يستمر في مساعدة عزت من غير ما يكشف له هويته، ويأجل مقابلة أبوه لحد ما يقدر يواجهه من غير ما يرجع ينكسر قدامه من جديد. عزت مع مرور الوقت بدأ يتعود على الشغل في المحل، وصالح كان بيعاملُه كويس جدًا، وبيشجعه ويديله مسؤوليات أكبر كل ما يلاحظ إنه شاطر وبيتعلم بسرعة.
وعزت كان فاكر إن صالح ابن المعلم كامل، صاحب المحلات والتجارة، وإنه مجرد شاب اتربى وسط التجارة وورث شغل أبوه. وفي يوم، كان عزت واقف مع واحد من العمال بيرتبوا بضاعة وصلت للمحل، ودار بينهم كلام عن أصحاب الشغل، فقال العامل:
بصراحة المعلم كامل ربنا يبارك له، راجل جدع، هو اللي واقف جنب الأستاذ صالح ومعتبره ابنه، مع إن صالح مش ابنه الحقيقي.
عزت استغرب وسأله:
يعني إيه مش ابنه الحقيقي؟
ضحك العامل وقال:
يا عم أنت لسه جديد، ده صالح ابن مراته من جوزها الأول، والمعلم كامل اتجوز أمه وهو صغير، ورباه وكبره وعلمه التجارة، لحد ما بقوا فاتحين شركات ومكاتب استيراد وتصدير مع بعض.
عزت سكت شوية، وبعدين سأله:
طب هو الأستاذ صالح اسمه بالكامل إيه؟
رد العامل من غير ما يهتم:
صالح محمود حجازي، هو أنت مش عارف اسمه؟
الاسم وقع على ودن عزت بشكل غريب، وفضل يردده في سره، محمود حجازي… الاسم اللي يعرفه كويس، اسم أبوه!
حاول يتأكد من العامل وسأله:
وأنت متأكد من الاسم ده؟
رد عليه:
أيوه طبعًا، ده اسم صاحب الشغل، مالك يا ابني؟
عزت حاول يداري ارتباكه، وكمل شغله، لكن دماغه فضلت مشغولة طول اليوم. إزاي يكون صالح محمود حجازي هو نفس الاسم اللي شافه في بطاقات أبوه القديمة؟
وإزاي يكون المعلم كامل هو زوج أم صالح؟ فضل مستني لحد ما خلص شغله، وأول ما قبض أجرته رجع البيت، وكان أبوه قاعد على كرسيه في الصالة، فحط الفلوس قدامه وقاله:
دول يا بابا، ودي فلوس الدوا اللي كنت محتاجه.
أبوه شكره، لكن عزت ماقدرش يستنى أكتر، وسأله:
بابا، هو أنت كان ليك ابن اسمه صالح؟
الأب رفع عينه له فجأة، وملامحه اتغيرت، وسأله:
أنت عرفت الاسم ده منين؟
عزت قرب منه وقال:
أنا شغال عند واحد اسمه صالح محمود حجازي، وعرفت النهارده إن المعلم كامل اللي شغال معاه هو جوز أمه، وإنه مش ابنه الحقيقي.
هو ده أخويا يا بابا؟
الأب فضل ساكت، وعينه راحت بعيد، وبعد لحظات طويلة هز راسه وقال بصوت ضعيف:
أيوه يا عزت… ده أخوك من أبوك.
عزت قعد جنبه وهو مش مستوعب، وسأله:
يعني أنا شغال عند أخويا من غير ما أعرف؟
طب هو يعرف إني أخوه؟
الأب نزل عينه وقال:
معرفش يا ابني، بس صالح عمره ما كان غريب عني، ده ابني اللي أنا ظلمته وضيعت سنين عمره مني.
عزت بص له باستغراب وقال:
طب ليه ماحاولتش تشوفه أو تسأل عليه كل السنين دي؟
الأب تنهد وقال:
أنا غلطت في حقه يا عزت، وغلطت غلط كبير، وكنت فاكر إن الدنيا هتفضل ماشية زي ما أنا عايز، لحد ما لقيت نفسي خسرت ابني الأول، وبعدها خسرت مراتي والناس اللي كنت بعمل عشانهم كل حاجة.
عزت فضل باصص لأبوه، وبعدها سأله السؤال اللي كان شاغله:
طب هو صالح عارف إنك أبويا؟ وعارف إن أنا أخوه؟
عزت فضل باصص لأبوه باستغراب، وبعدها قاله:
يعني يا بابا أنت متأكد إن صالح مايعرفش إنك أبويا؟
أنا بصراحة مش مقتنع، لأن فيه حاجة غريبة حصلت من أول ما اشتغلت عنده.
محمود بصله وسأله:
حاجة إيه؟
أنا لما روحت أقدم على الشغل، صالح خد بطاقتي عشان يسجل بياناتي، ومن ساعتها وهو بيعاملني كويس جدًا، ودايمًا بيسألني لو محتاج حاجة، وحتى لما عرف إنك تعبان، بعتلك أدوية من غير ما يقول لي مين اللي بعتها.
أنا متأكد إنه عرف إني أخوه، وأكيد هو اللي بيساعدك من بعيد.
محمود سكت، وعينيه بدأت تلمع بالدموع، وقال بصوت متهدج:
هو لسه فاكرني؟ بعد كل السنين دي لسه فاكر إن ليه أب؟
عزت رد عليه:
أومال مين اللي هيبعتلك الدوا ويساعدك؟
أنا مش عارف هو بيعمل كده ليه، بس واضح إنه مش قاسي زي ما أنت كنت قاسي عليه.
الكلمة وجعت محمود، لكنه ما اعترضش، بالعكس نزل عينه للأرض وقال:
أنا عارف إني استاهل أكتر من كده، بس يا عزت أنا نفسي أشوفه، نفسي أشوف ابني وأعرف شكله بقى عامل إزاي، كبر وبقى راجل ولا لسه في ملامحه من طفولته؟
عزت قاله:
طب ما تروح له يا بابا.
محمود اتردد وقال:
أخاف يرفض يشوفني، أو يطردني من قدامه، أنا مش عارف هيستقبلني إزاي.
أنت مش هتخسر حاجة، روح شوفه، حتى لو مش عايز يكلمك، يكفي إنك تشوفه وتطمن عليه.
فضل محمود يفكر في كلام ابنه، وطلب منه إنه يرتب له مقابلة مع صالح، لكن عزت قاله إنه ممكن يروح معاه للمحل من غير ما يرتب حاجة. عدت كام يوم، ومحمود كان بيحاول يجهز نفسه للمقابلة دي، اهتم بملابسه على قد ما قدر، وحاول يحلق دقنه ويرتب شكله، لكن المرض وآثار الواقعة كانوا باينين عليه، والحركة بقت صعبة عليه، وملامحه اتغيرت كتير عن آخر مرة شاف فيها ابنه.
وفي يوم، عزت ساعده يخرج من البيت، وراحوا سوا للمحل. أول ما دخلوا، عزت سلم على العمال، وبعدها لمح صالح واقف بيتابع شحنة بضاعة، فأشار لأبوه وقاله:
أهو يا بابا، ده الأستاذ صالح.
محمود رفع عينه ناحية ابنه، وفجأة وقف مكانه.
فضل باصص له من بعيد، مش قادر يتحرك ولا حتى ينادي عليه. كان شايف قدامه شاب طويل، أنيق، واثق من نفسه، ملامحه فيها شبه كبير منه، لكن الزمن أخد منه سنين طويلة ماكانش موجود فيها.
صالح كان بيتكلم مع أحد العمال، ولما لمح عزت ومعاه راجل غريب، رفع عينه ناحيتهم، وفي اللحظة دي اتقابلت عينيه بعين محمود. عرفه فورًا! رغم التغيير الكبير اللي حصل في شكله، ورغم آثار التعب اللي رسمت خطوطها على وشه، إلا إنه عرف أبوه من أول نظرة.
اتسمرت عينيه عليه، وشاف العجز الباين في حركته، والضعف اللي مالي ملامحه، والكسرة اللي عمره ما تخيل يشوفها في الراجل اللي كان زمان شايف نفسه أقوى من إنه يحتاج لحد. محمود حاول يتكلم، لكن صوته خانه، وفضل واقف قدامه مش عارف يبدأ بإيه، ولا حتى يمد إيده يسلم عليه.
أما صالح، فكان جواه كلام كتير، وذكريات أكتر، لكنه ماحبش يخلي اللحظة دي تتحول لمشهد قدام العمال. بص لعزت وقال بهدوء:
تعالى يا عزت، خليك معانا شوية.
وبعدين وجه كلامه لأبوه:
اتفضل يا حاج، تعالى معايا المكتب.
محمود اتحرك وراه بخطوات بطيئة، وصالح فتح باب المكتب ودخله، وبعد ما قفل الباب، وقف لحظة وبص لأبوه اللي كان قاعد قدامه، ثم أشار له بالجلوس وقال:
اتفضل اقعد يا حاج.
محمود قعد قدام صالح، وكان واضح عليه التوتر والارتباك، فضل ساكت شوية مش عارف يبدأ كلامه منين، لحد ما أخيرًا اتكلم بصوت مكسور وقال:
