بدأ عزت شغله في المحل، وصالح كان بيتعامل معاه بشكل طبيعي جدًا، زي أي عامل جديد عنده، لا بيحسسه إنه يعرفه ولا بيديله معاملة مختلفة عن باقي العمال. لكن الحقيقة إن صالح كان بيراقبه من بعيد، وكل ما يشوفه بيتعب في شغله أو يحرص إنه يخلص المطلوب منه، كان بيحس بفضول أكبر يعرف حكاية الولد ده، وإزاي وصل بيه الحال إنه يشتغل عنده.
وبعد مرور كام يوم، كان صالح قاعد في المحل وقت الظهر، وعزت بيخلص ترتيب البضاعة، فطلب منه يقعد معاه شوية، وجاب له أكل وقاله:
تعالى يا عزت، اقعد كل معايا، أنت من الصبح واقف على رجلك.
عزت قعد وهو بيشكره، وصالح بدأ يتكلم معاه في مواضيع عادية، وبعد شوية سأله وكأنه بيسأل من باب الفضول:
أنت ساكن فين يا عزت؟
في منطقة كذا يا أستاذ.
وأبوك بيشتغل إيه؟
أبويا كان تاجر قطع غيار، بس بقاله فترة مش بيشتغل.
ليه؟ كبر في السن ولا تعب؟
عزت سكت لحظة، وبعدين قال:
لأ، هو حصلت له حادثة من فترة كبيرة، ومن يومها وهو تعبان ومش قادر يتحرك زي الأول.
صالح اهتم بالكلام وسأله:
ربنا يشفيه، وأنت عايش معاه؟
رد عزت:
كنت عايش أنا وأبويا وأمي، وكان معانا رامز أخويا من أمي، بس هو مش أخويا من أبويا.
صالح حس إن الكلام بدأ يكشف له تفاصيل أكتر، لكنه حافظ على هدوئه وسأله:
يعني والدتك كانت متجوزة قبل أبوك؟
أيوه، ورامز ابنها من جوازها الأول، وبابا كان بيحاول يرضيها في كل حاجة، حتى إنه كان بيعامل رامز أحسن مني ساعات، وكان بيصرف عليه ويجيبلُه كل اللي يطلبه، ومكنش بيحب يزعله عشان أمي.
صالح سكت، وحس بمرارة شديدة وهو بيسمع إن أبوه اللي حرمه من حنيته زمان، كان بيحاول يكسب رضا ابن مراته بكل الطرق.
عزت كمل كلامه من غير ما ياخد باله من تأثيره على صالح:
بس أمي ورامز اتعودوا على كده، وبقوا طماعين، مهما بابا يعمل لهم كانوا عايزين أكتر، ورامز بالذات كان بيطلب منه فلوس كتير، وبابا مكنش بيرفض له طلب.
صالح سأله:
ووالدك بعد الحادثة حصل له إيه؟
عزت تنهد وقال:
الحادثة كانت صعبة جدًا، وبابا دخل عمليات كتير، وصرف تقريبًا كل الفلوس اللي كان محوشها على علاجه، وكان عنده تجارة وشغل، لكن بعد اللي حصل مبقاش قادر يتابع أي حاجة، وكل اللي كان معاه خلص.
وأمك عملت إيه وقتها؟
ابتسم عزت ابتسامة حزينة وقال:
في الأول كانت بتقول إنها هتستحمل وإنه جوزها ولازم تقف جنبه، بس لما الفلوس خلصت، بدأت تتغير. ورامز كمان بقى متضايق إنه مطالب يصرف على البيت، وكان بيستخسر يصرف على بابا حتى في علاجه.
صالح حس بغصة في قلبه، لكنه فضل ساكت يسمع. عزت كمل:
وفي الآخر زهقوا منه، وسابوا البيت ومشيوا، وسابوا بابا لوحده وهو لسه تعبان ومحتاج حد يرعاه. وأنا من وقتها بقيت أشتغل أي شغلانة تيجي قدامي عشان أصرف عليه وعلى علاجه، وأوفر له أكله واحتياجاته.
صالح بص له وسأله:
يعني أنت اللي شايل مسؤولية أبوك لوحدك؟
عزت هز راسه وقال:
أيوه، هو أبويا مهما كان، وأنا مليش غيره، حتى لو هو زمان غلط في حقي، مش هقدر أسيبه وهو في الحالة دي. أنا نفسي أقدر أوديه لدكتور أحسن وأوفر له العلاج اللي محتاجه، بس ظروفي على قدّي.
صالح نزل عينه للحظة، وحاول يخفي تأثره، لأنه لأول مرة يعرف إن أبوه اللي اختار يبعد عنه ويعيش حياته بعيد عنه، انتهى به الحال وحيدًا، والناس اللي ضحّى بابنه عشانه سابوه وقت ما احتاجهم. والأصعب إن الولد اللي قدامه، عزت، رغم كل اللي حكاه عن أبوه، لسه بيحاول ينقذه ويصرف على علاجه.
صالح سأله بهدوء:
وأبوك عارف إنك بتشتغل هنا؟
لأ، أنا لسه ماقولتلوش، بس لما أقبض هجيب له الدوا اللي ناقصه، وهيفرح لما يعرف إني لقيت شغل ثابت.
صالح اكتفى بهز رأسه، لكنه من جواه كان بيفكر في حاجة واحدة…
إنه لازم يعرف أبوه ساكن فين، ويشوفه بنفسه بعد كل السنين دي، لكن المرة دي مش عارف هيقدر يقف قدامه إزاي، ولا هيقدر يسمع منه إيه بعد كل اللي عرفه. من اليوم ده، صالح بقى مشغول بالتفكير في كلام عزت، وكل ما يفتكر إن أبوه وصل للحالة دي، وإنه قاعد لوحده ومفيش حد جنبه، كان يحس بمشاعر متلخبطة.
جزء منه كان شايف إن دي نتيجة اختيارات أبوه، وإن الراجل اللي تخلى عنه زمان وحرمه من أبسط حقوقه، يستحق يتحمل نتيجة اللي عمله. وجزء تاني كان جواه فضول كبير يشوفه، يعرف شكله بقى عامل إزاي، ويسمع منه إيه اللي حصل بعد ما سابهم.
لكن أكتر حاجة كانت مضايقاه إنه اكتشف إن أبوه محتاج مساعدة، وإنه رغم كل اللي عمله فيه، لسه مش قادر يتجاهل إنه أبوه. في اليوم التالي، طلب من المحاسب يحسب مرتب عزت ويصرف له جزء منه مقدمًا، وبعدها كلم واحد يعرفه شغال في مجال الأدوية، وطلب منه يوفر مجموعة أدوية ومستلزمات طبية، وبعتهم لعنوان عزت من غير ما يعرفه مين اللي بعتهم.
ولما عزت حضر الشغل تاني يوم، كان واضح عليه الاستغراب والفرحة، وفضل يحكي للعاملين إن حد من أهل الخير بعت لأبوه الأدوية اللي كان محتاجها. صالح كان بيسمعه من بعيد، وابتسم من غير ما يتدخل. لكن المساعدة دي ما ريحتوش، بالعكس، خلته يفكر أكتر في أبوه.
وفي آخر اليوم، كان قاعد في مكتبه لوحده، وفتح درج مكتبه وطلع صورة قديمة ليه وهو طفل، كان أبوه شايله فيها على كتفه. فضل يتأمل الصورة فترة طويلة، وبعدين قفلها بسرعة وكأنه بيهرب من ذكرى مش عايز يفتكرها. دخل عليه جوز أمه، ولما لاحظ شروده سأله:
مالك يا صالح؟ بقالي شوية بكلمك وأنت مش معايا.
صالح اتردد شوية، وبعدين قاله:
