
ابني بدأ يتكلم، وحكى مواقف كتير كنت فاكرة إنها عدت وخلاص، لكنه كان لسه فاكرها.
حكى عن يوم رجع فيه من المدرسة فرحان بدرجة جابها، وأنا وقتها كنت متعصبة بسبب مشكلة في البيت، فرديت عليه من غير ما أسمعه.
وحكى عن مرة كان عايز يخرج مع أصحابه، ولما رفضت زعق، وأنا فضلت أعايره بالموقف ده كل ما يطلب حاجة.
اكتشفت إن في حاجات صغيرة بالنسبة لي، لكنها كانت كبيرة أوي بالنسبة له.
وقبل ما أمشي، سلفتي قالتلي جملة مش هنساها: ـ إحنا مش بنربي عيالنا عشان يخافوا مننا، إحنا بنربيهم عشان لما الدنيا تضيق عليهم يلاقونا أول ناس يجروا عليهم. والاحترام مش معناه إن الطفل يسكت طول الوقت، الاحترام الحقيقي إن كل واحد في البيت يحس إن ليه قيمة وإن صوته مسموع.
رجعت بيتي وأنا بفكر في كل كلمة سمعتها.
وأول ما دخلت، لقيت بنتي الصغيرة سايبة حاجتها في الصالة، وكنت هزعق كعادتي، لكن وقفت نفسي وناديت عليها بهدوء.
استغربت وقالت: ـ نعم يا ماما؟
قولتلها: ـ تعالي يا حبيبتي، يلا نلم حاجتنا سوا.
بصتلي باستغراب وقالت: ـ إنتِ كويسة يا ماما؟!
ضحكت وقلت: ـ أيوه يا حبيبتي، أنا كويسة، بس قررت إننا نحاول نخلي بيتنا أهدى شوية.
ومن اليوم ده بدأت أحاول أغير نفسي، مش في يوم وليلة، ولا بقيت أم مثالية، ولسه فيه خناقات واختلافات، لكن بقيت أعتذر لما أغلط، وأسمع قبل ما أحكم، وأشكر ولادي على أي حاجة حلوة يعملوها.
وبعد أسبوعين، حصل موقف خلاني أعرف إن أول خطوة عملتها كانت أهم من كل النصايح اللي سمعتها.
كنت تعبانة جداً ونايمة، وفجأة صحيت على صوت بنتي بتقول لأخوها: ـ وطّي صوتك شوية يا أحمد، ماما نايمة وتعبانة.
وبعدها سمعت صوت ابني بيقول: ـ سيبيها ترتاح، أنا هجهز الأكل النهارده.
والله عيطت وأنا على السرير، مش عشان عملولي الأكل، لكن عشان حسيت إن ولادي بدأوا يحسوا بيا من غير ما أخوفهم أو أجبرهم.
وفهمت أخيراً إن البيت الهادي مش بيت مفيهوش مشاكل، البيت الهادي هو اللي أهله بيتعلموا يحلوا مشاكلهم من غير ما يكسروا بعض.
أما سلفتي، ففضلت أزورها وأتعلم منها، واكتشفت إنها هي كمان بتغلط وبتتعب وبتنفعل، لكن الفرق إنها مش بتعتبر الاعتذار ضعف، ولا بتفتكر إن صوتها العالي هو اللي يثبت إنها أم.
وأهم حاجة اتعلمتها إن العيال مش محتاجة أم مبتغلطش، العيال محتاجة أم لما تغلط تعرف ترجع تصلح اللي كسرته.
خلصت الحكاية، لكن فضل سؤال جوايا: يا ترى كام طفل ساكت في بيوت أهله، مش لأنه مرتاح، لكن لأنه فقد الأمل إن حد يسمعه؟
#حكاوي_شيمو
إيه رأيكم؟ هل التربية بالهدوء والاحتواء بتفرق فعلاً في شخصية الأطفال؟ ولا الشدة ليها دور لازم يكون موجود؟
“هذه القصة من وحي خيال الكاتب، وأي تشابه بينها وبين الواقع في الأسماء أو الأحداث هو محض صدفة غير مقصودة.”



