لكن اللي حصل مع نانسي خلاني أشوف الحقيقة من غير تجميل، ممدوح مش مغلوب على أمره، ولا بيعمل كل ده بدافع الأخوة، هو اختار يخليني في المرتبة الأخيرة، وسمح لواحدة تانية إنها تتمادى معايا في بيتي وهو بيتفرج.
تاني يوم طلبت منه نتكلم، ولما قعد قدامي قلتله بهدوء:ـ أنا عايزة الطلاق يا ممدوح. رفع عينه من الموبايل وبصلي باستغراب، وبعدها ضحك وقال:ـ طلاق؟ إنتِ بتقولي إيه يا سميرة؟ هو كل ما نختلف هتطلبي الطلاق؟
ـ مش خلاف يا ممدوح، أنا مش عايزة أكمل حياتي مع راجل مش شايفني، ولا مقدر وجودي، ولا حتى بيحترم مشاعري. اتنهد بضيق وقال: ـ أنا تعبت من غيرتك وشكك، ولو إنتِ شايفة إن الطلاق هو الحل، فأنا مش هقف في طريقك.
بصيتله وأنا مستنية منه حتى يحاول يفهم أنا وصلت للمرحلة دي ليه، لكنه كمل بمنتهى البرود:ـ هجهزلك حقوقك، وهننهي الموضوع بالمعروف. ساعتها فهمت إن وجودي في حياته ما بقاش فارق معاه، وإنه مستعد يتخلص مني بنفس السهولة اللي كنت بتمنى بيها إنه يتمسك بيا.
وفعلًا، خلال أيام تم الطلاق، وأخدت ولادي وروحت بيت بابا. أول ما شافني بالحالة دي، حــ,,ـــــضني وسألني: ـ مالك يا بنتي؟ إيه اللي حصل؟ وإنتِ جاية لوحدك ليه؟وقتها ما قدرتش أمسك دموعي، وحكيتله كل حاجة من أول ما شريفة ونانسي جم يقعدوا عندي، لحد اهتمام ممدوح المبالغ فيه بيها، وطلبات الدلع اللي مابتخلصش، وطريقة معاملته ليا، وإنه لما طلبت الطلاق وافق من غير حتى ما يحاول يمنعني.
بابا سمعني للآخر من غير ما يقاطعني، وبعد ما خلصت مسح على راسي وقال:ـ إنتِ غلطانة يا سميرة. بصيتله باستغراب وقلت: ـ أنا غلطانة في إيه يا بابا؟قال بحزن: ـ غلطانة إنك استحملتي كل ده لوحدك، وغلطانة إنك فضلتي ساكتة لحد ما وصلتي للمرحلة دي.
أنا عمري ما كنت عايزك تحسي إن جوازك من ممدوح كان رد جميل ليا، أنا وقفت جنبه لوجه الله، وهو كان المفروض يصون بنت الراجل اللي وقف معاه، مش يعاملها بالطريقة دي. وبعدين مسك إيدي وقال بحزم:ـ اسمعيني كويس، أنا هجيبلك حقك، وده أقل بكتير من إنك تفكري فيه أو تزعلي نفسك عشانه.
إنتِ بنتي، وكرامتك عندي بالدنيا كلها. ما رديتش، لكن كلامه طمني وحسسني إني مش لوحدي. تاني يوم بابا بدأ يتحرك، وكان ممدوح شغال في تجارة قطع غيار السيارات، ومعتمد بشكل كبير على مجموعة من الموردين اللي بابا كان سبب أساسي في إنه يتعرف عليهم ويتعامل معاهم.
بابا كلم كل الموردين اللي بيتعاملوا مع ممدوح، وطلب منهم يوقفوا توريد أي بضاعة جديدة ليه، وينهوا التعامل التجاري معاه، وقالهم إن من حقهم يختاروا، لكن هو مش هيقبل إن حد يتجاهل اللي حصل لبنته بعد كل اللي قدمه لممدوح.
