سافرت من الصعيد للقاهرة عشان أزور أختي المريضة، بس لما وصلت فتحتلي حماتها وقالتلي روحي دلوقتي وتعالي مرة تانية!
اتصدمت لأنها عارفة مشواري وأنا كنت مديالهم خبر بجيتي.
عشان كده دخلت رغم رفضها، واللي شوفته جوه خلاني أحس بقشعريرة من شدة المفاجأة!!!!
وأنا مسافرة من الصعيد للقاهرة كان كل همي أطمن على منيرة أختي، مكنش في دماغي أبداً إن السكة دي هتنتهي بالشكل الغريب ده.
من يوم ما أمنا ربنا يرحمها فارقتنا ومبقاش لينا في الدنيا دي غير بعض، منيرة اتجوزت واحد من القاهرة وعاشت معاه هناك وكل أمورها كانت تمام.
بس من كام شهر كده الحال اتغير، كل ما أتصل أطمن عليها ألاقي صوتها تعبان ومهزوز ومش قادرة تنطق كلمتين على بعض، وتقولي إنها تعبانة جداً ومش قادرة تتكلم.
قلبي كان بيتقطع عليها وكل يوم أكلم جوزي وأقوله لازم أروح أطمن على أختي بنفسي.
اتصلت بيها وقلت لها أنا جاية لك يا منيرة بكرة، حسيت بتردد غريب في صوتها وكأنها بتتلعثم وعايزة تمنعني أجي، بس رجعت وسكتت وقالت لي تمام يا حبيبتي تعالي تنوريني بس ابقي رني عليا قبل ما توصلي.
بنص ساعة بالظبط، استغربت طلبها ده وفضلت أسأل نفسي هي ليه عايزة ميعاد محدد، بس رجعت وقلت لنفسي عيب دي أختي والبيوت أسرار، يمكن الشقة مش مترتبة ولا تعبانة ومش قادرة تقوم تروق، فقلت لها خلاص ماشي ولا يهمك.
يوم السفر ركبت القطر والقلق كان مالي قلبي، طول الطريق وأنا باصة في الشباك وبدعي ربنا تطلع كويسة وميكونش فيها حاجة صعبة، ومن كتر القلق والتفكير نسيت تماماً حكاية إني أرن قبلها بنص ساعة، ولقيت نفسي قدام الباب خبطت خبطتين خفاف وأنا ببتسم ومستنية الباب يفتح وأحضنها.
بس دقيقتين ولقيت الباب بيفتح ببطء وشوفت حماتها قدامي، أول ما عينها جات في عيني وشها اصفر وباهت كأنها شافت حاجة مش متوقعة، ومن غير سلام ولا حتى أهلاً وسهلاً لقيتها بتزعق فيا بصوت مخنوق وبتقولي بارتباك واضح.. انتي.. انتي إيه اللي جابك دلوقتي؟ إنتي متصلتيش ليه قبل ما تيجي زي ما اتفقنا؟، اتفاجئت من طريقتها ونبرة صوتها اللي فيها قلق غريب، ولسه هعتذر وأقولها معلش نسيت وكنت مستعجلة عشان أشوفها، لقيتها بتقاطعني بعصبية وهي بتزقني لبره وبتقولي.. روحي دلوقتي وتعالي مرة تانية.. منيرة نايمة دلوقتي.
المفاجأة نزلت عليا زي الصاعقة، هما إزاي يقولوا كده وهما عارفين مشواري من الصعيد لحد هنا، وكمان منيرة كانت عارفة ومستأذنة منها قبل ما أتحرك من بلدي، ولسه هرد سمعت صوت جوز أختي جاي من جوه البيت وهو بيقول .. مين يا أمي، مين على الباب؟، أمه بصت وراها وقالت له بسرعة .. مفيش دي أخت مراتك.. بس هتمشي دلوقتي وتيجي وقت تاني، ولسه بتمد إيدها تقفل الباب في وشي بقوة، حسيت إن قلبي اتقبض وحطيت إيدي بكل قوتي على باب الشقة ومنعتها تقفله، وقلت لها وأنا ملامحي متغيرة.. إيه اللي بيحصل جوه هنا؟ ومنيرة أختي فين عايزة أشوفها بنفسي.
حماتها زعقت بصوت عالي وقالت لي بحدة وانفعال.. هتكون فين يعني؟ ما قلت لك تعبانة ونايمة ومرهقة ومش هينفع نصحيها دلوقتي، روحي شوفي لكي حتة استريحي فيها لحد ما نبقى نكلمك.
بس أنا مبقاش عندي طاقة أسمع كلام تاني، وجوه قلبي قلق كبير، زحزحتها من قدامي ودخلت الشقة بسرعة.
حماتها جريت ورايا وهي بتصرخ وعايزة تلحقني وتشدني، بس كنت سبقتها ودخلت وياريتني ما دخلت مصدقتش.
اللي شافته عينيا وقتها كان مفاجأة كبيرة خلت جسمي كله يقشعر ومقدرتش أنطق بحرف واحد!!!!!!
أول ما دخلت الصالة، رجلي اتسمّرت في الأرض، وحسيت إن نفسي اتسحب من صدري.
لقيت منيرة أختي قاعدة على كرسي جنب الحيطة، لابسة هدوم بيت قديمة، وشكلها متغير تماماً. وشها أصفر، وعينيها غايرة، وشعرها منكوش، وإيديها مثبتة بقطعة قماش في دراع الكرسي!
صحت من غير ما أحس بنفسي منيرة!!! إيه اللي عملوه فيكي يا حبيبتي؟!
جريت عليها وأنا مش مصدقة اللي شايفاه، لكن حماتها لحقتني ومسكتني من دراعي بقوة وقالت إنتي مش واعية؟! ابعدي عنها!
بصيت لها بمفاجأة وقلت إنتي مثبتة إيديها ليه؟! دي أختي ولا أسيرة عندكم؟!
وفي اللحظة دي جوز أختي خرج من الأوضة، ولما شافني واقفة جنبها اتلخبط وقال إنتي دخلتي هنا إزاي؟ مش المفروض كنتي تتصلي قبل ما تيجي؟
بصيت له وأنا دموعي نازلة وقلت يعني إنت كمان كنت عارف؟! كنتوا مخبيين أختي عني ليه؟!
قرب مني وقال بنبرة حاول يخليها هادية اهدي بس، الموضوع مش زي ما إنتي فاهمة، منيرة تعبانة نفسياً ومش في وعيها، وإحنا بنحاول نسيطر على تصرفاتها عشان متأذيش نفسها.
بصيت لمنيرة، ولقيتها بتحاول تتكلم، لكن صوتها كان ضعيف جداً، ودموعها بتنزل وهي بتحرك راسها بالنفي.
قربت منها وفكيت القماشة من إيديها، وفضلت أطبطب عليها وأقول متخافيش يا حبيبتي، أنا جيت، ومش همشي من غيرك.
فجأة مسكت إيدي بكل قوتها، وقالت بصوت متقطع خدي بالك… خدي بالك من…
وقبل ما تكمل، حماتها صاحت فيها كفاية بقى! إنتي لسه هتعملي لنا فيها مظلومة؟!
لفيت لها وقلت كلمة واحدة كمان وهتصل بالشرطة حالاً!
جوز أختي حاول يتدخل وقال إنتي مش فاهمة حاجة، دي بقالها شهور حالتها مش طبيعية، بتزعق وتكسر وتتهم الناس بحاجات غريبة، وإحنا صابرين عليها بالعافية.
قلت له طب ليه محدش فيكم فكر يتصل بيا ويقولي إن أختي وصلت للحالة دي؟ أنا أختها الوحيدة!
سكت، وبدأ يبص لأمه، وهي بدورها بصت له بنظرة فهمت منها إن فيه حاجة أكبر من مجرد مرض.
قررت إني أخرج من المكان ده بأختي الأول، وبعدها أفهم كل حاجة. ساعدتها تقوم، وكانت رجليها بتترعش ومش قادرة تشيلها، ولما سندتها على كتفي حسيت إنها بقت خفيفة بشكل يخوف.
لكن أول ما وصلنا عند باب الشقة، حماتها وقفت قدامنا وقالت محدش هيخرج من هنا!
طلعت موبايلي وقلت أنا مش بهزر، هتصل بالشرطة.
هنا جوز أختي اتغير تماماً، وقرب مني وقال استني، أنا هفهمك كل حاجة، بس بلاش مشاكل.
