عدت الأيام الأولى بعد الليلة دي وزي ما تكون العاصفة سابت وراها خراب ساكت. مصطفى مابقاش يدخل الشقة، يجي من الورشة أنصاص الليالي، ياكل لقمة عند أمه تحت، ويطلع ينام على كنبة الصالة من غير ما ينطق معايا بكلمة واحدة.
كان يبص لي بنظرات كلها غل وانتقام، كأني أنا اللي تجوزت عليه وشردت بيته، مش هو اللي خان وغدر. أما حماتي، فالموضوع عندها اتحول لمعركة وجود. مابقتش تنادي عليا ولا تطلب مني خدمة، بس سياستها اتغيرت.
بقت تجيب سلفتي التانية—اللي كانت حاطة إيد على إيد طول السنين اللي فاتت—وتخليها تنزل تخدمها مخصوص، وتبالغ في الدلع والمحبة ليها قدامي عشان تحسسني إني بقيت برة البيت ومغضوب عليا. والمشاحنات مابقتش تهدى؛ كل ما أنزل أجيب حاجة وولادي يلعبوا في السلم، تسمعني كلمتين زي السم:
ـ العيال دول متربيين على القسوة، بكرة يكبروا ويطلعوا لأمهم يكسروا كلام الكبار!
أنا كنت ساكتة، بس السكوت المرة دي مكنش ضعف ولا قلة حيلة.. كان سكوت اللي بيبني نفسه من جديد. أيدي اللي كانت متشرحة من الصابون والماية بدأت تطيب، وضهري اللي كان مكسور من الفجر بدأ يرتاح.
لأول مرة من ۱۳ سنة، أصحى الصبح أعمل كوباية الشاي لنفسي ولولادي، أقعد معاهم أراجع لهم دروسهم، وأحس إن عندي كرامة لازم أحافظ عليها. وفي يوم، كنت نازلة أشتري طلبات للبيت، ولقيت مصطفى واقف في مدخل العمارة بيتكلم في التليفون وصوته واطي بس ملغوم بالتوتّر.
وقفت ورا العمود أسمع، ولقيته بيقول:
ـ يا ندى اصبري عليا شويه! أبويا ماسك عليا الورشة والفلوس، لو اتكلمت دلوقتي هيرميني في الشارع مش هيلقيني قيراط واحد! أنا بروح لها بيت أهلك كل أسبوع وبديكي مصاريفك.. اصبري لحد ما أكتف أمل وأخليها هي اللي تطلب الطلاق وتتنازل عن الشقة وولادها، وساعتها الشقة هتبقى لينا ونرجع نعيش هنا رغماً عن عين الكل!
دمي غلي في عروقي، ورجعت خطوتين لورا وأنا بجز على سناني. الخطة كانت واضحة: مصطفى ومامته مستنيين لحظة ضعفي، عايزين يضغطوا عليا بقلة الحيلة والجاه والفلوس لحد ما أستسلم وأرمي كل حاجة وأمشي بطولي.
طلعت الشقة، وعقلي بيشتغل زي الشرار. مصطفى مقطع عني المصاريف بقاله أسبوعين، بيسيب مبالغ تافهة لا تكفي أكل العيال ولا دروسهم، فاكر إنه بكده بيلوي دراعي. بس هو نسي إن أنا بنت البيت ده، وعارفة كل صغيرة وكبيرة فيه.
بعد العصر، نزلت لدكان عمي الكبير اللي جنب الورشة. عمي كان قاعد بيراجع الدفاتر، ولما شافني قام وقف ورحب بيا بحفاوة:
ـ أهلاً يا أمل يا بنت أخويا.. تعالى يا بنتي اقعدي، اخبارك وإخبار الولاد إيه؟
قعدت على الكرسي وبصيت لعمي بثبات وقلت له:
ـ الحمد لله يا عمي.. أنا جاية لك في كلمتين وش ومفيش فيهم لف ولا دوران. مصطفى جوزي منع عني وعن ولاده المصاريف، وناوي يضغط عليا عشان أتنازل عن حقي وحق ولادي وأسيب الشقة. وأنا من النهاردة مش هكون الست الضعيفة اللي بتستنى الحسنة.
عمي حط القلم من إيده وبص لي باهتمام:
ـ عايزة إيه يا أمل؟ اؤمري والأمر لله، فلوسك ومصاريفك توصلك لحد عندك غصباً عن أي حد!
رديت عليه بكل قوة:
ـ لا يا عمي.. أنا مش عايزة أرباغ ولا عايزة صدقة. أنا خدمتي في البيت ده طول ۱۳ سنة كانت ببلاش، والنهاردة أنا عايزة حقي بالقانون وبالشرع. أنا لي نسبة في الورشة دي من ورث أبايا المرحوم اللي انتوا كنتوا بتشغلوه وتدوني منه العيش الحر.. أنا عايزة أستلم نسبي ومصروفي من الورشة مباشر من إيدك انت، مش من إيد مصطفى. وعايزة أشتغل، أنا هفتح مشروع صغير في الدكان الفاضي اللي تحت البيت، أبيع فيه حاجات للمنطقة وأصرف على ولادي بعرق جبيني!
عمي اتصدم من الكلام، وبص لي بذهول من الشجاعة اللي ظهرت عليا فجأة. وفي اللحظة دي بالذات، دخل مصطفى الورشة وسمع جملتي الأخيرة. وشه اتغير وأحمرّ من الغيظ، وقرب مني وزعق بصوت زي الحريق:
ـ مشروع إيه ودكان إيه يا هانم؟! انتِ اتجننتي؟! مراتي أنا تفتح دكان وتشتغل وتفضحني قدام المنطقة؟! ده على جثتي!
وقفت قصاده وبصيت في عينيه بثبات يزلزل، وقلت له:
ـ جثتك دي تسيبها لنفسك يا مصطفى.. اللي بيخون ويغدر ويدور على الجواز السري، مالوش إنه يتكلم عن الفضيحة والرجولة! الدكان هيتفتح، وحقي هاخده، واللي عندك اعمله!
نظرة الذهول في عينين مصطفى كانت كفيلة توريني إنه عمره ما تخيل إن “أمل” الهادية الطائعة اللي شالت بيته ورضيت بالظلم ۱۳ سنة ممكن تقف وتطالب بحقها بعين قوية. اتراجع خطوة لورا ووشه بيجيب ألوان، يبص لأبوه وبعدين يبص لي وهو بيجز على سنانه:
ـ بقى انتِ يا أمل كبرتِ وبقى ليكي لسان وتطالبي بورشة ودكان؟ فاكرة إن عمي هيقف معاكي ضد ابنه وسنده في الدنيا؟
قبل ما أرد، قام عمي من على كرسيه، وضرب قبضة إيده على المكتب بقوة زلزلت المكان، وقال بصوت جاف يرعب:
ـ اقفل بؤك يا مصطفى! كفاية عار لحد كده! بنت أخويا بتتكلم في حقها الشرعي والأنصبة اللي سابها أبوها الله يرحمه في الورشة دي. من بكرة الصبح، أمل ليها مصروف ماهية ثابتة من إيدي أنا شخصياً، والدكان الفاضي اللي على الشارع بتاعي أنا، وأنا اللي ملكتهولها تعمل فيه المشروع اللي يريحها وتصرف بيه على عيالها بكرامتها!
