بالفعل، معظم الموردين استجابوا لطلبه، خصوصًا إن علاقتهم ببابا قديمة، وكانوا عارفين إنه صاحب فضل كبير عليهم. في البداية ممدوح ما فهمش إيه اللي بيحصل، افتكر إن الموضوع مجرد تأخير في الشحنات، واتصل بأكتر من مورد، لكن الردود كانت متشابهة، محدش عايز يكمل معاه.
بدأت مخازنه تفضى تدريجيًا، والطلبات اللي كان متفق عليها اتعطلت، والعملاء بقوا يلغوا تعاقداتهم، لأنه مش قادر يوفر قطع الغيار في مواعيدها. ومع مرور الأسابيع، بدأ الضغط المالي يظهر عليه، واضطر يقلل العمالة ويبيع جزء من مخزونه القديم عشان يقدر يسدد التزاماته.
أما أنا، فكنت بعيدة تمامًا عن كل اللي بيحصل، مركزة في ولادي وبحاول أبدأ حياتي من جديد. لحد ما في يوم كنت قاعدة مع بابا، رن تليفونه، ولما شاف اسم المتصل ابتسم ابتسامة صغيرة وقال:ـ أهو بنفسه بيتصل… شكله بدأ يفهم إن الدنيا مش دايمًا بتمشي على مزاجه.
رد على المكالمة، وسمعت صوت ممدوح من الناحية التانية وهو بيقول بعصبية واضحة:ـ يا حاج، أنا مش فاهم إيه اللي بيحصل! إنت طلبت من الناس توقف شغلها معايا ليه؟ أنا شركتي بتقع، وإنت عارف إن الموضوع ده ممكن يضيع مستقبلي كله!
بابا رد عليه بهدوء:ـ وإنت لما كنت بتضيع بنتي، كنت فاكر إن مستقبلها مش مهم؟ سكت ممدوح لحظات، وبعدها قال بنبرة غاضبة:
ـ يا حاج، أنا وسميرة اتطلقنا، والطلاق حصل برضاها، وإنت مالكش دعوة بخلافاتنا الشخصية! أنا عمري ما قصرت معاها ولا مع ولادي.
بابا ضحك بسخرية وقال: ـ ما قصرتش معاها؟ أمال إيه اللي يخلي بنتي ترجعلي مكسورة بالشكل ده؟ إنت فاكر إن وقوفي جنبك كان عشان تيجي في يوم وتكسر خاطر بنتي وتفكر إنك تقدر تستغنى عنها عادي؟
ـ يا حاج، أنا مش عايز أخسر شغلي بسبب خلاف عائلي، إنت عارف إن عندي التزامات وعمال وناس فاتحة بيوت من ورا الشركة. ـ وأنا كمان عندي بنت وولادها فاتحين بيت، وكان نفسي جوزها يحافظ عليهم، لكن واضح إنك كنت مشغول بمرات أبوك وبناتها لدرجة إنك نسيت بيتك.
ممدوح اتنرفز وقال: ـ أنا مش هقبل إن حد يتحكم في شغلي أو يفرض عليا أعيش إزاي!بابا رد بثبات: ـ محدش فرض عليك حاجة، إنت اخترت تطلق بنتي، واخترت تفرط في بيتك، وأنا اخترت إني أبعدك عن دايرتي وعن الناس اللي عرفتك عليهم.
وكل واحد يتحمل نتيجة اختياراته. وقفل المكالمة من غير ما يديله فرصة يرد. بصيت لبابا وقلت: ـ بس يا بابا، هو كده ممكن يخسر كل حاجة، وأنا مش عايزة أكون السبب في خراب شغله. مسك إيدي وقال: ـ يا بنتي، أنا مش بقولك افرحي في خراب حد، لكن كمان مش مطلوب منك تشيلي هم راجل هو ما شالش همك.




