وفجأة… قال حمدان جملة قلبت المجلس كله: “ودي مش آخر الحقيقة… لأن حسن أخويا ما ماتش في حادث زي ما اتقال… حسن اتأذى.. العمدة رجب… وقف بلا حركة، لكن نقطة عرق باردة نزلت من جانب جبينه لأول مرة منذ سنوات ……. المجلس كلة سكت . حتى الأنفاس بقت مسموعة.
العمدة رجب فضل واقف مكانه، ملامحه جامدة، لكن عينه كانت ثابتة على حمدان من غير ما ترمش. المأمور فاروق كسر الصمت وقال بهدوء شديد: “الكلمة اللي قولتها دي كبيرة يا حاج حمدان… والاتهام من غير دليل ما يتقالش.”
رفع حمدان الملف اللي في إيده وقال: “وعشان كده مجتش أصرخ ولا أفضح حد… جيت ومعايا اللي يثبت.” اتشدت ملامح العمدة. “تثبت إيه؟” فتح حمدان الملف، وطلع منه ظرف بني قديم، لونه مصفر من الزمن. “ده كان عند أخويا حسن.”
المأمور أخده منه، وفتح الظرف بحذر. كان جواه جواب قديم وصورة تانية. بص في الصورة، لقى حسن واقف جنب العمدة رجب، وشاب تالت محدش عرفه. المأمور رفع الصورة قدام العمدة. “دي صورتك؟” بصلها العمدة ثانيتين. “أيوه… وأنا عمري ما أنكرت إني كنت صاحب حسن.”
حمدان رد بسرعة: “ما أنكرتش الصحوبية… لكن أنكرت الحقيقة.” عز كان مركز في وش أبوه. أول مرة يحس إن أبوه بيرد قبل ما يفكر. وده عمره ما كان بيحصل. المأمور فتح الجواب. وبدأ يقرأ أول سطر. وفجأة سكت. رفع عينه لحمدان.
” قال حمدان: “كمل… الناس كلها لازم تسمع.” بدأ المأمور يقرأ بصوت مسموع: “لو حصل لي حاجة… يبقى اعرفوا إني ما رحلتش قضاء وقدر…” وقبل ما يكمل… العمدة صرخ لأول مرة: “بس!” لف الكل ناحيته. قال بانفعال: “الجواب ده مزور.” رد حمدان بمنتهى الهدوء: “لسه ما اتقراش.”
العمدة سكت. لكن صمته كان أبلغ من أي كلام. المأمور بصله نظرة طويلة، وبعدين كمل: “ولو بنتي غزل كبرت في يوم بعيد عن أهلها… يبقى السبب إن في ناس طمعت في اللي أملكه.” اتلفتت الأنظار كلها ناحية غزل.
هي نفسها كانت واقفة مش قادرة تستوعب. همست بصوت مرتعش: “أنا… أنا مش فاهمة حاجة.” قرب منها حمدان. لكن عز اتحرك في نفس اللحظة ووقف بينهم. قال وهو بيبص لحمدان: “من حقها تعرف… لكن على مهلك.”
هز حمدان راسه. “عندك حق.” وبص لغزل بعين مليانة حزن. “أبوك حسن كان شريك العمدة رجب في أراضي كبيرة… وكان بينهما عشرة عمر.” العمدة قاطعه بعصبية: “كفاية.” لكن حمدان كمل كأنه ما سمعوش. “وقبل وفاته بأيام… حصل بينهم خلاف كبير.” المأمور رفع عينه للعمدة.
“خلاف على إيه؟” رد حمدان: “على أرض.” العمدة ضحك بسخرية. “أرض؟” “أيوه… الأرض اللي مقام عليها نص السرايا دي.” الجملة نزلت كالصاعقة. نفيسة بصت لجوزها بذهول. سالم فتح بقه من الصدمة. حتى عز حس إن الدنيا بتتقلب حواليه. العمدة قال بحدة: “إياك تكمل.”
لكن حمدان رفع ورقة مختومة بختم الشهر العقاري. “دي صورة من عقد الشراكة.” أخدها المأمور بسرعة، وبدأ يراجعها. كل دقيقة كانت بتعدي… ملامحه بتتغير. رفع عينه للعمدة وقال: “العقد صحيح.” اتقبض قلب عز. بص لأبوه. مستني منه كلمة واحدة تنفي كل اللي بيتقال.
لكن العمدة ما نطقش. غزل كانت باصة للعمدة بعيون مليانة دموع. وقالت بصوت مكسور: “يا حضرة العمدة…” رفع عينه ليها. “هو… هو أبويا كان يعرفك بجد؟” سؤالها كان أبسط من أي اتهام… لكنه كان الأصعب. العمدة فضل يبصلها ثواني طويلة.
وبعدين لأول مرة، نزل بعينه للأرض. وسكت. والسكوت كان كفاية يخلي الشك يدخل قلب كل واحد واقف في المجلس. أما عز… فكان واقف يبص لأبوه، وكل الذكريات بتمر قدامه. كل مرة كان يسأل عن غزل، وأبوه يغير الموضوع. كل مرة يمنعه يقرب منها.
كل مرة كان يحاول يبعدها عنه. وفجأة… كل حاجة بدأت تركب جنب بعضها. رفع عز عينه ببطء. وقال بصوت هادي… لكنه كان أخطر من الصراخ: “يا بوي…” رفع العمدة رأسه.
“عايزك تبصلي في عيني… وتجاوبني على سؤال واحد.” “اسأل.” “الراجل ده… بيكدب؟” العمدة فتح بقه… لكن ولا كلمة خرجت. ولأول مرة في عمر عز… يتمنى إن أبوه يكذب عليه… انجي الخطيب
عز فضل باصص لأبوه، مستني منه إجابة، وكل ثانية كانت بتعدي عليه كأنها سنة كاملة، والوجوه اللي حواليه بقت مشوشة قدام عينه، حتى صوت أنفاسه بقى تقيل على صدره. كان طول عمره شايف العمدة رجب جبل محدش يقدر يهزه، راجل كلمته سيف، وقراره مبيتراجعش، ولو الدنيا كلها وقفت قصاده ما ينحنيش، لكن دلوقتي كان شايف راجل تاني خالص، راجل واقف قدامه وبيهرب من سؤال بسيط، سؤال إجابته المفروض تكون كلمة واحدة.
“يا بوي… أنا سألتك سؤال.” العمدة رفع عينه ليه، وح
