— طب خمس أيام بس؟
قلت:
— آه.
وسافرت فعلًا، وخدت بنتي الصغيرة معايا.
في اليوم الخامس، محمود فضل يتصل بيا، لحد ما رديت عليه آخر الليل.
قال بعصبية:
— إنتِ فين؟ ليه ما رجعتيش؟
قلت:
— مددنا السفر شوية.
اتعصب وقال:
— تمددي السفر على كيفك؟ إنتِ عندك بيت وعيال وجوز!
قلت:
— وإنت مش عندك بيت وعيال؟ سيبني أتبسط شوية.
قال:
— ما أنا قلت لك عندي شغل في الشرقية!
قلت:
— روح الشرقية، روح تركيا، اعمل اللي إنت عايزه. خلاص، الموضوع ما بقاش يفرق معايا.
قال:
— إنتِ بتتكلمي كده ليه؟
قلت:
— عشان فعلًا ما بقاش فارق معايا. أنا هكمل سفري، وممكن أقعد شهرين. العيال عندك، وأنا مش راجعة دلوقتي.
وقلت له كلمتين وقفلت الموبايل وعملت له حظر.
محمود اتصل بأخويا كذا مرة، لكن أخويا ما ردش عليه، وبعدها بعت له:
— نهاد فاهمة غلط، دي أغلى واحدة عندي، ولو عايزة أطلق عفاف هطلقها.
أخويا رد:
— دي أمور عائلية بينكم، ماتدخلنيش فيها.
وبعدها عرفت إن محمود ألغى سفر تركيا، وعفاف زعلت وراحت عند أهلها.
وفي عزومة كبيرة، الستات فضلوا يسألوها، فكانت بتشتكي وتقول إنه بخيل ومش مقدرها، وإن مراته الأولى نهاد أحسن منه وأطيب وأعقل.
محمود بقى يقعد مع العيال وعصبي طول الوقت.
الكاتبة نرمين عادل همام
أنا كملت سفري شهر، وبعدها رجعت وقعدت عند أمي أسبوع.
محمود جه وقال:
— قولي إنتِ عايزة إيه وأنا أعمله، بس ارجعي البيت.
قلت:
— والله مش راجعة، ومش عايزة منك حاجة.
اتعصب وقال:
— يعني بعد ما أخدتي كل حاجة، مش عايزة ترجعي؟ حتى اللمبات اللي في البيت عايزة تاخديها؟
قلت:
— أنا ما أخدتش حاجة من جيبك. ده بيتي وتعب سنين من فلوسي، ولسه ليا حاجات كتير فيه وهجيبها، حتى لو هديتها للجمعيات.
صرخ:
— بسيطة يا نهاد! الـ500 ألف اللي عند أخوكي دول مش هتتهني بيهم. والله ما هسيب لك منهم جنيه!
وفعلًا، راح لأخويا وقال:
— الفلوس الـ500 ألف اللي عندك دي فلوسي وأنا عايزها.
أخويا بص له وقال:
— فلوسك إيه؟ دي فلوس نهاد، وإنت بنفسك كاتب ورقة رسمية إنها بتاعتها.
أخويا قال له:
— وعليها شهود كمان، وإنت ماضي عليها بإيدك.
محمود اتعصب وقال:
— إنتوا بتضحكوا عليا؟! أنا اديتها الفلوس عشان ترجع بيتها وعيالها، لكن هي دلوقتي عند أمها وسايبة البيت!
أخويا رد عليه بهدوء:
— والله أنا قلت لك من الأول يا محمود، أنا ماليش دعوة بالمواضيع دي. لو عايز تتفاهم معاها، روح لها أو اتصرف عن طريق المحاكم. أنا مش فاضي للوجع ده.
وبعد فترة، واضح إن محمود استشار محامين، لكن الظاهر إنهم ما ادّوش له أمل في موضوع الـ500 ألف.
وبعدها سمعت إنه حاول يرجع عفاف، لكن أمها حطت شروط وطلبات ماعجبتوش، وبعد فترة حصل بينهم مشاكل أكتر، وفي الآخر طلقها.
أنا بقى بقيت آخد عيالي في الويك إند، أخرجهم وأفسحهم وأجيب لهم كل اللي نفسهم فيه، وأرجعهم وقت الدراسة.
وبعد حوالي 4 شهور من طلاق عفاف، وكان يوم جمعة والعيال عندي، محمود اتصل وقال:
— ممكن تديني أمهم أكلمها؟
كلمته، فقال:
— أنا هاجي بعد العصر أقعد معاكم شوية.
قلت:
— أهلاً وسهلاً.
وفعلًا جه، واتجمع حواليه الأولاد. كان هادي وبيتكلم ويبتسم، لكن شكله كان متغير جدًا، وكأنه كبر عشر سنين.
وبعد شوية قال للعيال:
— سيبونا نتكلم مع أمكم لوحدنا.
ولما خرجوا، بص لي وقال:
— يا نهاد، مش عايزة ترجعي ونلم الشمل ونرجع أسرة مستقرة وعيالنا بينا؟
قلت:
— لا والله، مش عايزة ولا حتى أتمنى ده. العِشرة هانت من يوم ما أهنتني، وجحدت فلوسي، واتجوزت عليا. اللي بينا انتهى.
وقلت له:
— عمري ما هنسى اليوم اللي كنت فيه مرمية على أرض الصالة، والعيال بيرشوا عليا مية، وبيجروا ينادوك وإنت معدي من جنبي. ما كلفتش نفسك حتى تبص وتشوف أنا مالي، ولا محتاجة مستشفى ولا لأ. كأني واحدة غريبة، مش مراتك وعِشرتك.
سكت شوية، وقال:
— دلوقتي الوضع اتغير. أنا طلقت عفاف، وأجرت الشقة، وفلوسك رجعت لك. وحتى العفش اللي اشتريتيه موجود عند أمك. ولو عايزة، أكتب لك شقة من الشقق باسمك.
قلت:
— شكرًا، أنا مش محتاجة شققك. فلوسي رجعت لي، ورجعت غصب عنك، مش بطيب منك. وحتى العفش اللي عند أمي أنا أخدته بحقي.
وبصيت له وقلت:
— وبعدين عفاف اللي مشيت دي ما بقتش عايزاك، ومش إنت اللي كنت متحكم في النهاية. وأنا كمان خلاص، ما بقاش لك مكان في قلبي.
قال:
— يا بنت الحلال، عفاف كانت غلطانة وأنا ندمت عليها. ندمت ندم عمري، وبعد ما رجعتي وعشنا فترة مع بعض، الدنيا كانت كويسة وكنا متفاهمين.
قلت:
— الرجوع ده كان مؤقت، لحد ما آخد حقي منك. والحمد لله، ربنا نصرني ورجّع لي حقي.
وبعدين قلت له:
— سامحني، بس أنا هكمل باقي حياتي من غيرك. خلاص، كل واحد يروح لحاله.
وساعتها انتهى كل شيء بينا، وكل واحد فينا راح في حال سبيله.
ومن يومها، قفلت نهاد صفحة محمود نهائي، من غير ندم ولا حتى رغبة في الانتقام. فهمت إن أوقات ربنا بيبعد عننا ناس كنا فاكرين إن حياتنا هتقف من غيرهم، وبعدها نكتشف إن البُعد عنهم كان بداية حياتنا بجد.
رجعت تهتم بولادها وبنفسها، وفلوسها اللي استردتها بدأت تبني بيها مستقبل آمن ليها ولعيالها. أما محمود، فخسر زوجة كانت شايلة البيت وسندهاله سنين، وعرف متأخر إن الإنسان لما يستهين بحد بيحبه ويضمن وجوده، ممكن يصحى في يوم يلاقيه اختار نفسه ومشي.
نهاد ما انتصرتش لأنها وجعته، لكن لأنها أخيرًا بطلت تسمح لحد يهينها أو يقلل من تعبها.
وأهم درس خرجت بيه كان بسيط:
اللي يفرّط فيك بإرادته، ما تحاولش ترجعه غصب… سيبه، وخلي الأيام تعلّمه قيمة اللي خسره.
الكاتبة نرمين عادل همام
تمت
