في مرة واحدة من قرايبنا نقلتلي كلامها، وقالتلي:
ـ يا بنتي، شيرين لسه بتتكلم عليكي، وبتقول إنك كنتي بتعملي مشاكل في البيت، وإن أحمد ما قدرش يستحمل طباعك.
ضحكت بسخرية وقلت:
ـ خليها تقول اللي هي عايزاه، أنا مش هرد على كل كلمة تطلع من بقها.
لكن الحقيقة إن جوايا كان فيه نار بتزيد كل يوم. مش عشان كلامها بس، لكن لأنها كانت بتستمتع إنها تشوه صورتي قدام الناس، وكأنها ما اكتفتش باللي عملته فيا.
وفي وسط كل ده، بدأت أفكر إزاي أردلها اللي عملته، وأخليها تدوق من نفس الكاس اللي سقتني منه.
قعدت أيام أفكر، لحد ما افتكرت حكاية كنت سمعتها من فترة عن حماها، الحاج إبراهيم، والد جوزها.
كان راجل كبير، داخل على آخر الخمسينات، ومرتاح ماديًا، وعنده خير كتير. أما مراته، فكانت ست طيبة وعلى قد حالها، لكنها كانت تعبانة من السكر والضغط، وبناتها كلهم اتجوزوا وسافروا مع رجالتهم، وما بقاش حواليها حد يساعدها في شغل البيت أو يخفف عنها مسؤولية جوزها وطلباته.
وكنت سمعت قبل كده إنها من كتر التعب بقت بتدور على عروسة لجوزها، واحدة تساعده وتراعيه، لأنها مبقتش قادرة تقوم بكل حاجة لوحدها.
أول ما افتكرت الكلام ده، قعدت أفكر، وبعدين ابتسمت ابتسامة صغيرة وقلت لنفسي:
ـ يا سلام! هو ده الانتقام اللي جايلي لحد عندي على طبق من فضة!
فضلت الفكرة تكبر في دماغي، وكل ما أفكر فيها أحس إنها فرصة عمري ما كنت أتخيل إنها تيجي لحد عندي بالشكل ده. وبعد سنة كاملة من طلاقي، لقيت نفسي قدام قرار ممكن يقلب حياة شيرين كلها.
لكن قبل ما أعمل أي خطوة، كان لازم أتكلم مع أمي.
دخلت عليها في أوضتها، وقعدت جنبها، وقلت بمنتهى الهدوء:
ـ ماما، أنا بفكر في موضوع جواز.
بصتلي باستغراب وقالت:
ـ جواز إيه يا بنتي؟ إنتي لسه صغيرة، ومالك ومال الجواز دلوقتي؟!
قولتلها:
ـ أنا بفكر أتجوز الحاج إبراهيم، أبو جوز شيرين.
أمي فتحت عينيها على آخرها، وبصتلي كأنها مش مصدقة اللي سمعته:
ـ إنتي بتقولي إيه يا داليا؟! إنتي عايزة تتجوزي راجل في سن أبوكي؟! تضيعي شبابك وإنتي لسه في أول العشرينات مع راجل كبير؟! إنتي لسه قدامك العمر كله يا بنتي!
ابتسمت وقلت:
ـ يا أمي، أنا لا فارق معايا جواز ولا خلفة، ابني سيف عندي بالدنيا كلها ومكفيني عن الدنيا وما فيها. وبعدين الراجل الكبير المحترم اللي هراعيه وأخدمه، أكرملي ميت مرة من العيل اللي كنت متجوزاه. أنا مش قادرة أنسى اللي عملوه فيا، ومش هرتاح غير لما أردلهم القلم وأحرق دم أحمد وأخته زي ما
أمي هزت راسها بحيرة وقالت:
ـ يا بنتي، الانتقام مش كل حاجة، وإنتي ممكن تدخلي نفسك في جوازة تندمي عليها بعدين. فكري في نفسك وفي مستقبلك، مش في شيرين وأخوها.
مسكت إيدها وقلت:
ـ أنا فكرت يا أمي، وقراري مش وليد اللحظة. وبعدين الحاج إبراهيم راجل محترم، ومراته ست طيبة، وأنا مش داخلة على ناس غريبة ولا ناس معرفهمش. أنا عارفاهم وعارفة طباعهم، ومش هعمل خطوة إلا وأنا متأكدة منها.
فضلت أمي تحاول تقنعني أراجع نفسي، لكن أنا كنت خلاص أخدت قراري.
وبدأت أرتب للموضوع في سر، من غير ما مخلوق يعرف، لأن المفاجأة دي بالذات كنت عايزاها توصل لشيرين في الوقت اللي أكون فيه خلاص بقيت مرات حماها رسميًا.
وكان أول خطوة إني أطلب مقابلة حماتي القديمة، أم جوز شيرين، من غير ما حد يحس.
روحتلها في يوم، وقعدت معاها شوية، واتكلمنا في أحوال الدنيا، وبعدها دخلت في الموضوع على طول وقلت لها:
ـ بصي يا حاجة، أنا عرفت إنك بتدوري على عروسة للحاج إبراهيم عشان تعبتي ومبقتيش قادرة على خدمته وطلباته، وأنا بصراحة مستعدة أكون بنتك، وأشيلكم إنتوا الاتنين في عيني، وأراعيه وأقف جنبه.
الست فضلت باصة لي، وفتحت بقها من الصدمة، وقالت:
ـ إنتي بتتكلمي جد يا بنتي؟! إنتي عارفة إنتي بتقولي إيه؟!
ابتسمت وقلت:
ـ أيوه يا حاجة، أنا عارفة كويس أنا بقول إيه.
هي كانت تعرفني من زمان، وعارفة إني بنت أصول وبحب الكبار وبعاملهم كويس، لكن كان واضح إنها مترددة وخايفة من رد فعل شيرين.
قالتلي وهي بتوطي صوتها:
ـ بس يا بنتي، إنتي عارفة شيرين عاملة إزاي، دي لو عرفت إنك هتبقي مرات أبو جوزها، ممكن تقلب الدنيا فوق دماغنا كلنا!
ضحكت وقلت:
ـ عشان كده أنا جاية لحضرتك في السر، ومش عايزة حد يعرف أي حاجة دلوقتي. الموضوع يفضل بيني وبينك وبين الحاج إبراهيم وبابا، ومحدش يعرف غير يوم كتب الكتاب. وساعتها بقى اللي عايز يعرف يعرف، ومش هنكون محتاجين نخبي حاجة عن حد.
الست بدأت تبتسم، ووشها اتفتح، وقالت:
ـ والله يا بنتي أنا نفسي في واحدة زيك، تكون حنينة علينا وتراعي الحاج، وأنا كمان ألاقي حد يقف جنبي بدل ما أنا شايلة كل حاجة لوحدي.
ومن هنا بدأت الحكاية تاخد طريق تاني خالص…
