- وعشان فوزية؟بص لي فجأة، وسألني:
\- إنتِ عرفتي الكلام ده منين؟ساعتها ابتسمت بمرارة وقلت:
\- يعني الكلام طلع حقيقي؟ إنت فعلًا بتحب فوزية يا أنور؟!فضل أنور ساكت، وبص لي فترة طويلة، وبعدها قال بعصبية:
\- إنتِ مين قال لك الكلام ده؟
وإيه الهبل اللي إنتِ بتقوليه؟قولت له:
\- بدل ما تسألني مين قال لي، جاوبني، بتحب فوزية ولا لأ؟اتنهد وقعد على الكنبة وقال:
\- شهد، الموضوع قديم وانتهى من زمان، ومش من حقك تحاسبيني على حاجة حصلت قبل ما أعرفك. قولت له:
\- أنا مش بحاسبك على حب قديم، أنا بحاسبك على إنك اتجوزتني وإنت لسه بتحب مرات أخوك، وبتخليني أخدمها وأشيل مسؤولية عيالها، وفوق كل ده بتديني حبوب منع حمل من غير علمي!قال بضيق:
\- أنا عملت كده عشان مصلحتنا كلنا، فوزية عندها تلات عيال ومحتاجة مساعدة، وجمال مشغول في شغله، وأنا مش عايز مشاكل بيني وبين أخويا.
ضحكت بمرارة وقلت:
\- مصلحتنا إحنا؟ طب فين مصلحتي أنا؟ إنت سألتني إذا كنت عايزة أأجل الحمل؟ سألتني إذا كنت موافقة إني أبقى مسؤولة عن عيال أخوك كل يوم؟ ولا إنت قررت وأنا عليا أنفذ؟رد:
\- ما أنا قلت لك إننا هنخلف بعدين. قولت:
\- بعدين إمتى؟ لما فوزية تزهق مني وتستغنى عن خدماتي؟ ولا لما جمال يسمح لك؟اتعصب وقال:
\- متجيبيش سيرة جمال وفوزية بالطريقة دي!بصيت له وقلت:
\- أهو ده اللي كنت عايزة أتأكد منه، إنت بتخاف على زعلهم أكتر ما بتخاف على زعلي.
أنا مراته يا أنور، مش خدامة عند أخوك، ولا وسيلة عشان تفضل قريب من فوزية. قام من مكانه وقال:
\- إنتِ مش فاهمة حاجة، أنا بحاول أحافظ على بيتي وعلى علاقتي بأخويا. قولت له:
\- لا، أنا فهمت كل حاجة.
وفهمت كمان إنك لما حبيت فوزية وسابتك واتجوزت جمال، مقدرتش تنساها، فقررت تفضل جنبها حتى لو على حساب حياتي أنا. سكت، لكن سكوتُه كان كفاية يوجعني أكتر من أي اعتراف. بعد شوية قال:
\- أنا فعلًا كنت بحب فوزية قبل ما جمال يتجوزها، بس هي اختارت أخويا، وأنا احترمت ده وسكت.
وبعد جوازها حاولت أنسى، ولما اتجوزتك كنت عايز أبدأ حياة جديدة. قولت له:
\- وبدأتها إزاي؟ بخداعي؟ ولا لما خليتني أأجل حملي وأخدم مرات أخوك؟رد:
\- فوزية طلبت مني أساعدها، وأنا مقدرتش أرفض لها. قولت بصدمة:
\- يعني هي عارفة إنك بتحبها وبتستغل حبك ليها؟
قال:
\- متدخليش فوزية في الموضوع، هي ملهاش ذنب. ضحكت وقلت:
\- ملهاش ذنب؟ دي عايشة مرتاحة، وبتبعت لي عيالها كل يوم، وإنت بتديني مانع حمل من ورايا عشان أفضل فاضية لهم، وإنت لسه بتدافع عنها!في اللحظة دي رن تليفونه، وكان اسم جمال ظاهر على الشاشة. رد عليه، وسمعته بيقول:
\- أيوه يا جمال… حاضر، هكلمها وأقول لها تيجي تاخد الولاد بكرة. خطفته منه بنظري وقلت:
\- حتى دلوقتي؟ بعد كل اللي عرفته لسه هتخليني أخدمهم؟قفل المكالمة وبص لي وقال:
\- دول ولاد أخويا يا شهد، ومش ذنبهم في حاجة.
قولت له:
\- وأنا كمان مش ذنبي إني اتجوزت راجل مخبي عني الحقيقة. من النهارده أنا مش هاخد منك أي دوا من غير ما أعرف هو إيه، ومش هتحمل مسؤولية عيال حد، ومش هقبل إن حد يقرر إمتى أبقى أم وإمتى لأ غيري أنا وجوزي بالاتفاق.
لكن أنور بدل ما يعتذر، قال جملة خلتني أعرف إن اللي جاي أصعب:
\- لو إنتِ فاكرة إنك هتقدري تبعديني عن جمال وفوزية، يبقى إنتِ لسه ما تعرفينيش يا شهد. ساعتها رديت عليه بهدوء:
\- وأنا لو كنت أعرف حقيقتك قبل الجواز، ما كنتش وافقت أبقى مراتك من الأساس.
، حسيت إن مفيش فايدة من الكلام معاه، وإن الراجل اللي كنت فاكرة إني هبني معاه بيت وأسرة طلع عايش بقلبه مع واحدة تانية. تاني يوم اتصلت ببابا وحكيت له كل حاجة، وطلبت منه ييجي ياخدني، وفعلاً جه، ولما شافني وأنا بلم هدومي، أنور حاول يمنعني.
قال بعصبية:
\- إنتِ رايحة فين يا شهد؟ هو كل ما نتخانق هتروحي بيت أبوكي؟رديت عليه:
\- أنا مش رايحة عشان خناقة، أنا رايحة عشان مش قادرة أعيش معاك بعد اللي عرفته. قال:
