ـ بكلم ماما يا ماما، وكنت بقولها إني عايزة أروح أقعد عندها كام يوم.
حماتي بصتلي باستنكار وقالت:
ـ تروحي تقعدي عند أمك ليه؟ هو إنتِ متخانقة مع جوزك؟ ولا إحنا عملنا معاكي حاجة؟
قولتلها: ـ لا يا ماما، بس محتاجة أغير جو شوية.
ردت بعصبية: ـ تغيري جو إيه؟ هو إحنا حابسينك؟ ده إحنا معتبرينك بنتنا، وإنتِ اللي مش مقدرة ده.
أحمد خرج من الأوضة على صوتنا وقال:
ـ في إيه يا أمي؟
قالتله: ـ مراتك عايزة تروح تقعد عند أمها! واضح إنها مش طايقة وجودي معاها.
بصلي أحمد وقال: ـ مريم، إنتِ بتعملي إيه؟ هو إحنا لسه هنبدأ مشاكل؟
قولتله: ـ أنا مش ببدأ مشاكل، أنا بس تعبت ومحتاجة أحس إني عروسة، مش مسؤولة عن بيت العيلة كله.
رد عليا: ـ أمي مش هتفضل لوحدها، وده قرار اتفقنا عليه من الأول.
قولتله: ـ إحنا اتفقنا إنها تعيش معانا علشان متحسش بالوحدة، مش اتفقنا إني أبقى مسؤولة عن كل حاجة تخصها وتخص إخواتك.
حماتي دخلت في الكلام وقالت:
ـ يا أحمد، أنا من ساعة ما أبوك غاب وأنا مستحملة، ومش عايزة أكون سبب في خراب بيتك، بس واضح إن وجودي تقيل على مراتك.
وبدأت تعيط.
أحمد جري عليها وقعد يهديها، وأنا دخلت الأوضة وقفلت الباب.
تاني يوم صحيت على صوت حماتي بتتكلم في التليفون مع بنتها الكبيرة.
كانت فاكرة إني نايمة، وسمعتها بتقول:
ـ أيوه يا حبيبتي، أنا مش عارفة أعمل إيه معاها، البنت مش طايقاني، وكل شوية عايزة تخرج وتسيبني لوحدي.
وبعد شوية قالت جملة خلتني أقف مكاني:
ـ أنا قولتلكم من الأول، اللي يتعود على الخدمة من أول الجواز، مش هيقدر يقول لأ بعد كده.
حسيت إن الكلام ده مش مجرد عتاب، دي كانت خطة!
دخلت الحمام وغسلت وشي، وقررت إني مش هواجهها دلوقتي.
بعد الضهر، أخت أحمد الكبيرة وصلت ومعاها أختها التانية.
دخلوا الشقة من غير حتى ما يخبطوا، وقعدوا في الصالة.
واحدة منهم نادت عليا:
ـ يا مريم، اعمليلنا شاي.
خرجت من المطبخ وقلت:
ـ الشاي في المطبخ، اتفضلوا اعملوه براحتكم.
بصوا لبعض باستغراب.
أخت أحمد قالت: ـ نعم؟!
قولتلها بابتسامة: ـ أصل أنا كنت لسه مخلصة شغل البيت، ومحتاجة أرتاح شوية.
حماتي بصتلي وقالت:
ـ هو إنتِ مالك النهارده؟ مش على بعضك ليه؟
قولتلها: ـ مفيش يا ماما، بس كل واحد المفروض يخدم نفسه، وأنا مش هقدر أفضل طول اليوم في المطبخ.
أخت أحمد اتنرفزت وقالت:
ـ هو إحنا بقينا ضيوف عندك ولا إيه؟
رديت عليها: ـ أبدًا، ده بيت أخوكي، وأهلا بيكي في أي وقت، بس وجودك مش معناه إني أبقى مسؤولة عن خدمتك.
سكتوا، لكن نظراتهم كانت كفاية تقول إن الموضوع مش هيعدي على خير.
بالليل، أحمد رجع من الشغل، وأخته الكبيرة كانت مستنياه.
أول ما دخل قالتله:
ـ إنت سايب مراتك تكلمنا بالطريقة دي ليه؟ إحنا مش غرب عنها!
أحمد بصلي وقال:
ـ مريم، إيه اللي حصل؟
قولتله: ـ مفيش حاجة، أنا بس قلت إن كل واحد يخدم نفسه.
قال بعصبية: ـ يعني إيه كل واحد يخدم نفسه؟ دي أختي!
رديت: ـ وأنت أخوها، ساعدها بنفسك، لكن أنا مش ملزمة أطبخ وأنضف وأخدم كل اللي يدخل الشقة.
أحمد قرب مني وقال بصوت واطي:
ـ إنتِ بتختبري صبري يا مريم؟
بصيت في عينه وقلت:
ـ لا يا أحمد، أنا بصحح حاجة إنت فهمتني فيها غلط من البداية.
دخلت أوضتي، وطلعت شنطة صغيرة، وبدأت أحط فيها هدومي.
أحمد دخل ورايا وقال:
ـ إنتِ بتعملي إيه؟
قولتله: ـ رايحة عند ماما يومين، ولما تهدى وتفكر في كلامي نبقى نتكلم.
قال: ـ لو خرجتي من البيت ده، متلوميش غير نفسك.
وقفت وبصيتله وقلت:
ـ أنا خرجت من بيت أهلي علشان أعمل بيت معاك، مش علشان أعيش تحت رحمة كل أفراد عيلتك.
خدت شنطتي ومشيت.
أول ما وصلت بيت أهلي، ماما فتحتلي الباب، ولما شافت عيني حمرا حضنتني وقالت:
ـ مالك يا بنتي؟ إيه اللي حصل؟
حكيتلها كل حاجة، وهي كانت ساكتة وبتسمعني.
وفي آخر الكلام قالتلي:
ـ يا مريم، أنا مش هقولك تسيبي جوزك، ولا هقولك تستحملي، لكن هقولك حاجة واحدة: اللي بيتنازل عن راحته مرة علشان خاطر الناس، الناس بتعتبر تنازله حق مكتسب.
نمت عند ماما الليلة دي وأنا لأول مرة من يوم جوازي حاسة إني مرتاحة.
لكن تاني يوم الصبح، أحمد اتصل بيا.
رديت عليه، فقال:
ـ إنتِ فين؟
ـ عند ماما.
ـ طيب اسمعيني، أمي زعلانة جدًا، وأخواتي مش عاجبهم اللي حصل، وأنا مش عايز مشاكل. ارجعي البيت واعتذري لأمي، ونفتح صفحة جديدة.
ضحكت من غير ما أحس وقلت:
ـ أعتذر عن إيه يا أحمد؟
قال: ـ عن طريقتك معاها ومع أخواتي.
قولتله: ـ طب وإنت هتعتذرلي عن إيه؟
سكت.
كملت كلامي: ـ هتعتذرلي عن شهور ضاعت من عمري وأنا مش حاسة إني متجوزة؟ عن كل مرة كنت عايزة أقعد معاك وأمك تاخدني معاها مشوار؟ عن كل مرة أخواتك كانوا ييجوا ويسيبوا عيالهم عندي؟ ولا عن إنك عمرك ما سألتني أنا عايزة إيه؟
قال بضيق: ـ إنتِ مكبرة الموضوع أوي.
قولتله: ـ لأ يا أحمد، أنا اللي كنت مصغراه لحد ما بقيت مش قادرة أتنفس.
قفلت المكالمة.
لكن بعد ساعة واحدة، ماما دخلت عليا وقالت:
ـ يا مريم، حماتك وأخت جوزك تحت، وعايزين يشوفوكي.
استغربت وقلت: ـ هما عرفوا إني هنا منين؟
ماما قالت: ـ معرفش، بس هما مصرين يطلعوا.
نزلت أشوفهم، وأول ما حماتي شافتني قالت:
ـ أنا جاية أصالحك يا بنتي، بس قبل الصلح عايزة أفهم منك حاجة.
بصتلها وقلت: ـ اتفضلي يا ماما.
قالت وهي بتبص في عيني:
ـ إنتِ ليه مصممة تبعديني عن ابني؟ هو إنتِ عايزة أحمد يبقى ليكي لوحدك؟
وقبل ما أرد، أخت أحمد طلعت من شنطتها ورقة وحطتها قدامي وقالت:
ـ بصي يا مريم، إحنا مش جايين نتخانق، إحنا جايين نتفق على حاجة هتريح الكل.
مسكت الورقة وبدأت أقراها…
وكان أول سطر فيها كفيل يخليني أعرف إن اللي جاي أصعب بكتير من كل اللي فات!
يتبع…
