اخت جوزي خربت بيتي فتجوزت ….
رجعت بيت أبويا متطلقة وشايلة ابني ال لسة مولود السبب ما كانش خيانة ولا خلاف بيني وبين جوزي، السبب كان أخته اللي ما استحملتش تشوفني مرتاحة في بيتي، وقررت تحوّل حياتي لجحيم.
أنا داليا ، اتجوزت أحمد بعد قصة معرفة بين العيلتين، لأن أبويا كان صاحب أبوه من زمان. أبويا ما طلبش منه مهر كبير ولا مؤخر، واكتفى بجنيه دهب رمزي، وقاله يوم كتب الكتاب: «إحنا بنشتري راجل، مش بنبيع بنتنا». وأنا كمان جهزت نفسي من فلوسي، وكنت داخلة الجوازة بقلب مفتوح، وكل أملي أعيش مع جوزي في بيت هادي وأكون أسرة صغيرة.
في الأول، كنت فاكرة إني محظوظة. عيلة أحمد كانوا ساكنين في بيت عيلة في شبرا، وأبوه وأمه كانوا طيبين معايا، وبيتعاملوا معايا بحب. لكن المشكلة الحقيقية كانت في أخته شيرين، اللي كانت ساكنة قصادنا في نفس البيت، ومعاها ابنها معاذ.
من أول يوم وهي مش طايقاني، وكل ما تشوف أحمد بيهتم بيا أو يجيبلي حاجة، تلاقي وشها اتقلب. كانت بتحب تحسسني إني ضيفة في البيت، وإن وجودي فيه مش من حقي، مع إن ده بيت جوزي زي ما هو بيت أخوها.
ولما خلفت ابني سيف، وكان لسه عنده تمان شهور، الغيرة زادت أكتر. شيرين كانت بتسيب ابنها معاذ يتعامل معاه بعنف، وكل ما أحاول أحمي ابني، تتهمني إني بكره ابنها ومش عايزاه يلعب معاه.
لحد ما جه اليوم اللي قلبي وقع فيه من مكانه.
كنت سايبة سيف نايم على السرير، وفجأة سمعت صريخ. جريت عليه، لقيت معاذ ناطط على ضهره وهو بيلعب، والولد الصغير مش فاهم إنه ممكن يأذيه. شيلت ابني بسرعة، وصرخت في معاذ أبعد عنه، وبعدها واجهت شيرين وقلتلها إن ابنها لسه صغير ومش مدرك خطورة اللي بيعمله، ولازم تراقبه.
لكن بدل ما تعتذر أو حتى تحاول تفهم خوفي على ابني، قلبت الدنيا عليا
فضلت تصرخ وتتهمني إني بتعالى عليها، وإنها مش هتسمحل أتحكم في ابنها، ووصل بيها الأمر إنها قالتلي قدام الناس:
إنتي ملكيش كلمة هنا، ولو مش عاجبك الوضع، الباب يفوت جمل!
بصلتلها وأنا مش مصدقة بجاحتها، ورديت عليها إن محدش له حق يهددني في بيتي، وإن سلامة ابني مش موضوع هسكت عليه.
دخلت شقتي وأنا متعصبة، وبعتلها رسايل على الواتساب أعاتبها فيها على أسلوبها، وأفهمها إنها تجاوزت حدودها. لكنها كانت أذكى في الشر مما تخيلت؛ مسحت رسايلها هي، وسبت ردودي أنا، عشان تطلعني قدام أحمد إني اللي بدأت الغلط.
الكاتبه_نرمين_عادل_همام
وبالفعل، أول ما أحمد رجع من شغله، كانت سبقته بدموعها وحكايتها المقلوبة. دخل عليا وشه متغير، وما ادانيش حتى فرصة أشرح، وقاللي :لمي هدومك وخدي ابنك وروحي عند أبوكي!انتى عيلة قليلة الادب وسـ….
اتجمدت مكاني، وبصيتله مش مصدقة إنه بيطلب مني أسيب بيتي عشان خاطر أخته. حاولت أفهمه اللي حصل، وطلبت منه يسأل أمه لأنها شافت كل حاجة، لكنه كان واخد قراره.
كان عندي تسعتاشر سنة لما دخلت بيت جوزي، وكنت فاكرة إن الجواز يعني أمان وسند وضهر أستخبى فيه من غدر الدنيا، وإن الراجل اللي هختاره شريك لحياتي هيبقى أول واحد يقف في ضهري لو الدنيا كلها اتخلت عني. ما كنتش أعرف إن أول طعنة هتجيلي منه هو شخصيًا، وإن اللي هيكسرني مش غريب ولا عدو، ده الراجل اللي اديته قلبي وبيتي وعمري، واللي في يوم من الأيام هيختار أخته عليا حتى لو كانت هي الغلطانة!
أنا بنت من بيت مستور، وأهلي الحمد لله ربنا موسّعها عليهم، وأبويا عمره ما حسسني إني حمل عليه أو إنه مستعجل يجوزني عشان يخلص من مسؤوليتي. بالعكس، كنت بنته الوحيدة المدللة، واللي يطلبه قلبي ألاقيه قبل ما أمد إيدي عليه. ولما جه نصيبي واتقدملي أحمد، أهلي رحبوا بيه، خصوصًا إن أبوه كان صاحب أبويا من سنين طويلة، والعيلتين عارفين بعض، وكل واحد فيهم عارف أصل التاني وتربيته.
أحمد ما كانش من قرايبنا، لكن أبوه وأبويا كانت بينهم عشرة عمر، ودي كانت أكبر حاجة مطمنة أهلي ناحيته. ولما قعدوا يتكلموا في تفاصيل الجواز، أبويا ما دخلش معاهم في حسبة مهر ولا مؤخر ولا طلبات تكسّر ضهر العريس.
أبويا قالهم بمنتهى البساطة:
ـ إحنا مش طالبين مهر، ولا عايزين نحمّل الواد فوق طاقته، اكتبوا جنيه دهب في القايمة وخلاص، وإحنا بنشتري راجل، مش بنبيع بنتنا.
أهل أحمد رحبوا بالكلام، وجابوا شبكة بسيطة على قدهم، مع إن حالتهم المادية كانت كويسة جدًا، لكن أبويا ما كانش من النوع اللي يقيس قيمة الناس بالدهب والهدايا.
فاكرة إني في يوم دخلت عليه وهو قاعد في الصالة، وقعدت جنبه وقلتله باستغراب:
ـ هو إنت يا بابا ليه ما طلبتش منهم مهر؟ ولا حتى خليتهم يجيبوا شبكة تليق بحالتهم؟ دول الحمد لله معاهم ومش محتاجين.
ابتسم أبويا، وبصلي بنظرة فيها حنية وخبرة السنين، وقال:
ـ بصي يا بنتي، أنا مش عايز أبدأ جوازك بديون ومشاكل، ولا عايز أحط على جوزك حمل يفضل شايله طول عمره. وبعدين أنا بفكر لقدام، ربنا يبعد عنكم الشر، بس لو في يوم حصل خلاف والعيشة ما بقتش نافعة، وقرروا يطلقوا، مش عايز حد يبقى ماسك عليكي حاجة، ولا يقدر يلوّي دراعك بيها. أنا عايزك تدخلي بيتك مرفوعة الراس، ولو خرجتي منه في يوم، تخرجي برضه مرفوعة الراس.
