
دخل حسام بخطوات سريعة، وأول ما شافني مد إيده ناحيتي.
– مالك يا نادين؟ وريني كده، إنتِ سخنة؟!
حط إيده على جبيني، وبعدها بص لي بقلق.
– إنتِ ليه ما قولتيليش إنك تعبانة من بدري؟!
اتدلعت عليه وأنا بمسك إيده.
– ما أنا قلت لك يا حبيبي، هو أنا أخبي علي حاجة؟
لف دراعه حواليا، وقال بحنان:
– طب يلا، ادخلي ارتاحي، وأنا هعمل لك حاجة تشربيها.
بصيت لريهام من فوق كتفه، فوجدتها تحدق فينا بصمت، وملامحها جامدة كأنها بتحاول تستوعب المشهد.
ابتعدت عن حسام قليلًا، وقلت له:
– طب يا حبيبي، ريهام لسه قاعدة معايا، ما ينفعش أسيبها وأدخل أنام.
ابتسم بتوتر وقالها
– معلش يا ريهام، أصل نادين لما بتتعب بتبقى مسؤوليتي أنا
ريهام ردت بصوت خافت:
– لا طبعًا، أنا ماشية أصلًا، عشان ترتاح.
اعترضت بسرعة، وأنا بمسك إيدها:
– تمشي إيه بس؟ ده إنتِ لسه ما اتغديتيش! اقعدي، حسام هيعمل لنا حاجة ناكلها، صح يا حبيبي؟
حسام بص لي باستسلام مبتسمًا.
– من عيني يا ستي، اللي تؤمري بيه.
ضحكت، بينما ريهام سحبت إيدها بهدوء وقالت إنها لازم تمشي فعلًا.
وقبل ما تخرج، حضنتها وطبعت قبلة على خدها.
– هستناكي تيجي لي تاني يا حبيبتي، المرة الجاية نبقى نقعد براحتنا.
همست لي إنها هتكلمني، وبعدها خرجت من الشقة.
أول ما الباب اتقفل، اختفت الابتسامة من وشي.
بصيت ناحية حسام، لقيته دخل المطبخ يدور على حاجة يعملهالي، فطلعت تليفوني وفتحت محادثتي مع ريهام، وفضلت أبص على اسمها للحظات.
كنت عارفة إن اللي حصل النهارده مش هيخليها تبعد عن حسام، بالعكس، ممكن يخليها تتمسك بيه أكتر، وتحاول تثبت لنفسها إنها تقدر تاخده مني.
وده بالضبط اللي كنت مستنياه.
لأن المرة الجاية، مش هكتفي إني أحرق قلبها بكلمتين عن حب جوزي ليا.
المرة الجاية، هخليها هي اللي تطلب مني بإيديها حاجة، وتفتكر إنها أخيرًا قدرت تكسبني في صفها.
وساعتها، هتعرف إن نادين اللي كانت بتحكيلها أسرار بيتها زمان، ما بقتش الست اللي تقدر تضحك عليها بسهولة.
بعد اليوم اللي ريهام جت فيه عندي، حسام بدأ يتغير، وبقى واضح إنه متوتر ومش عارف يتصرف معايا إزاي. وأنا كنت مستمرة في تمثيلي، كل ما يقرب مني أقول له إني تعبانة، وكل ما يحاول يفتح معايا كلام أتهرب منه، لحد ما بدأ هو كمان يفقد أعصابه من معاملتي.
لكن اللي ما كنتش متوقعاه إن حسام، بدل ما يبعد عني، بدأ يحاول يقرب مني أكتر.
في ليلة، كنت قاعدة على السرير بتفرج على التليفون، دخل الأوضة وقعد جنبي، وبعدها مد إيده ياخد التليفون من إيدي ويحطه على الكومود.
– نادين، إحنا بقالنا فترة مش بنتكلم زي الأول، وأنا تعبت من الوضع ده.
بصيت له بملامح مرهقة، وقلت بهدوء:
– وأنا كمان تعبت يا حسام، بس أعمل إيه؟ غصب عني.
قرب مني وحاوط كتفي بدراعه.
– طب تعالي نتكلم، إنتِ مراتي، ومش عايز أفضل حاسس إن في حاجة بينا بتضيع.
اتسندت على صدره، وسمحت لنفسي أعيش اللحظة دي، مش لأني نسيت اللي عمله، لكن لأني كنت عايزة أفهم هو ناوي على إيه بالظبط.
فضل يطبطب عليَّ، وبعدها باس راسي وقال:
– وحشتيني يا نادين، والله وحشتيني. أنا مش عارف إيه اللي حصل لنا، بس مش عايز أخسرك.
رفعت وشي وبصيت له بعينين مليانين دموع.
– طب ما تخسرنيش يا حسام، أنا كل اللي عايزاه أحس إن لسه ليا مكان في قلبك.
شدني لحضنه، وأنا فضلت ساكتة، بينما هو كان فاكر إن قربه مني كفاية عشان يرجع كل حاجة زي الأول.
لكن في نفس الليلة، وبعد ما نام، تليفونه رن برسالة.
ما احتجتش أبص عليها عشان أعرف مين صاحبتها، لأن حسام أول ما شافها، قام من السرير وخرج للصالة عشان يرد.
وأنا استنيت شوية، وبعدها سمعت صوته وهو بيتكلم في التليفون.
– ريهام، أنا مش هقدر أقابلك بكرة.
سكت يسمعها، وبعدها قال بنفاد صبر:
– ما أنا قلت لك عندي مشاكل في البيت، مش كل حاجة هتنفع تتعمل في الوقت اللي إنتِ عايزاه!
ما سمعتش ردها، لكني سمعت صوته وهو بيعلى.
– إنتِ عايزاني أعمل إيه؟ أسيب مراتي وبنتي وأجري وراكي؟!
وقتها عرفت إن الخلاف بينهم بدأ يكبر، وإن ريهام ما بقتش راضية تفضل في الظل، خصوصًا بعد ما شافت حسام بيرجع يقرب مني.
تاني يوم، حسام خرج من البيت بدري، وقال لي إنه عنده شغل كتير، وأنا ودعته بابتسامة هادية، وبعدها رجعت كملت يومي كأن مفيش حاجة حصلت.
لكن في الحقيقة، كنت مستنية اللحظة اللي هتبدأ فيها ريهام تحاسبه على كل كلمة وعدها بيها.
وبالفعل، في نفس اليوم، اتقابلوا في مكان بعيد عن شغله وبيتنا.
ريهام كانت قاعدة قدامه، ملامحها متوترة، وأول ما شافته قالت بحدة:
– إنت بتتهرب مني ليه يا حسام؟ بقالك فترة كل ما أطلب أشوفك تقول لي عندك مشاكل في البيت، طب وأنا ذنبي إيه؟!
حسام زفر بضيق.
– يا ريهام، أنا مش بتهرب منك، بس الظروف مش مناسبة.
ضحكت بسخرية.
– ظروف إيه؟ نادين؟ إنت رجعت لها خلاص ولا إيه؟!
بصلها بضيق، وقال:
– نادين مراتي، وأنا مش هسيب بيتي عشان إنتِ متضايقة إني مش فاضي لك.
اتغيرت ملامحها، وقالت بصدمة:
– يعني إيه؟! إنت مش كنت بتقول لي إنك مش مرتاح معاها، وإنك مكمل عشان بنتك؟ مش إنت اللي قلت لي إنك بتحبني وإنك نفسك نكون مع بعض؟
حسام سكت لحظات، وبعدها قال:
– أنا فعلًا كنت مرتاح معاكي، بس الموضوع كبر أكتر من اللازم.
ريهام ضربت بإيدها على الترابيزة.
– كبر إزاي؟! هو أنا كنت بلعب معاك؟ أنا صاحبتها، وخسرت علاقتي بيها عشانك، وإنت دلوقتي هترجع لها وتسيبني أنا؟!
حسام رد بعصبية:
– محدش طلب منك تخسري علاقتك بيها، وإنتِ كنتِ عارفة إني متجوز من البداية.
بصت له بذهول، وبعدها قالت بصوت مرتعش:
– يعني أنا كنت نزوة في حياتك يا حسام؟! كنت بتتسلى بيا لحد ما زهقت ورجعت لمراتك؟!
حسام اتنهد، وحاول ينهي الكلام:
– أنا ما قلتش كده، بس أنا مش هقدر أكمل بالشكل ده. أنا عندي بيت وبنت، ومش هفضل عايش بين نارين.
قامت من مكانها، وعينيها مليانة دموع.
– لأ يا حسام، إنت لازم تختار. يا أنا يا هي. مش هقبل أفضل واحدة على الهامش في حياتك!
رفع عينيه لها، وقال بحسم:
– وأنا اخترت بيتي. مش هسيب نادين وبنتي.
ريهام فضلت باصة له كأنها مش مصدقة إنه قالها بكل سهولة، وبعدها شالت شنطتها وقالت بوجع:
– إنت كداب، وعمرك ما حبيتني. إنت كنت عايز واحدة تتسلى بيها، ولما خفت على بيتك رجعت تلعب دور الزوج المخلص!
حسام ما ردش، وهي خرجت من المكان وهي بتعيط، بينما هو فضل قاعد مكانه، حاسس إن العلاقة اللي دخلها هربًا من مشاكل بيته بقت هي نفسها مشكلة أكبر من قدرته على تحملها.



