عد الزيارة دي بأسبوع تقريبًا، بدأت أسمع أخبار ممدوح من الناس اللي بتعرفه. الشركة وضعها بقى صعب، والموردين رفضوا يرجعوا يتعاملوا معاه، وحتى بعض العملاء اللي كانوا بيتعاملوا معاه من سنين بدأوا يدوروا على تجار غيره.
لكن اللي استغربته إن نانسي وشريفة اختفوا من حياته فجأة، بعد ما كانوا مش بيسيبوه لحظة. وفي يوم كنت قاعدة مع ماما، لقيت تليفوني بيرن، بصيت على الشاشة لقيت ممدوح بيتصل. اترددت شوية، لكن في الآخر رديت. ـ ألو. ـ إزيك يا سميرة؟
ـ الحمد لله، خير؟ـ أنا عايز أشوف الولاد، بقالي فترة مشوفتهمش. ـ الولاد ولادك يا ممدوح، وتقدر تشوفهم في أي وقت نتفق عليه، إيه اللي يمنعك؟سكت شوية وبعدين قال: ـ أنا عارف إنك زعلانة مني، وعارف إنك شايفة إني ظلــ,,ـــــمتك، بس مهما حصل بينا ما ينفعش تحرميني من ولادي.
ـ محدش حرمك منهم، إنت اللي كنت مشغول عنهم، حتى وإحنا في بيت واحد كنت بتخرج نانسي وتشتريلها وتفسحها، وولادك كانوا بيسألوك إمتى هتخرج معاهم. قال بسرعة: ـ خلاص يا سميرة، مش عايز أفتح القديم، أنا عايز أشوفهم وبس.
اتفقت معاه ييجي يوم الجمعة، وقفلت المكالمة. يوم الجمعة جه ممدوح، وكان شكله متغير جدًا، هدومه مش مرتبة زي عادته، وملامحه باين عليها الإرهاق. دخل وقعد مع الولاد، وحاول يلعب معاهم، لكن ابني كان متحفظ، وبنتي فضلت تسأله ليه مبقاش ييجي يشوفهم زي الأول.
بعد ما الولاد دخلوا يلعبوا، ممدوح بصلي وقال:
ـ إنتِ مرتاحة دلوقتي يا سميرة؟بصيتله باستغراب: ـ تقصد إيه؟ـ شركتي بتقع، والناس اللي كنت معتبرهم إخواتي سابوني، وأنا خسرت شغلي وبيتي ومراتي وولادي. رديت بهدوء: ـ إنت ما خسرتش كل ده مرة واحدة يا ممدوح، إنت كنت بتخسرهم واحدة واحدة، بس ما كنتش واخد بالك.
حط إيده على وشه وقال: ـ أنا غلطت، بس ما كنتش متخيل إنك ممكن توصلي للطلاق. ضحكت بمرارة: ـ وإنت كنت متخيل إني هفضل مستحملة لحد إمتى؟ كنت فاكر إني هفضل أتفرج عليك وإنت بتعامل واحدة تانية كأنها مراتك، وأنا مجرد ضيفة في حياتك؟
قال بصوت واطي: ـ نانسي عمرها ما كانت في دماغي بالشكل اللي إنتِ فهمتيه، دي أختي يا سميرة. ـ وأنا عمري ما اعترضت على إنك تعتبرها أختك، أنا اعترضت على إنك نسيت حدودك معاها، ونسيت إن ليك زوجة وبيت وولاد محتاجين اهتمامك.
فضل ساكت، وبعد شوية قال:
ـ طب ممكن نبدأ من جديد؟بصيتله باستغراب وقلت: ـ إنت بتطلب مني أرجعلك؟هز راسه وقال: ـ أيوه، أنا مش عايز أخسر أسرتي. ساعتها حسيت إن ممدوح لسه مش فاهم، فقلتله:
ـ المشكلة مش إنك خسرت أسرتك يا ممدوح، المشكلة إنك ما حسيتش بقيمتها غير لما بقيت لوحدك، وأنا مش هقدر أرجع لنفس الحياة اللي كنت فيها لمجرد إنك خسرت شغلك وبقيت محتاجني. قام من مكانه، وبصلي بحزن، وقبل ما يمشي قال:
ـ أنا هفضل أحاول لحد ما تسامحيني.
رديت عليه: ـ سامحتك عشان أرتاح، لكن ده مش معناه إني هرجعلك. خرج ممدوح، وأنا فضلت واقفة عند الباب، لكن المرة دي ما عيطتش، ولا حسيت إني خسرت حاجة. وبعد يومين عرفت من واحدة قريبة من شريفة إن نانسي رجعت تتكلم مع طليقها، وإنها كانت بتضغط على ممدوح طول الفترة اللي فاتت عشان يصرف عليها ويحقق كل طلباتها، ولما شغله بدأ يقع، بطلت تسأل عنه.
