ه يا ست إنتي؟! بتزعقي لابني ليه؟!
ـ إنتي بتسأليني ليه؟! ابنك نط على ضهر ابني وهو نايم، إنتي مش شايفة اللي حصل؟ ده كان ممكن يتأذى!
ردت وهي بتقرب مني:
ـ دول عيال بيلعبوا، وإنتي مالكيش دعوة بمعاذ، فاهمة؟!
ساعتها ما قدرتش أتمالك نفسي وقلت بصوت عالي:
ـ عيال إيه اللي بيلعبوا؟! ده طفل عنده تمن شهور! إنتي مش شايفة ابنك بيعمل فيه إيه؟! لمّي ابنك بدل ما أضطر أتصرف معاه بطريقة مش هتعجبك!
ـ أهو بان وشك الحقيقي! أنا من الأول عارفة إنك مش طايقانا! إنتي عايزة تكوشي على البيت واللي فيه، وعايزة كل حاجة تبقى تحت أمرك! فاكرة إنك لما خلفتي هتبقي صاحبة الكلمة هنا؟! لا يا حبيبتي، فوقي لنفسك!
بصيتلها بذهول، وقلت:
ـ إنتي بتقولي إيه يا شيرين؟! هو أنا طلبت منك حاجة؟ ولا دخلت في حياتك في يوم؟ أنا كل اللي بطلبه منك تلمي ابنك عن ابني، بدل ما يأذيه!
لكنها ما سكتتش، وفضلت تعلي صوتها أكتر:
ـ يلا غوري من بيتنا! إحنا مش عايزينك! إنتي واحدة جاية تاخدي مكاننا وتتحكمي فينا!
ساعتها بصيتلها من فوق لتحت، وقلت بكل غضب:
ـ لا يا حبيبتي، أنا ساكتة وعاملة خاطر لأمك اللي قاعدة قدامنا، لكن إنتي لا ليكي لازمة ولا عندك حشمة! ولو أنا ساكتة، فده احترامًا للست الكبيرة دي، مش خوف منك ولا من غيرك.
شيلت سيف ودخلت شقتي، وأنا حاسة إن الدم بيغلي في عروقي. أما حماتي، ففضلت قاعدة مكانها محرجة ومكسوفة من تصرفات بنتها، ومش عارفة ترفع عينها في عيني.
دخلت أوضتي، وحطيت سيف جنبي بعد ما هدي شوية، ومسكت الموبايل وأنا لسه متعصبة. فتحت الواتساب وبعت لشيرين رسالة ورا التانية، وطلعت كل الكلام اللي كنت كاتماه جوايا من شهور.
إنتي واحدة مالكيش دعوة بيا ولا بحياتي، وعايزاكي تطلعي من حياتي خالص. إنتي فعلًا متتعاشريش، وقرفتيني في عيشتي هنا، ومش عايزة أشوف وشك تاني.
بعدها رميت الموبايل جنبي، وخدت نفس طويل، واستعذت بالله من الشيطان، وقلت لنفسي كفاية بقى، أنا مش هضيّع يومي كله في الخناق مع واحدة زي دي.
فضلت ألعب مع سيف وأضحكه، وبعد شوية نسيت الموضوع تمامًا.
لكن اللي ما كنتش أعرفه إن شيرين كانت بتجهزلي مصيبة أكبر من كل اللي فات.
عدت ساعتين تلاتة، لحد ما سمعت صوت مفتاح أحمد في الباب.
دخل من الشغل، لكن وشه ما كانش وش واحد راجع لبيته وعايز يرتاح. كان مكشر ونافش ريشه، وماسك نفسه بالعافية، وباصصلي بنظرات كلها غضب.
رفعت عيني من على سيف وبصيتله، وقلت بهدوء:
ـ حمد لله على السلامة، تحب أحضرلك الغدا؟
ما ردش عليا، وفضل واقف مكانه، ففهمت إن فيه حاجة حصلت، لكن قلت يمكن شيرين راحت حكتله الخناقة بطريقتها، وهتكلم معاه وأفهمه اللي حصل.
ما كنتش أعرف إن أول ما دخل العمارة، أخته كانت مستنياه على السلم، ومستعدة تمثل دور الضحية بأحسن أداء.
نزلتله بدموع التماسيح، وفضلت تشهق وتعيط وتقول:
ـ شوفت مراتك عملت فيا إيه يا أحمد؟! دي عايزة تفرق بينا وبين ولادنا! دي مدت إيدها على ابني قدام عيني، وأنا ساكتة ومستحملاها عشان خاطرك، وفي الآخر طردتني من بيتي وقالتلي غوري على شقتك! هي فاكرة نفسها مين عشان تعمل فيا كده؟!
أحمد وقف يسمعها، وكل ما كانت تعيط أكتر، كان غضبه بيزيد.
طلعت موبايلها وفتحتله المحادثة، وطبعًا كانت ماسحة كل الرسايل اللي هي بعتها، وسايبة ردودي أنا بس، عشان تطلع قدامه ملاك بريء ومراته هي اللي بتغلط فيها من غير سبب.
فضلت تقول وهي بتمسح دموعها:
ـ أنا عمري ما أذيتها يا أحمد، دي من يوم ما دخلت البيت وهي مش طايقاني، بس أنا كنت بقول معلش عشان خاطرك، إنما خلاص، أنا مش هسكتلها تاني.
أحمد ما فكرش يسألها عن اللي حصل، ولا حتى طلع يشوف أمه ويسمع منها. طلع على شقتنا وهو مولع من الغضب، وفتح الباب بعنف، وبصلي بعينين بتطق شرار.
وقبل حتى ما أسأله مالك، صرخ في وشي:
ـ ما عاش ولا كان اللي يفرق بيني وبين أختي! قومي لمي هدومك وروحي بيت أبوكي!
حصل إنك قليلة الأدب، ومش هسمحلك تغلطي في أختي ولا تطرديها من بيتها!
حطيت سيف جنبي وبصيتله باستنكار:
ـ يعني إنت سمعت من طرف واحد وجاي تحكم عليا من غير حتى ما تفهم حصل إيه؟!
قال بمنتهى الثقة:
ـ أنا مش هكدب أختي، وبعدين أنا شوفت رسايلك بعيني يا قليلة الأدب!
ضحكت ضحكة قصيرة من كتر القهر، وقلتله:
ـ يا بني آدم، أختك مسحت الرسايل اللي هي بعتها، وسايبة كلامي أنا بس! تعالى افتح الشات من عندي وشوف بعينك هي قالت إيه قبل ما أنا أرد عليها.
مديتله الموبايل، وخليته يفتح المحادثة بنفسه.
فضل يقلب في الرسايل، وكل ما يقرأ رسالة من أخته، ملامح وشه تتغير. للحظة بان عليه الإحراج، وعرف إنها مش بريئة زي ما كانت مصورة نفسها، وإنها هي اللي بدأت بالغلط والاستفزاز.
كنت مستنية منه كلمة واحدة، حتى لو اعتذار بسيط عن استعجاله في الحكم عليا.
لكن بدل ما يعترف إنه ظلم مراته، قفل الموبايل ورجعهولي وقال بعناد:
ـ وحتى لو هي غلطت، إنتي برضه ملكيش حق تغلطي فيها ولا تطرديها! وبعدين زي ما إنتي طردتيها، لازم تخرجي إنتي كمان عشان أرد اعتبارها! هي اللي تدخل وإنتي اللي تخرجي!
فضلت باصة له كام ثانية، مش قادرة أصدق إن ده نفس الراجل اللي كنت فاكرة إنه ضهري وسندي.
قلتله بصوت مخنوق:
ـ يعني إنت عارف إنها غلطانة، وعارف إنها هي اللي بدأت، وبرضه عايز تطردني عشان تراضيها؟!
رد من غير ما يرمش:
ـ أيوه، أختي خط أحمر، ومش هسمح لحد يهينها، حتى لو كانت مراتي!
في اللحظة دي حسيت إن قلبي اتكسر، مش عشان طردني، لكن عشان اكتشفت إن الراجل اللي اخترته بإرادتي شايف إن كرامتي أرخص من زعل أخته، وإنه مستعد يظلمني عشان يثبتلها إنه أخوها وسندها.
بصيتله وقلت بهدوء غريب، رغم إن جوايا كان فيه بركان:
ـ كرامتي فوق أي حاجة يا أحمد، وأنا مش هترجاك ولا هقبل أتهان عندك ولا عند أختك. بس قبل ما توصلني بيت أهلي، ارجع اسأل أمك الأول عن اللي حصل. أمك كانت قاعدة وشافت
