فضلت باصة للموبايل ومستنية التسجيل يكمل، وابني قاعد جنبي وشه اتغير تماماً، لحد ما التسجيل اشتغل تاني وسمعت صوته بيقول: «أنا مش عايز أمي تعرف إني ساعات بتمنى أعيش في بيت زي بيتكم، مش عشان مش بحبها، والله أنا بحبها، بس أنا تعبت من الخناق والصوت العالي. أنا ساعات ببقى عامل حاجة حلوة وببقى نفسي أحكيلها، لكن أول ما أبدأ كلام بتفتكر إني بطلب حاجة أو إني ببرر لنفسي غلطة».
حسيت إن رجلي مش شايلاني!
بصيت لابني وقلتله بصوت مخنوق: ـ إنت كنت بتقول الكلام ده من ورايا يا ابني؟
رد عليا وعينه مليانة دموع: ـ أنا مكنتش عايز أزعلك يا ماما، بس كنت محتاج أتكلم مع حد يسمعني من غير ما يزعقلي.
بنت سلفتي قربت مني وقالت: ـ يا طنط، أخويا مش أحسن من ابنك في كل حاجة، بالعكس، هو كان بيغير منه في حاجات كتير، وكان نفسه يبقى عنده شجاعته.
استغربت وقلتلها: ـ شجاعته في إيه؟
قالت: ـ ابنك رغم كل المشاكل اللي بتحصل في البيت، عمره ما كان بيقبل حد يتكلم عنك وحش، وكان دايماً يقول إنك بتتعبي عشانه وإنك ست كويسة، بس محتاجة ترتاح وتبطل عصبية. أخويا كان بيقول نفسه يعرف يحب ماما ويدافع عنها بنفس الطريقة حتى لما تكون زعلانة منه.
سلفتي بصتلي وقالت: ـ عشان كده بقولك متحكميش على العيال من تصرفاتهم بس، كل طفل جواه حكاية، وممكن يكون بيعمل تصرفات تضايقك وهو في الحقيقة محتاج منك حاجة تانية خالص.
أنا ساعتها مقدرتش أمسك دموعي.
كنت داخلة البيت ده وأنا مقتنعة إن سلفتي عندها سر سحري مخلي عيالها مؤدبين، وكنت بقارن بين بيتي وبيتها، ومش واخدة بالي إن المشكلة ممكن تكون في طريقتي أنا.
قولتلها: ـ طب ليه مقولتليش الكلام ده من الأول؟
ردت عليا: ـ كنت خايفة تزعلي وتعتبري إني بتدخل في تربيتك، خصوصاً إننا أهل، ومش عايزة أخسر علاقتنا بسبب نصيحة.
قعدت شوية ساكتة، وبعدين بصيت لابني وقلتله: ـ أنا عايزة أسمعك يا حبيبي، احكيلي كل اللي مضايقك، ووعد مني إني مش هقاطعك ولا هزعقلك.
