روحت أزور سلفتي وياريتني ما زورتها.. مرارتي اتفقعت منها ومن عيالها، ورجعت بيتي وأنا مش عارفة أضحك ولا أعيط من اللي شوفته! أنا كنت رايحة أزورها عشان سمعت إنها تعبانة، وقلت واجب وأسأل عليها، لكن أول ما دخلت الشقة حسيت إني دخلت بيت ناس تانية خالص!
الشقة قشطة، ممسوحة وبتلمع، والريحة معطرات في كل حتة، وهي نايمة على سريرها ووشها باين عليه التعب. أول ما شافتني قالت: ـ يا أهلاً يا حبيبتي، تعبتي نفسك ليه؟ تعالي اقعدي جنبي.
لسه هرد عليها، لقيت بنتها الصغيرة داخلة شايلة صينية عليها عصير ومياه ساقعة، وحطتها قدامي وقالت بكل ذوق: ـ اتفضلي يا طنط، نورتينا.
قولتلها: ـ تسلمي يا حبيبتي، ربنا يبارك فيكي.
والله يا جماعة البنت قالتلي كلمتين خلوني أبص لها باستغراب من كتر ذوقها!
وبعد شوية خبطت الجارة على الباب، وكانت جاية تطمن على سلفتي، قامت البنت الصغيرة دخلتها وقدمتلها حاجة تشربها، وبعدها راحت أوضتها من غير دوشة ولا صوت.
أنا هنا بدأت أركز مع العيال.
لقيت ابنها قاعد على السفرة بيذاكر، وبنته جنبه بتراجع وراه، والاتنين بيتكلموا بهدوء، وكل واحد بيحترم التاني.
وفجأة ابني اللي كان معايا طلع الموبايل وفتح فيديو بصوت عالي، لقيت ابن سلفتي بيبص له بكل هدوء ويقوله: ـ معلش يا ابن عمي، ممكن توطي الصوت شوية؟ ماما تعبانة وعايزة ترتاح.
ابني بص له باستغراب، وأنا كنت هموت من الإحراج!
وبعد دقايق بنتها دخلت تسألها: ـ ماما، تحبي أعملك ينسون ولا نعناع؟ قالتلها: ـ اعمليلي ينسون يا حبيبتي، ربنا يريح قلبك.
والولد من بره بيقول: ـ وأنا هخلص المذاكرة وأجهزلك الأكل، متقلقيش.
أنا قاعدة متنحة!
قلت في نفسي: هو أنا دخلت بيت ولا دخلت مسلسل تربوي؟!
إيه الهدوء ده؟ وإيه الاحترام ده؟ وإزاي العيال دي متفاهمة مع بعض بالشكل ده؟
ده إحنا عيالنا كبرونا خمسين سنة قدام!
ابني لو قلتله هاتلي كوباية مية يقولي بعدين، ولو أخته دخلت عليه الأوضة ممكن تقوم حرب عالمية، ولو طلبت منهم يلموا حاجة من الأرض أحس إني بطلب منهم ينقلوا جبل المقطم!
استحملت نفسي بالعافية، وقلت أسألها: ـ إنتِ يا ستي عاملة إيه في العيال دول؟ إيه النظام اللي ماشية عليه معاهم؟
ضحكت وقالت: ـ والله يا حبيبتي مفيش نظام ولا حاجة، دول ولادي وبيساعدوني من نفسهم.
قولتلها: ـ طب ما شاء الله، ربنا يحفظهم، بس أكيد ورا الهدوء ده حكاية، عيالنا مش كده خالص!
ضحكت تاني، لكن المرة دي ضحكتها كانت مختلفة، وقالت: ـ كل بيت وليه حكايته يا حبيبتي، وإنتِ مش شايفة غير اللي ظاهر قدامك.
الكلمة دي وقفتني شوية.
يعني إيه مش شايفة غير اللي ظاهر؟
وققبل ما أسألها، بنتها دخلت تشيل الصينية، فسمعتها بتقول لأمها: ـ ماما، هو إحنا هنقول لطنط ولا لأ؟
سلفتي بصتلها بسرعة وقالت: ـ مش دلوقتي يا حبيبتي.
أنا بصيت لهم وقلت: ـ هو في إيه؟ إنتوا مخبيين عليا حاجة؟
سلفتي سكتت، وبعدين طلبت من بنتها تقفل الباب، وقالتلي: ـ بصي يا أختي، إنتِ شايفة عيالي مؤدبين وبيساعدوني، بس إنتِ متعرفيش إحنا وصلنا لكده إزاي.
قولتلها: ـ طب احكيلي، أنا أهو أتعلم منك.
مسكت إيدي وقالت: ـ أنا مش هقولك إني أم مثالية، ولا إن ولادي عمرهم ما غلطوا، بالعكس… أنا كنت أم عصبية جداً، وكنت فاكرة إن التربية بالصوت العالي والعقاب، لحد ما حصل موقف خلاني أراجع نفسي في كل حاجة.
وقبل ما تكمل، ابنها دخل الأوضة، وكان ماسك ظرف أبيض قديم، حطه جنبها وقال: ـ ماما، طالما طنط موجودة، يبقى لازم تعرف الحقيقة.
سلفتي وشها اتغير، وبصتله وقالت: ـ إنت وعدتني إن الموضوع ده يفضل بينا!
رد عليها: ـ بس يا ماما، هي لازم تعرف، خصوصاً إن ابنها كان السبب في إننا ناخد القرار ده.
أنا اتصدمت وبصيت لابني, لقيته بيبص في الأرض ومش راضي يرفع عينه!
ساعتها حسيت إن الزيارة اللي كنت داخلاها عشان أطمن على سلفتي، ممكن تطلع فيها حكاية تخص بيتي أنا كمان!
يا ترى إيه الحكاية اللي مخبياها سلفتي؟ وإيه علاقة ابني بالموضوع؟ وإيه القرار اللي أخدوه من غير ما نعرف؟
فضلت باصة لابني ومش فاهمة إيه اللي بيحصل، وبعدين بصيت لسلفتي وقلتلها: ـ هو في إيه يا أم العيال؟ ابني ماله بالموضوع؟ وإيه الظرف اللي ابنك جابه ده؟
سلفتي خدت نفس طويل وقالت: ـ بصي يا أختي، أنا هحكيلك من الأول، بس عايزاكي تسمعيني للآخر من غير ما تحكمي على حد.
قولتلها: ـ اتفضلي، أنا قلبي وقع في رجلي!
