ربنا يخليك ليا يا بابا، إنت دايمًا بتفكر في كل حاجة قبل ما تحصل.
ضحك وقال:
ـ عشان أنا أبوكي يا ستي، ومفيش حد في الدنيا هيخاف على مصلحتك قدي.
وبما إن ربنا كان موسّعها علينا، ما استنيتش حد يجهزني. نزلت جبت فستان فرحي بنفسي، واخترت كل حاجة كنت بحلم بيها، من فلوسي اللي كنت محوشاها من مصروفي. وأبويا كل ما يشوفني داخلة بحاجة جديدة يبتسم ويكرر جملته اللي كانت لازمة عنده:
ـ أهم حاجة يا بنتي الراجل، إحنا بنشتري راجل.
وعدت الأيام بسرعة، واتجوزت أحمد، وانتقلت أعيش معاه في بيت عيلته في شبرا. وفي أول شهور الجواز كنت حاسة إني دخلت بيت أهلي التاني. حماتي وحمايا كانوا ناس طيبين، وبيعاملوني بحنية، وما كنتش بحس إني غريبة عنهم، بالعكس، كنت بحاول أساعد حماتي وأقعد معاها وأشاركها تفاصيل يومها.
لكن كان فيه شخص واحد وجوده كفيل يعكّر عليا صفو اليوم كله، وهي شيرين، أخت أحمد.
شيرين كانت متجوزة وساكنة في الشقة اللي قصادنا في نفس البيت، يعني بابها قصاد بابنا، ومفيش يوم يعدي من غير ما ألاقيها داخلة علينا هي وابنها معاذ. ساعات تدخل بحجة إنها عايزة تسأل على حاجة، وساعات تيجي تقعد مع أمها، وساعات تفتح الباب وتدخل كأنها داخلة شقتها، من غير حتى ما تخبط!
في الأول ما كنتش بدي للموضوع أهمية، وكنت بقول لنفسي دي أخته، وبيت أبوها زي ما هو بيت أبويا، ومش هقف على كل صغيرة وكبيرة.
لكن مع الوقت بدأت ألاحظ إن الست دي مش بتفوت فرصة إلا لما ترمي كلمة مسمومة، أو تلمح تلميح يضايقني.
مرة وأنا بعمل الغدا دخلت المطبخ وبصت على الأكل وقالت وهي بتضحك ضحكة صفرا:
ـ إيه يا عروسة، هو إنتي كل يوم عاملة صنف واحد؟ أصل أحمد متعود على أكل أمي، مش عارفة هيستحمل التغيير ده إزاي!
بصيتلها وابتسمت وقلت:
ـ ولا يهمك يا شيرين، لما تحبي تعمليله أكلة من أكل ماماكي ابعتيلي الطريقة وأنا أتعلمها.
ردت وهي بتبصلي من فوق لتحت:
ـ لا يا حبيبتي، الأكل مش بالوصفة، ده محتاج نفس.
سكتّ، وقلت معلش، يمكن دي طريقتها في الهزار.
لكنها كانت كل ما تلاقيني بعدّي الكلام، تتمادى أكتر. لحد ما بدأت تدخل بيني وبين حماتي وحمايا، وتحكي مواقف ما حصلتش، أو تاخد كلمة مني وتغيّر معناها، وتروح توصلها بشكل تاني خالص.
كنت أستغرب، وأقول لنفسي: هي عايزة مني إيه؟ أنا لا دخلت في حياتها، ولا قربت من بيتها، ولا حتى اتدخلت في علاقتها بأخوها.
الكاتبة نرمين عادل همام
لكن يبدو إن وجودي في حياة أحمد لوحده كان مضايقها.
والحكاية ما وقفتش عند الكلام والتلميحات، دي زادت أكتر بعد ما خلفت ابني سيف.
ساعتها معاذ ابنها كان عنده حوالي تلات سنين، وسيف لسه مكمل تمن شهور، طفل صغير لسه ما يعرفش حاجة عن الدنيا. ومن أول ما خلفت، بدأت ألاحظ تصرفات غريبة من شيرين، خصوصًا لما كانت تلاقي جدته وجده شايلين سيف وبيلاعبوه ويدلعوه.
كانت بتتغير ملامحها، وتفضل تراقبهم من بعيد، وكأنها مش عاجبها إن فيه طفل تاني واخد جزء من اهتمامهم.
ومعاذ، بدل ما أمه تعلمه يتعامل مع أخوه الصغير بالراحة، كانت سايباه على راحته تمامًا. يدخل يشد شعر سيف، ويقرصه، ويزقه، وأوقات ينط جنبه وهو نايم، لدرجة إن ابني كان يعيط من الخضة.
وكل مرة كنت أبعده عنه بهدوء، وأحاول أشرحله إنه لسه صغير:
ـ براحة يا معاذ يا حبيبي، ده أخوك الصغير، تعالى بوسه كده، بالراحة عليه.
لكن شيرين كانت بتدخل في الكلام على طول، وتقول بنبرة مستفزة:
ـ سيبيه يا ستي، دول عيال بيلعبوا مع بعض، إنتي مكبرة الموضوع ليه؟
كنت ببصلها وأحاول أتحكم في أعصابي:
ـ بيلعبوا آه، بس ابنك لازم يتعلم يلعب من غير ما يأذي اللي قدامه. ده طفل عنده تمن شهور، مش حمل الغشامة دي كلها.
فترد وهي بتكشر:
ـ يعني إنتي عايزة ابني يقعد مكتوف الإيدين عشان ابنك؟ ده طفل، وإنتي عمالة تخوفيه منك ومن أخوه!
كنت بسكت، وأشيل سيف وأبعده، لكن جوايا كان بيزيد الغضب يوم بعد يوم.
لحد ما جه اليوم اللي انتهى فيه صبري تمامًا.
كان يوم عادي، وحماتي قاعدة عندي في الشقة، بنتكلم ونشرب الشاي، وأنا سيف نايم على المرتبة الصغيرة بتاعته في الصالة. كالعادة، دخلت شيرين ومعاها معاذ، ومن غير ما تستأذن قعدت تتكلم مع أمها.
كنت واقفة بلم شوية حاجات من على السفرة، وفجأة سمعت صوت صرخة سيف!
لفيت بسرعة، واتجمدت مكاني من المنظر اللي شوفته.
معاذ كان جري على أخوه ونط بكل غشومية على ضهره، وسيف بيصرخ ومش قادر ياخد نفسه من الخضة والوجع.
رميت اللي في إيدي وجريت عليه، شيلته لحضني وفضلت أطبطب على ضهره، وقلبي كان هيخرج من مكانه.
