أما شريفة فكانت بتقول للناس إنها عمرها ما كانت متوقعة إن ممدوح يتخلى عنهم بالشكل ده، وإنه اتغير بعد جوازه مني. وقتها بس فهمت إن ممدوح كان طول عمره بيحاول يثبت لهم إنه مش أقل منهم، لدرجة إنه نسي إن عنده بيت محتاج منه يثبت فيه إنه راجل مسؤول.
لكن الحكاية ما انتهتش عند كده، لأن بعد شهر تقريبًا حصل موقف خلاني أعرف إن ممدوح لسه عنده استعداد يضحي بأي حاجة عشان يرضي شريفة وبناتها… حتى لو الحاجة دي تخص ولاده. بعد شهر تقريبًا، ممدوح بدأ ينتظم في زيارة الولاد، وكنت بحاول أخلي علاقتهم بيه مستقرة بعيد عن خلافاتنا، لحد ما في يوم اتصل بيا وقال:
ـ سميرة، أنا عايز آخد الولاد معايا يومين نقضيهم سوا، بقالي كتير محروم منهم. وافقت، وفعلاً جه أخدهم، لكن بعد ساعتين تقريبًا بنتي اتصلت بيا وهي بتعيط. ـ ماما، إحنا عايزين نرجعلك. قلبي اتقبــ,,ـــــض وسألتها: ـ مالك يا حبيبتي؟ بابا زعلكم؟
ـ لا يا ماما، بس إحنا جينا عند طنط شريفة ونانسي، ونانسي مش عايزانا نلعب في الصالة، وبتقول إننا بنبوظ لها حاجتها. حاولت أهديها وقلت: ـ طيب اديني بابا. ممدوح رد عليا، فقلتله: ـ إنتوا فين يا ممدوح؟ـ عند أمي، في مشكلة؟ـ بنتك بتكلمني وبتعيط، إيه اللي بيحصل؟
رد بضيق: ـ يا سميرة، نانسي عندها شوية حاجات جديدة ومش عايزة الولاد يلمسوها، وأنا هجيب لهم حاجة يلعبوا بيها. قلتله: ـ دول ولادك يا ممدوح، مش أطفال غريبة داخلين بيت ناس، ولو وجودهم مضايق نانسي، خدهم واخرج بيهم في أي مكان.
رد بعصبية: ـ إنتِ هتفضلي تحرضيهم عليا وعلى أهلي؟قفلت المكالمة وأنا مش مصدقة، وبعد نص ساعة لقيته جايب الولاد لحد باب البيت. دخلوا وهما زعلانين، وابني أول ما شافني قال:
ـ ماما، بابا قالنا ما نلمسش حاجة عشان طنط نانسي بتزعل.
حــ,,ـــــضنتهم، وقررت إن الموضوع مش هيتكرر. بالليل ممدوح اتصل بيا، وقال: ـ إنتِ ليه خليتي البنت تعيط وتطلب ترجع؟ كان ممكن تستحملي شوية. قلتله: ـ أنا مش هعلم ولادي إنهم يحسوا إنهم تقال على حد، حتى لو الحد ده جدتهم أو خالتهم اللي إنت معتبرها أختك.
قال: ـ نانسي ظروفها صعبة، ومش عايز أزعلها. ضحكت بمرارة: ـ ولسه يا ممدوح؟ بعد كل اللي حصل، لسه نانسي أهم من ولادك؟سكت، فقلتله: ـ من النهارده زياراتك للولاد هتكون في مكان يناسبهم، بعيد عن أي حد يحسسهم إنهم مش مرغوب فيهم.
قفلنا المكالمة، وبعدها بأيام فوجئت ببابا بيقولي إن ممدوح راح له الشركة وطلب يقابله. سألته: ـ راح ليه؟رد بابا: ـ جاي يطلب مني فرصة أخيرة، وبيقول إنه عايز يرجع يقف على رجله، ومستعد يبدأ من الصفر.
سكت شوية وبعدين قال: ـ بس الغريب إنه طلب مني أساعده بشرط إني ما أتدخلش في علاقته بأمه وبناتها، وكأن المشكلة كلها كانت في شغله مش في تصرفاته. وقتها ابتسمت وقلت: ـ يبقى هو لسه ما اتغيرش يا بابا، هو بس خسر الفلوس، ولسه ما خسرش غروره.
بابا رفض يساعد ممدوح، وقاله إن الفرص مش بتتمنح للي بيكرر نفس الغلط، وإنه لو عايز يبدأ من جديد يبدأ بمجهوده، مش على حساب حد تاني. وممدوح خرج من عنده غاضب، وبعدها بفترة عرفت إنه اضطر يبيع جزء من ممتلكاته ويسدد ديونه، وإنه نقل شغله لمكان أصغر وبدأ يتعامل مع موردين جدد بشروط أصعب.
