سر أم طليقي ج1 الكاتبة نرمين عادل همام
أخدت حماتي تعيش معايا بعد ما رجلها اتكسرت، ولما ولادها التلاتة رفضوا يخدموها، وفي يوم ما نقلت عندي، جارتي حطت علبة جزم قديمة على الترابيزة وهمستلي: _حماتك كانت مخططة لكل حاجة من الأول!
_هترجعي متأخر بكرة من الشغل يا هدى؟
سألتني الحاجة إنعام بنبرة عادية جدًا، كأنها بتسألني عن حالة الجو بره، لكن إيديها كانت قابضة على مج الشاي بلبن، ورجلها اللي متجبسة ومسنوداها على مخدة فوق الكرسي اللي قصادها، متهزتش من مكانها بقالها أكتر من عشر دقايق.
بصيتلها وأنا برفع عيني من الموبايل وقلت:
_غالبًا يا ماما، في حاجة ولا إيه؟
هزت راسها بسرعة وقالت:
_لا يا بنتي، مفيش حاجة. كنت بسأل عشان أعرف أستناكي على الغدا ولا تاكلي بره.
بصيتلها باستغراب بسيط، دي كانت تالت مرة في نفس الأسبوع تسألني فيها عن مواعيد رجوعي من الشغل بالتحديد.
ابتسمت وقلت:
_أول ما أخلص في العيادة وأتحرك، هبعتلك على الواتساب.
أول ما سمعت ردي، كتافها نزلت شوية، وطلعت نفس طويل كأنها كانت حابسة نفسها ومستنية تسمع الإجابة دي بالذات.
وقتها مديتش الموضوع أهمية، واعتبرته مجرد قلق ست كبيرة قاعدة لوحدها ومستنية حد يطمنها.
الحاجة إنعام كانت حماتي السابقة، أم طليقي طارق، لكن الحقيقة إني عمري ما عرفت أتعامل معاها على إنها مجرد أم واحد كنت متجوزاه وانتهت علاقتي بيه.
عدّى على طلاقي من ابنها خمس سنين، ومع ذلك كانت لسه فاكرة إني مبحبش السكر الكتير في الشاي، ولسه لما نقعد ناكل سوا، تحط طبق أم علي بينا وتجيب معلقتين، عشان عارفة إني بحب أشاركها فيه من غير ما أطلب.
أنا هدى، عندي تسعة وتلاتين سنة، شغالة مشرفة حسابات وفواتير في مجمع عيادات أسنان في المهندسين، وعندي شقتي اللي لسه بسدد أقساطها، وحنفية المطبخ اللي بتنقط بقالها شهر ومش لاقية وقت أجيب سباك يصلحها، وعربيتي القديمة اللي بتطلع أصوات غريبة كل ما ألف الدركسيون شمال.
أما الحاجة إنعام، فكانت ست عندها سبعين سنة، ناظرة مدرسة ابتدائي على المعاش، ومن جيل الستات اللي لسه بيكتبوا الجواب بإيديهم، وبيفتكروا مناسبات الناس، ويدعوا للغريب قبل القريب.
جوازي من طارق انتهى في الأسبوع اللي اكتشفت فيه خيانته.
قعد بعدها شهر كامل يحاول يقنعني إن اللي حصل غلطة وعدت، وإن البيوت مش بتتهد عشان نزوة، وإن المفروض أتعقل وأبطل أسأل وأدور ورا كل تفصيلة.
لكن أنا كنت خلاص شوفت منه جانب مكنتش أتخيل في يوم إني أشوفه.
أما أمه، فكانت مختلفة تمامًا.
مع إنها بتحبه، وده حقها، لكنه عمرها ما حاولت تبرر غلطه قدامي، ولا طلبت مني أستحمل إهانة عشان خاطر ابنها.
فاكرة كويس يوم ما طلبت تقابلني في كافيه هادي في شارع مصدق.
قعدت قدامي ودموعها بتنزل، وإيديها بتترعش وهي ماسكة كوباية المية، وقالتلي بصوت مخنوق:
_أنا مكسوفة من اللي ابني عمله يا هدى، وحقك عليا يا بنتي. إنتِ تستاهلي راجل يخاف ربنا فيكي، ويصونك ويحطك جوه عينيه.
وقتها مقدرتش غير إني أمسك إيديها وأطمنها.
أنا عمري ما طلبت منها تكره ابنها، ولا تقاطعه عشاني. كل اللي طلبته منها إننا لما نتقابل، منفتحش سيرة طارق، ولا نرجع نفتّح أوجاع قديمة.
وفضلنا ماشيين على الاتفاق ده خمس سنين كاملة.
لحد يوم تلات في نص أكتوبر، لما تليفونها رن عليا، وأول ما رديت سمعت صوتها وهي بتعيط.
_يا بنتي، معلش سامحيني إني بزعجك، بس أنا مش عارفة أعمل إيه.
قلبي اتقبض وسألتها بسرعة:
_مالك يا ماما؟ في إيه؟
قالت وسط شهقاتها:
_رجلي اتكسرت من الأسبوع اللي فات، ومبقتش قادرة أتحرك ولا أقوم أخدم نفسي.
اتخضيت وقلت:
_إيه؟! رجلك اتكسرت من أسبوع وإنتِ ساكتة؟ ومقولتيليش ليه من أول يوم؟
ردت بصوت ضعيف:
_كنت فاكرة إني هقدر أتصرف، ومكنتش عايزة أشيل حد همي.
المستشفى كانت رجعتها بعربية إسعاف صغيرة، ومعاها مشاية بعجل، وعلب مسكنات وأدوية كتير، والدكتور كان موصيها إنها ممنوع تحط أي وزن على رجلها لحد ما الكسر يلتئم.
يعني حتى أبسط الحاجات بقت صعبة عليها.
دخول الحمام محتاج مساعدة، وتحضير لقمة تاكلها لوحدها بقى مشكلة، وحتى إنها تجيب لنفسها كوباية مية من المطبخ كانت مش قادرة عليها.
سألتها وأنا مش مستوعبة:
_طب وأولادك فين؟ طارق وإيهاب ومنى؟ محدش فيهم واقف جنبك؟
سكتت شوية، وبعدها قالت بصوت مليان وجع:
_كلمتهم كلهم يا بنتي، واحد ورا التاني، بس كل واحد كان عنده ظروفه.
طارق قال إن الشغل في الورشة مش هيسمحله يغيب، وإن غيابه هيعطّل الشغل ويخسر فلوس.
وإيهاب اتحجج إن شقته صغيرة، وعياله ماليين المكان، ومفيش عنده أوضة فاضية تستوعبها.
أما منى، بنتها، فقالت إن شقتها في الدور الرابع ومفيهاش أسانسير، وإن طلوعها ونزولها هيبقى مستحيل، خصوصًا إن صاحبة العمارة أصلًا مش بتستحمل أي دوشة أو حركة زيادة.
فضلت ساكتة وأنا بسمعها، لكن جوايا كنت بغلي.
مش قادره أفهم إزاي ست تعبت عمرها كله عشان تربي تلات أولاد، وفي الآخر لما احتاجت حد يسندها، كل واحد فيهم دور على حجة يبعد بيها عن المسؤولية.
بصيت ناحية أوضة الضيوف عندي، كانت فاضية من شهور، واللحاف متطبق فوق السرير زي ما هو من آخر مرة حد نام فيها.
مكنتش محتاجة أفكر كتير.
قلت لها بحسم:
_خلاص يا ماما، جهزي شنطة هدومك وتعالي عندي.
اتخضت من كلامي وقالت بسرعة:
_لأ يا هدى، يا بنتي ميصحش. إنتِ مش ملزمة بيا، وكفاية عليكي شغلك ومسؤولياتك.
قاطعتها وأنا بحاول أخلي صوتي حاسم:
_مفيش الكلام ده. إنتِ هتيجي تقعدي عندي لحد ما تقفي على رجلك، وده بيتك ومطرحك، ومش عايزة أسمع اعتراض.
فضلت ساكتة لحظة، وبعدها قالت بصوت مبحوح:
_ربنا يكرم أصلك يا بنتي، أنا مش هنسالك وقفتك دي طول عمري.
مكنتش أعرف وقتها إن الجملة دي هتفضل ترن في ودني كتير، وإن وجودها في بيتي هيكشفلي حكاية عمري ما كنت أتخيل إنها موجودة.
يوم الخميس، طارق جابها بنفسه.
مكنتش شفته من حوالي سنة، لكن أول ما دخل من باب الشقة، حسيت بنفس الإحساس القديم اللي كنت بحاول أنساه.
دخل وهو شايل شنطتها، وبص حوالين الصالة بنظرة سريعة، وبعدها قال بنبرة باردة:
_الشقة متغيرتش كتير يعني.
مردتش عليه، واكتفيت إني أشاور ناحية الطرقة.
_أوضة مامتك جاهزة.
حط الشنطة جنب الباب، وبص لأمه كأنه مستني منها كلمة شكر أو حتى ابتسامة.
لكن الحاجة إنعام فاجأته وهي بتقوله بنبرة حازمة:
_هدى شايلة فوق طاقتها عشاني، ومن غير ما تطلب منك أي حاجة، فخليك مقدر ده ومتعملش نفسك صاحب فضل.
طارق اتكسف، وبص في الأرض، وبعدها حاول يغير الموضوع وهو بيظبط الشنطة.
أنا كنت واقفة بعيد، ومش عايزة أفتح معاه أي كلام.
بعد كام دقيقة نزل، والحاجة إنعام فضلت واقفة ورا الستارة بتبص على عربيته لحد ما اختفت من أول الشارع.
وقتها مكنتش فاهمة ليه فضلت متابعاه بالشكل ده، ولا ليه كان في عينيها حزن أكبر من مجرد إن ابنها مشي وسابها.
من أول يوم، بدأت أظبط الشقة على احتياجاتها.
شيلت السجادة من الطرقة عشان المشاية متتعلقش فيها، وحطيت كرسي خشب متين جنب السرير، وخليت كل الأدوية في درج قريب منها، وعلقت ورقة صغيرة بمواعيد العلاج عشان مننساش أي جرعة.
وبالليل كنت واقفة في المطبخ بعمل شوربة لسان عصفور بالفراخ، لما لقيتها قاعدة على الكرسي وبتبصلي بحزن.
قالت:
_مكنش ليه لازمة كل التعب ده يا هدى، كنتي عملتي أي أكل وخلاص.
بصيتلها وقلت بمشاكسة:
_يعني إنتِ عايزاني أسيبك من غير أكل؟ ده أنا لو عملت كده هتبقي أول واحدة تشتكيني.
ضحكت بخفة، وبعدها قالت:
_ربنا يخليكي ليا يا بنتي.
الأسبوع الأول عدى بصعوبة.
