عزت.
واشتغلت قبل كده فين؟
اشتغلت في محل خضار، وبعرف أفرز البضاعة وأتعامل مع الزباين، بس صاحب المحل استغنى عن العمال، وأنا بقالي فترة بدور على شغل.
صالح سأله شوية أسئلة عن خبرته، وكان واضح إن الولد محتاج الشغل فعلًا، فقرر إنه يديله فرصة، وطلب منه بطاقته الشخصية عشان يسجل بياناته. أول ما مسك البطاقة وقرأ الاسم بالكامل، اتجمد مكانه!فضل باصص للبطاقة ثواني، ورجع قرأ اسم الأب مرة واتنين، وكأنه مش مصدق اللي عينيه شايفاه.
الاسم ده يعرفه كويس، ده اسم أبوه!رفع عينه للشاب وبصله بتركيز، وبدأ يلاحظ ملامحه، وبعدها رجع بص للبطاقة تاني. عزت لاحظ سكوته فقاله:
فيه حاجة يا أستاذ؟
صالح فاق لنفسه، ورجع البطاقة له بهدوء وقال:
لأ يا ابني، مفيش حاجة، أنت اشتغلت في المجال ده قبل كده وبتفهم فيه، خلاص اعتبر نفسك معانا من النهارده.
عزت فرح وشكره، وصالح طلب من العامل يفهمه طبيعة الشغل ويعرفه على باقي العمال. لكن من جواه كان فيه ألف سؤال بيتصارعوا في دماغه… هو ده فعلًا أخوه من أبوه؟
وإيه اللي حصل لأبوه بعد كل السنين دي؟ وهل لسه متجوز نفس الست؟ وهل عنده أولاد تانيين غير عزت ورامز؟كان عنده فضول كبير يعرف أخبار الراجل اللي قضى طفولته كلها يتمنى إنه يبص له مرة بحنية، لكنه في نفس الوقت مش عايز يكشف عن نفسه ولا يعرف الولد إنه أخوه.
قرر يتعامل معاه كأنه مجرد عامل جديد في المحل، ويستنى الأيام تكشف له حكاية أبوه اللي اختفى من حياته، ويمكن يعرف من عزت حاجات عمره ما كان يتخيل إنه هيعرفها.
