كل ما كنت أحكي، وش أبويا كان بيزيد احمرار، لحد ما ضرب كف بكف وقال بغضب:
ـ يا نهار أسود! هو ده راجل؟! ده إنتي لو كنتي خدامة عنده ما كانش المفروض يعاملك بالطريقة دي! إزاي يطردك من بيتك عشان خاطر أخته، وبعد كل ده يبعتلي يقوللي ربي بنتك؟!
أمي حاولت تهديه وقالت:
ـ خلاص يا أبو داليا، البنت وصلت بالسلامة، خلينا نشوف هنعمل إيه.
لكن أبويا ما كانش قادر يستوعب اللي حصل، وفضل يدعي على أحمد ويتحسبن عليه، وبعدها بصلي وقال بحزم:
ـ اسمعيني كويس يا بنتي، والله العظيم ما إنتي راجعاله، ولا هتدخلي بيته برجلك تاني طول ما أنا عايش! اللي ما يصونش بنتي ويحافظ على كرامتها، أنا مش عايزه جوز ليها.
في اللحظة دي حسيت إن قلبي رجع مكانه، وإن لسه ليا ضهر وسند في الدنيا. قمت بوست إيده وش وضهر، وقلتله ودموعي في عيني:
ـ ربنا يخليك ليا يا بابا، أنا مش عايزة غير رضاك، ومش هرجعله مهما حصل.
وبين نفسي ونفسي، حمدت ربنا ألف مرة إن أبويا من البداية ما طلبش مهر كبير، ولا كتب مؤخر يخليني مضطرة أستحمل الإهانة عشان أحافظ على حقي. كان ممكن أبقى محبوسة في الجوازة دي، وكل ما أفكر أخرج منها أخاف من اللي هخسره، لكن الحمد لله ما كانش فيه حاجة تقدر تكسرني أو تلوّي دراعي.
ومن يومها حسمت أمري، وقررت أرفع ق.ضية خلع، حتى لو أحمد وقف على بابه الدنيا كلها، أنا مش راجعة.
وفعلًا بدأنا إجراءات القض.ية، وفي الفترة دي أحمد حاول يوصلّي أكتر من مرة، لكن لما لقى إني عاملاله بلوك ومش عايزة أسمع صوته، بدأ يبعت لأمي على الموبايل.
مرة يبعتلها:
ـ يا طنط، أنا عايز أتكلم مع داليا، خليها ترد عليا.
ومرة تانية:
ـ خلينا نتفاهم، الموضوع ما يستاهلش اللي حصل ده كله، أنا عايز مراتي ترجع بيتها.
لكن أبويا أول ما عرف إنه لسه بيحاول يتواصل، مسك التليفون وكلمه بنفسه وقاله:
ـ مفيش كلام بينك وبين بنتي، إنت كان عندك فرصة تحافظ عليها، لكن إنت اللي اخترت تطردها وتهينها. دلوقتي كل واحد يروح لحاله، وبنتي مش راجعة لك.
أحمد حاول يرد، لكن أبويا قفل المكالمة في وشه، ومن بعدها ما بقاش عنده عين يواجهه، خصوصًا بعد الرسالة اللي بعتها وقلة الأدب اللي اتعامل بيها معاه.
ما أنا، فوفرت على نفسي وجع الدماغ، وخدت موبايل أمي وعملتله بلوك نهائي، وقلت خلاص، مفيش بيني وبين الراجل ده أي كلام تاني.
لكن الظاهر إن أحمد وأخته ما كانوش ناويين يسيبوني في حالي.
بدأوا يلفوا على الناس، ويحكوا روايات من تأليفهم، وكل واحد فيهم يحاول يطلع نفسه مظلوم وأنا الظالمة. شيرين كانت تحكي في قعدات الستات إني كنت بكرهها من أول يوم، وإنها كانت بتستحملني عشان خاطر أخوها، وأحمد يقول للناس إني قليلة الأصل ومش مقدرة العشرة!
وكل ما واحدة تيجي تحكيلي كلام جديد، كنت أضحك من جوايا وأقول: يا سبحان الله! هو الظالم بقى عنده الجرأة إنه يقف قدام الناس ويحكي عن المظلومية؟! هو الضمير ده بقى سلعة بتتباع وتتشترى؟!
لكن كنت بقول لنفسي: سيبوهم يتكلموا، الأيام كفيلة إنها تكشف كل واحد على حقيقته.
عدت الشهور، لحد ما جه اليوم اللي نزلت فيه المحكمة عشان أخلص الق.ضية. كنت ماسكة إيد أبويا، وسيف في حضني، وقلبي هادي بشكل غريب. ما كنتش حاسة إني رايحة أخسر جوازة، بالعكس، كنت حاسة إني رايحة أسترد حريتي وأقفل باب وجع الدماغ ده للأبد.
ولما جه وقت رد المهر، طلعت جنيه الدهب اللي كان مكتوب في القايمة، وسلمته للمحكمة عشان أردّه لأحمد.
جنيه دهب واحد، ما يجيبش حتى تمن وجبة في مطعم!
كنت شايفة أحمد واقف قدامي، راسه في الأرض ووشه متغير، بعد ما كان من شهور واقف قدامي نافش ريشه وبيزعقلي: لمي هدومك وامشي!
بصيتله للحظة، وافتكرت كل اللي حصل، وقلت في سري: أهو يا أحمد، اللي كنت فاكرها هتترجاك عشان ترجع بيتك، واقفة قدامك النهارده وبتنهي كل حاجة بإرادتها.
والحمد لله، الإجراءات خلصت، والقاضي أصدر حكمه، وبقيت مطلقة رسميًا، وخرجت من المحكمة وأنا حاسة إن حمل تقيل اتشال من فوق قلبي.
بس اللي ما كنتش متوقعاه إن شيرين تعتبر طلاقي بداية حرب جديدة.
أول ما عرفت إن الق.ضية خلصت، بدأت مسلسل تشويه السمعة على أصوله. ما تسيبش فرح ولا عزاء ولا قعدة ستات إلا وتجيب سيرتي، وتطلع عليا حكايات ما حصلتش، لدرجة إن اللي يسمع كلامها يفتكر إني كنت عاملة جريم.ة وهربانة من العقاب!
وفي كل مرة كانت سيرتي تتجاب قدام الناس، كانت بتقول:
