الست اللي تتمنى الموت لأبويا وتقول عليه فطيس، ما ينفعش تفضل على ذمتي دقيقة واحدة! ومبقاش راجل لو فضلتِ مراتي ثانية كمان! غوري في داهية… إنتي طالق بالتلاتة!»
شيرين أول ما سمعت الكلمة، فضلت تصوت وتولول في نص الصالة، وتضرب على صدرها وتتحسبن، ومن كتر الغل اللي عماها بقت تشاور عليا وتصرخ في وشهم:
دي سحّارة! دي ساحرة للبيت كله! أخويا كان عارف حقيقتها وبلاويها، ودلوقتي لفت ودارت عليكم إنتوا كمان! دي داخلة بيتكم بمكر وبتلعب عليكم كلكم!
سبحان مغير الأحوال! نفس المشهد اللي عملته فيا بالحرف، اتكرر معاها هي، بس الفرق إن يوم ما اترميت من بيتي كنت مظلومة وما عملتش حاجة تستاهل اللي حصلي، إنما هي اتطردت وهي ظالمة، ولسانها الطويل وغلها هما اللي جابوا آخرها!
والله ما احتجت أمد إيدي عليها، ولا حتى أقول نص كلمة، ربنا ردلي حقي قدام عيني، وخلاها تقع في نفس الحفرة اللي كانت بتحفرهالي. هي اللي فضحت نفسها بلسانها، وهي اللي جابت الخراب لبيتها بإيديها.
خرجت من بيت أهل جوزها تجر وراها ديل الخيبة، وراحت على بيت أخوها وهي مش طايقة نفسها. أما جوزها، فبعد ما هدي شوية، راح باس على راس أبوه وأمه واعتذرلهم، ودموعه في عينيه من اللي عملته مراته، وحلف بالطلاق إنها ما ترجع بيته تاني، ولا حتى تعتب عتبته بعد النهار الأسود اللي عملته.
ومن يومها والدنيا ابتدت تتغير معايا، وكل يوم كان بيعدي كان أحسن من اللي قبله. مرات الحاج إبراهيم بقت في غلاوة أمي بالظبط، وأنا بقيت أراعيها وأهتم بيها، والحاج إبراهيم كمان كنت بشيله في عيني، وأهتم بكل طلباته، وأتابع مواعيد دواه وأكله وراحته. وهما الاتنين كانوا مقدريني جدًا، وحاسين إني داخلة البيت بقلب صافي، وإن اللي بينا عشرة ومحبة مش مجرد جوازة ولا مصلحة.
حتى ولاده وبناته اللي عايشين بره، لما كانوا ينزلوا إجازات، كانوا بيستقبلوني أحسن استقبال، ويدلعوني ويعاملوني كأني أختهم الصغيرة، وأمهم كانت في أي فرح أو عزومة تتكلم عني قدام الناس بكل فخر وتقول:
دي بنتي مش ضرتي، واللي يشوف معاملتها ليا يعرف إن الدنيا لسه فيها خير.
والله ما سيبنا فسحة في مصر ولا مصيف في إسكندرية ولا الساحل إلا وروحناه، وكنت كل ما أقرر أخرج أو أروح مكان، أصر إن مراتي الكبيرة تيجي معايا، وما كنتش برضى أسيبها قاعدة لوحدها. حتى مواعيد دواها كنت أنا اللي بظبطهالها، وأتابع علاجها وأكلها، ولو تعبت كنت أفضل جنبها لحد ما تقوم بالسلامة.
وما كنتش بفرّق بين دواها ودوايا، ولا بين راحتها وراحتي، لأنها بقت فعلًا من أهلي، والست دي ما قصرتش معايا في يوم، وعوضتني عن وجع كتير شوفته.
الكاتبة نرمين عادل همام
ربنا كرمني وحققلي حاجات كتير كنت بتمناها، وعشت في هدوء وراحة بال، والأجمل إني شفت بعيني إزاي اللي ظلمني واتجبر عليا، ربنا رجّعله ظلمه، ووراني في أحمد وأخته أيام ما كانوش يتمنوها.
آه، ونسيت أحكيلكم على الباشا أحمد، طليقي العزيز!
كل ما يروح يتقدم لعروسة، وأهلها يسألوا عنه ويعرفوا إنه متخلوع من مراته، وإن مراته خلعتُه وردتله جنيه دهب، يقفلوا الباب في وشه ويرفضوه من غير ما يفكروا مرتين، ويقولوا: ده راجل ما لوش أمان، واللي ما صانش مراته وما حفظش بيته، مش هيصون بنت الناس!
وساعتها كنت بقول: سبحانك يا رب! أهي دعوة المظلوم ما بتضيعش، واللي افتكر إنه كسرني وخلص مني، الأيام بتردله كل حاجة عملها فيا. وفعلاً، دوارة الزمن ما بتسيبش حد، واللي يزرعه الواحد بيحصده مهما طال الزمن.
ودي كانت حكايتي، وحبيت أحكيها لكل واحدة فاكرة إن السكوت ضعف، ولكل واحدة ظالمة ومفترية فاكرة إن ربنا مش شايفها، وإنها تقدر تكسر خاطر غيرها وتعيش مبسوطة من غير حساب.
أوعي تفتكري إن ربنا غافل عنك، ولا تفتكري إن الست الهادية والمحترمة ضعيفة ومابتعرفش تاخد حقها. أنا ما احتجتش أعمل دوشة ولا أدخل في خناقات كل يوم، عرفت آخد حقي بعقلي، وربنا كفاني شر اللي ظلمني، وعوضني عن كل دمعة نزلت من عيني.
والنهارده أهلي عايشين مرتاحين ومطمنين عليا، وجوزي ومراته الكبيرة بيحطوني فوق راسهم، وبيعتبروني بنتهم قبل ما أكون مرات ابنهم. وأهم حاجة عندي إن ابني سيف بيكبر وسط ناس بتحبه وبتدلع فيه، وعايش في عز وهدوء، بعيد عن الخناق والغيرة وسم الحموات ومناقرات السلايف.
وفي الآخر، اتعلمت إن مش كل اللي بيضحك في وشك بيحبك، ومش كل اللي بيسكت يبقى ضعيف، وإن ربنا ساعات بيسيب الظالم لحد ما يفتكر إنه كسب، وبعدها يوريه نتيجة ظلمه من حيث ما يحتسبش.
الحمد لله اللي جبر بخاطري، وعوضني عن كسرة قلبي، وخلاني أشوف بعيني إن الحق مهما اتأخر، عمره ما بيضيع عند ربنا.
الكاتبة نرمين عادل همام
تمت
