روايات وقصص

نادين

قلت جملتي وأنا بقوم من مكاني، واتجهت ناحية المكتبة الصغيرة اللي جنب التلفزيون، وبدأت أفتح درجًا فيها وأطلع منه علبة مخملية.

رجعت قعدت جنبها، وفتحت العلبة قدامها، فظهر طقم دهب رقيق، سلسلة وحلق وخاتم.

شهقت ريهام بإعجاب وهي بتقرب وشها من العلبة.
– إيه ده يا بنتي! إيه الجمال ده كله؟!

ابتسمت وأنا بطلع السلسلة من مكانها وأرفعها قدام عيني.
– حسام جابهولي في عيد جوازنا. كان قايلي إنه مش هيعرف يخرجني اليوم ده عشان عنده شغل كتير، وأنا اتضايقت وقتها، بس لما رجع بالليل لقيته محضرلي المفاجأة دي. ده حتى كان فاكر إني هزعل منه، فكان مخبيها في عربيته طول اليوم.

ريهام فضلت باصة للطقم، وابتسامتها بدأت تبقى تقيلة على وشها.
– بجد؟ ده ذوقه حلو أوي.

– أوي؟ ده إنتِ لسه ما شفتيش حاجة!

ضحكت، ورجعت العلبة مكانها، وبعدها فتحت درجًا تاني وطلعت منه علبة ساعة أنيقة.
– بصي دي كمان، الساعة دي جابهالي لما كنت تعبانة شوية. قال لي إنه مش عارف يعمل إيه عشان يفرحني، وإنه نفسه يشوفني مبسوطة على طول. أنا وقتها عيطت من الفرحة، أصل أنا مش بتأثر بالهدايا نفسها قد ما بتأثر إنه فاكرني وبيفكر إزاي يفرحني.

مدت ريهام إيدها تمسك الساعة، وفضلت تتأملها قبل ما ترجعها لي.
– ربنا يسعدك يا نادين، إنتِ تستاهلي كل خير.

ابتسمت وأنا بحط الساعة في العلبة.
– عارفة يا ريهام، أنا ساعات بحس إن حسام بيغير عليَّ حتى من الهوا. لو اتأخرت في الرد عليه يتصل بيا يسألني أنا فين، ولو خرجت مع ماما يفضل يبعت لي يطمن إني وصلت، ولو حس إني ساكتة شوية يقعد يسألني مالك وإيه اللي مضايقك.

وبعدين قربت منها وهمست كأني بحكي لها سرًا خطيرًا:
– بس متقوليش له إني بقولك الكلام ده، عشان بيتكسف لما أتكلم عن حنيته قدام حد.

ريهام ضحكت ضحكة قصيرة، لكنها كانت بتحاول تخبي بيها الضيق اللي بدأ يظهر في عينيها.
– هو فعلًا باين عليه إنه بيحبك.

بصيت لها باستغراب مصطنع.
– باين بس؟ ده إنتِ لو شفتيه لما ببقى تعبانة، بتستغربي إزاي راجل مشغول طول اليوم يسيب كل حاجة ويقعد جنبي!

وقبل ما ترد، مسكت تليفوني من غير ماتاخد بالها، وكتبت له رسالة قصيرة:
«حبيبي، أنا حاسة إني تعبانة شوية وصداعي زاد، بس متقلقش عليَّ.»

بعت الرسالة، وحطيت التليفون على الترابيزة قدامي، ورجعت أكمل كلامي مع ريهام كأن الموضوع عادي جدًا.

– على فكرة، أنا نفسي أسافر مع حسام يومين كده، نسيب البنت عند ماما ونروح أي مكان هادي. هو وعدني إنه هيظبط لنا الموضوع أول ما يخلص شوية شغل عنده.

ريهام بصت لي، وبعدها سألتني بنبرة حاولت تخليها عادية:
– وهو فاضي يسافر دلوقتي؟

هزيت كتفي بدلال.
– عشاني بيفضى، حتى لو مش فاضي. هو بس بيحب يخلص اللي وراه عشان لما نبقى مع بعض ما يشغلش باله بأي حاجة تانية.

ما كملتش جملتي إلا والتليفون رن.

كان حسام.

ابتسمت ابتسامة واسعة، وبصيت لريهام قبل ما أرد، كأن المكالمة دي شيء متوقع جدًا.
– أهو يا ستي، قلت لك بيخاف عليَّ إزاي!

رديت، وغيرت نبرة صوتي تمامًا، خليتها أهدى وأنعم، وفيها دلال واضح.
– أيوه يا حبيبي.

جالي صوته من الناحية التانية، وفيه قلق ظاهر:
– مالك يا نادين؟ إنتِ تعبانة؟ إيه اللي حصل؟!

حطيت إيدي على جبيني، رغم إن مفيش أي حاجة بتوجعني، وقلت بدلع:
– شوية صداع بس يا حبيبي، متقلقش.

– شوية صداع إيه بس؟ طب أخدتي حاجة؟ أجيب لك دكتور؟ أنا جاي لك حالًا.

اتسعت ابتسامتي، ورفعت عيني ناحية ريهام اللي كانت قاعدة قدامي ساكتة، بتسمع كل كلمة.
– لا يا حبيبي، متتعبش نفسك، أنا بس كنت محتاجة أسمع صوتك

سكت حسام لحظة، وبعدها صوته رق أكتر.
– يا حبيبتي إنتِ، طب استنيني، أنا هخلص اللي في إيدي واجيلك. وماتقفيش تعملي أي حاجة، ارتاحي لحد ما أجيلك.

ضحكت بخفة.
– حاضر يا حبيبي، بس متتأخرش عليَّ.

– مش هتأخر، سلامتك يا قلب حسام.

– الله يسلمك يا روحي.

قفلت المكالمة، وحطيت التليفون على صدري للحظة وأنا مبتسمة، وبعدها بصيت لريهام.
– شوفتي؟ هو كده دايمًا، أول ما يحس إني تعبانة بيبقى عايز يسيب الدنيا كلها وييجي لي. والله ساعات بضحك على نفسي وأقول هو أنا عملت إيه عشان ربنا يرزقني بواحد بيحبني بالشكل ده؟

ريهام نزلت عينيها ناحية كوباية العصير، وفضلت تحركها بإيدها من غير ما تشرب.

– ربنا يخليكم لبعض.

ابتسمت وأنا بميل ناحيتها وأمسك إيدها.
– ويخليكي ليا إنتِ كمان يا حبيبتي، إنتِ عارفة إنك أقرب واحدة ليا، وإن مفيش حد في الدنيا باحكيله كل حاجة زيك.

رفعت عينيها لي، وللحظة حسيت إنها اتلخبطت، مش عارفة تبص في عيني ولا تسحب إيدها من إيدي.

وأنا كملت بكل براءة:

– عشان كده بحب أوريكي الحاجات دي، مش عشان أغيظك ولا حاجة، حاشا لله، بس عشان إنتِ صاحبتي وحابة أشاركك فرحتي. أصل مش كل واحدة عندها راجل يفتكر تفاصيلها بالشكل ده.

الجملة الأخيرة نزلت عليها كأنها صفعة، خصوصًا إنها كانت عارفة كويس إن الراجل اللي بتكلم عنه هو نفسه الراجل اللي بتقابله من ورايا، واللي كانت متخيلة إنها بدأت تاخد مكانة خاصة عنده.

لكن اللي ما كانتش تعرفه إن كل كلمة بقولها كانت مقصودة، وكل هدية وريتهالها كانت جزءًا من لعبة أنا اللي حطيت قواعدها.

أنا ما كنتش محتاجة أواجهها، ولا أقول لها إني عرفت، ولا حتى ألمح لها إن في حاجة غلط.

كنت عايزاها تفضل قاعدة في بيتي، وسط صوري مع حسام، وتشوف بعينيها الحياة اللي كانت فاكرة إنها هتقدر تدخلها وتاخد منها اللي هي عايزاه.

وبالفعل، بعد دقائق، سمعت صوت مفتاح في الباب.

ريهام رفعت راسها بسرعة، وأنا ابتسمت وأنا بقوم من مكاني.

– أهو جه حبيبي، قلت لك مش بيستحمل يعرف إني تعبانة ويسيبني لوحدي.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شاهد أيضاً
إغلاق
زر الذهاب إلى الأعلى