من اليوم ده نانسي بدأت تتمادى في طلباتها بشكل مستفز، وبقت تتعامل مع ممدوح كأنه متفرغ لخدمتها طول اليوم، والغريب إنه كان بيستجيب لكل طلباتها من غير ما يفكر حتى. في يوم كنت قاعدة في الصالة، لقيتها نازلة من فوق وماسكة موبايلها، وقعدت جنب ممدوح اللي كان بيتفرج على التلفزيون.
قالت بدلع: ـ ممدوح، أنا مش عاجباني أوضتي خالص. بصلها وقال: ـ مالها يا نوسة؟ـ حاسة إنها كئيبة، والدهان بتاعها مش مريحني، والسر,,ـــــير كمان مش عاجبني، أنا عايزة أغير الأوضة كلها، دهان ونجف وستاير وسر,,ـــــير ودولاب، وعايزة أعملها زي أوض الفنادق بالظبط.
ابتسم وقال: ـ من عيوني، اختاري التصميم اللي يعجبك وأنا أنفذهولك. قالت بحماس: ـ بجد؟ طب أنا عايزاك تيجي معايا نختار كل حاجة بنفسنا، مش عايزة حد يختارلي حاجة من غيرك. رد من غير تردد: ـ بكرة ننزل سوا.
كنت قاعدة بسمع، فقولتله: ـ هو إنت مش عندك شغل يا ممدوح؟بصلي وقال: ـ هظبط مواعيدي، مش كل حاجة محتاجة تعليق يا سميرة. نانسي ابتسمت بانتصار، وبعدها بيوم، كنت بجهز نفسي عشان أخرج أزور ماما، لقيتها داخلة الصالة وبتنادي عليه:
ـ ممدوح، أنا عايزة أروح الكوافير. رد عليها: ـ طيب خلي السواق يوصلك. هزت راسها باعتراض وقالت: ـ لا، أنا عايزاك إنت اللي توديني. ـ حاضر، هوديكي. ـ وتستنى معايا لحد ما أخلص، عشان أنا بزهق لوحدي، ومش بحب أقعد مستنية من غير ما يكون معايا حد.
ضحك وقال: ـ يا ستي حاضر، هقعد مستنيكي لحد ما تخلصي. بصيتله باستغراب وقلت: ـ يعني هتفضل قاعد بالساعات في الكوافير مستنيها؟رد بمنتهى البرود: ـ أيوه يا سميرة، فيها إيه؟ دي مش أول مرة أعمل كده.
نانسي قربت منه وقالت: ـ طب ما تنساش تجيبلي قهوتي المفضلة وإنت جاي، وتجيبلي معاها تشيز كيك، أصل مش بحب قهوة الكوافير. ابتسم وقال: ـ من عيوني يا نوسة. ساعتها ما قدرتش أمنع نفسي من الضحك بسخرية، وقلت:
ـ هو إنت يا ممدوح بقيت جوز نانسي ولا إيه؟
أصل أنا مش فاكرة إنك كنت بتعمل معايا ربع اللي بتعمله معاها!اتغيرت ملامحه وقال بعصبية: ـ سميرة، أنا مش هفضل كل يوم أسمع نفس الكلام، نانسي متعودة عليا من وهي صغيرة، وبعدين دي ظروفها صعبة ومحتاجة حد يراعيها. رديت عليه: ـ وظروفها الصعبة دي هتخلص إمتى؟
لما تخلص الكوافير ولا لما تخلص فلوسك؟نانسي قامت من مكانها وقالت ببراءة مصطنعة: ـ خلاص يا ممدوح، أنا مش عايزة أخرج، واضح إن وجودي مضايق سميرة. لكنه رد بسرعة: ـ لا يا حبيبتي، هتخرجي وهتعملي كل اللي إنتِ عايزاه، ومحدش هيحرمك من حاجة.
وسابني واقفة مكاني، وأنا لأول مرة أحس إن ممدوح مش بس بيدلل نانسي، ده كمان بيسمح لها تتعمد تقلل مني قدامه، وهو شايف إن ده حقها! في الليلة دي فضلت أفكر في كل اللي حصل، وافتكرت سنين جوازي من ممدوح، وافتكرت إزاي كنت بحاول أرضيه وأراعي ظروفه وأقف جنبه، وفي المقابل كان بيخليني أحس طول الوقت إني مجرد ست اتجوزها عشان يرد جميل أبوها.
